U raportu di l’Organisazione di e Nazione Unite puderebbe esse l’ultimu avvisu prima d’un’ epica nera pè l’Umanità è a pianetta.
U 6 di maghju di u 2019, l’IPBS – Intergovernmental Science-Policy Platform on Biodiversity and Ecosystem Services (Piattaforma di e pulitiche scentifiche pè a biudiversità è l’ecosistemi ) – nant’à una dumanda di l’ONU, hà publicatu un raportu nant’à a situazione di a biudiversità. Un millione di spezie, animali è vegetali, sò minacciati d’istinzione da quì à pocu. Un essere vivu nant’à ottu. Hè ciò ch’hà da accade s’è l’umanità ùn cambia i so cumpurtamenti prestu.
A biudiversità, un sugettu di secondu pianu pè anni
U sugettu di a biudiversità hè statu una quistione di secondu pianu pè anni ind’i studii scentifichi. Oghje, si parla sempre più di u cambiamentu climaticu è pocu di biudiversità, pè una ragione simplice : u cambiamentu climaticu hà cunsequenze più dirette e visibile pè l’umanità ch’è a perdita di esseri vivi. Sta visione etnocentrista hè stata rifiutata di modu definitivu cù st’ultima rendita. A biudiversità è u risultatu di un bilanciu è ne dipendenu cumpletamente l’umanità, è a so suppravivenza.
Pigliemu l’esempiu di l’oceani. L’oceani sò respunsevuli di u 30% di u trattamentu di u CO² di l’atmosfera, stu trattamentu fattu da i curalli è in periculu cù u risultatu di a polluzione marina, scatturendu pè a parte maiò di l’attività umana. Cù a ghjunta di a strapesca, a situazione di l’oceani hè in periculu è u so avvene mette un puntu d’intarrugazione nant’à u futuru di a nostra pianeta, è sicuru di l’umani.
Una battaglia micca persa quantunque
Ma i cambiamenti si facenu. Secondu à l’urganisazione Green Peace, a prutezzione di i spazii marini è u primu passu pè truvà mezi di limità l’effetti di l’attività umana in un primu tempu. Oghje, solu l’ 1% di l’acque internaziunale sò prutete; Green Peace ne vuleria 30% sottu prutezzione di l’instituzione internaziunale. Secondu à Green Peace, “i strumenti legali pè a prutezzione di a biudiversità è di i spazii naturali sò troppu debuli. Avemu bisognu di mecanismi rinfurzati è di consequenzi s’è omu ùn rispetta e leghje pè a prutezzione di a biudiversità ”.
I cambiamenti statali viaghjanu dinò. Certi paesi anu dichjaratu l’urghjenza climatica: u Regnu Unitu, u 30 d’aprile, sottu a prissione, par un dettu, di u muvimentu pacificu Extinction Rebellion, è di a Republica d’Irlanda a settimana scorsa. U guvernu irlandese hè statu spintu da i Verdi irlandesi per sta decisione.
Great news from Ireland!! Who is next?
And remember: #ClimateEmergency means leaving fossil fuels in the ground. #ClimateBreakdown #EcologicalBreakdown https://t.co/GTkyhg7Sam— Greta Thunberg (@GretaThunberg) May 9, 2019
Queste decizione sò direttamente i risultati di e manifestazione internaziunale pè l’azzione climatica di queste ultime settimane. Ma a necessità d’azzione, è decizione, à u livellu internaziunale sò aspettate pè avè un cambiamentu effettivu nant’à l’avvene di a pianeta.
Ritrattu : Maxim Blinko, polluzzione di Kuta beach, Bali.