Una tranquilla ora, Andrea Acquarone

L’alizzioni auropei in Francia s’avvicinanu è a scelta frà u Rassemblement National (RN) è La République en Marche (LREM) ci pare un’evidenza. I dui partiti sò guasgi à ugualità in i scandaglii vicinu tramindui à 22%, eppò l’altri partiti sò tutti abbastanza daretu per ùn riprisentà una minaccia per i dui novi mastodonti di a pulitica francese. Tandu, ci pare tutti chì u duellu trà u « naziunalisimu » di i partiti di estrema diritta à prò di i Stati Nazioni è u cusì-dettu « prugressisimu » di i partiti neuliberali hè inevitevule è chì ci vuleria à fà tandu a scelta trà sti dui partiti. Ùn ci seria alternative trà i dui. Duveriamu accittà stu novu mondu puliticu cumpletamente binariu, senza sfumatura, senza sensu criticu, senza riflessione cuntratante, induve tuttu seria biancu o neru.

Per furtuna, u libru d’Andrea Acquarone prisenta un’ alternativa à sta scelta binaria guasi distopica prupunendu una terza via euroregiunalista à prò di l’Unione Auropea, à prò di e Nazioni storiche di l’Auropa, in un scopu di cuuperazione è prusperità cumuna tinendu contu di e sfarenze di i diversi populi auropei. In Una Tranquilla ora appunti per una rivoluzione possibile, scrittu in talianu in versione uriginale, l’autore risponde à una dumanda fundamentale per ogni regiunalistu in Auropa : U Statu Nazione averà effettivamente cunclusu u so ciclu di vita ? Principia a so prova fendu un riassuntu di a Storia di u pinsamentu ecunomicu è suciulogicu di l’Occidente per fà capì ci cum’elli sò nati i Stati Nazioni è cum’elli sò rispunsevuli di a caduta culturale auropea. L’uniformazione culturale di i populi strughje a diversità d’una civilizazione, eppò a so creatività, ciò chì a rende vulnerabile à l’influenza di l’altri. Ghjè cusì chì l’autore spiega a lesta americanisazione di a sucetà auropea. Essendu vulnerabile, l’Auropa hè a preda di tutte l’altre putenze di u mondu chì cercanu à duminà a scena internaziunale. Cusì, li pare chì l’Auropa hè minacciata d’esse manghjata in a Mundializazione da l’altre putenze cume a Cina, a Russia è i Stati Uniti è da un duellu sterile populisti/prugressisti s’è ùn si sveglia micca è prupone un rinnovu auropeu, chì includi ogni regione storica di u cuntinentu.

Per risponde à e diverse crise chì toccanu u cuntinentu auropeu, Andrea Acquarone và à sustene un prughjettu auropeu basatu nantu à una larga autonomia di tutte e regioni storiche d’Auropa in u scopu d’amministrà più validamente e regioni pigliendu contu di e so specificità. Per contu à i puteri regaliani, elli duverianu esse attributi à un super-Statu auropeu basatu nantu à u mudellu di i Stati Uniti o di una cunfederazione di nazioni. Per ellu, stu prughjettu si prisenta cum’è l’unica sperenza per unificà infine l’Auropa, e rende la infine abbastanza putente per fà cumpetizione uguale contru à l’altri grandi « imperi » chì si sveglianu in ogni regione di u mondu. Unificà si in a nostra diversità per ùn more. Uniti in a diversità comu disse u mottu di l’Unione Auropea.

Veru manifestu à prò di un’ Auropa di e regioni, di i populi storichi di l’Auropa, di a difesa di e lingue minurizate, è oppostu à un neuliberalisimu senza pietà, dannighjatore di e culture è di e « piccule nazioni », Una ora tranquilla, appunti per una rivoluzione possibile si prisenta cum’è un libru impurtante da leghje per ogni vutante o interessatu per l’alizzioni auropei. S’è ùn vi ritruvete micca in u duellu « prugressimu » chì vi vende l’uniformisazione di u pinsamentu è u neuliberalisimu cum’è sola salvazione per l’Auropa contru à u risorgimentu di i Stati-Nazioni chì volenu distrughje e « piccule nazioni » per mantene nazioni chimere leghjite puru stu libru per allevà vi !

U libru d’Andrea Acquarone – libru scrittu solu in talianu per u mumentu ma un corsofonu ùn tenerà nisunu prublema per leghjelu – s’è site interessati da a pulitica, a lotta per e nazioni senza Statu, è di u federalisimu auropeu.

Da cumprà quì

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.