Da u 23 à u 26 di maghju di u 2019, ind’i 28 paesi di l’Unioni Aurupea, si vota pà eleghja à 751 (o 705, incù u Brexit) parsoni chì rapprisintarani i più di 500 millioni di cittadini. In Francia, si vutarani listi naziunali u 26 di maghju. U scrutiniu hè à un solu ghjiru è ghjovi à eleghja diputati aurupei chì s’uccuparani di saluta, pulitica agricula, pulitica ecunomica.
I diputati eletti sarani chjamati à rendasi sia in Bruxelles, sia in Strasbourg.
U prublemu quì hè quiddu di a rapprisintazioni perceputa da a parti di i citadini ind’a misura chì iss’istituzioni sò cunsiderati cum’è luntani da u populu.
Tandu, l’Auropa investici, via u Feder, € 275 millioni tra u 2014 è u 2020, soldi destinati à prughjetti di sustegnu à l’attività ecunomica, à u sviluppu di l’intrapresi in settori rurali, à a pesca, à l’agricultura, à a silvicultura è ancu à u ligami suciali trà i pupulazioni.
Issi sforzi impurtantissimi pà i nosci tarritorii ùn bastarani micca à mubilizà l’alittori, ch’ùn erani cà 81 629 annantu à 229 843 à s’essa spiazzati, sia 35,52 % di u tutali .
64,5 % sò dunqua stati in casa soia.
Difficiuli di fà amà l’Auropa, tandu. I cartelli eletturali sò a testimunianza di una campagna morta.
A tendenza chjara di a Corsica hè di vutà pà i listi di dritta (UMP, FN). In fatti, in lu 2014, u Marsiddesu Renaud Muselier (UMP) avia raccoltu 26,31 % di i voti, contr’à 23,29 % contr’à l’eternu candidatu di u FN, Jean-Marie Le Pen. I naziunalisti di François Alfonsi s’erani cuntentati di una terza piazza è di 21,51 % (senza tandu essa elettu annantu à l’eurocircuscrizzioni – 0,75 % di i voti tutali). Si pò parlà di u PS sott’à i 10 % o u PC sott’à i 6.
Elettu Corsu, ùn ci n’era, segnu di disaffezzioni di i partiti parighjini pà i Corsi ? Podassi.
Issu fattori d’abbandonu ùn favurizzeghja micca a participazioni citadina.
Issa volta, ci sarani 34 listi di 79 candidati imposti ind’a misura chì ùn si pudarà micca sceglia un candidatu annantu à a lista (panachage) ma sulamenti una intera.
In Francia, i listi sò assai numarosi, a soglia naziunali di 5 % essendu necessaria pà ottena l’eletti. I listi principali (>1%) sò :
– DLF (Debout La France, dritta) : Nicolas Dupont-Aignan, diputatu suveranistu, hè creditatu di 5 % di i voti. Avarà podassi eletti, ma micca Corsi.
– LR (Les Républicains, centru-dritta), incù u ghjovanu filosofu, François-Xavier Bellamy, pruponi à Livia Graziani in 26 esima pusizioni. Essendu creditata di 16 %, a lista ùn darà micca posti pà candidati Corsi.
– U FN (Rassemblement National, dritta), incù u ghjuvanottu Jordan Bardella (d’urighjini taliana), creditata di 23 %, ùn pruponi micca Corsi in pusizioni eleghjibili.
– UDI, centru-dritta : A lista di Jean-Chistophe Lagarde, creditata di 3 % ùn pruponi micca candidati Corsi in pusizioni d’essa eletti. Ùn farà omancu un elettu edda stessa, ind’i cundizioni prisenti.
– La République En Marche/MoDem/Agir/Radicaux (centru/centru-dritta): Lista di l’anziana ministra di l’affari Aurupei, Nathalie Loiseau, sustinuta da u presidenti Emmanuel Macron, creditata di 23 %. Farà eletti ma ùn sarà micca elettu u Corsu Didier Medori, essendu 48esimu annantu à a lista quand’è 24 % ùn vi offri mai più di 25 eletti.
– Place publique – PS – ND – PRG (centru-manca): Raphaël Glucksmann vedi a so lista creditata da 7%, ùn ci sò micca Corsi in pusizioni elighjibili. Hè sfarenti pà a lista Générations di Benoît Hamon, creditata di u 3 %, incù a prisenza nutevuli di Anne-Marie Luciani, anziana aghjunta di manca à Simon Renucci in Aiacciu.
– A lista di i Verdi (manca), cundotta da Yannick Jadot, creditata di 8 % pò podassi fà cuddà un elettu Corsu in Bruxelles, François Alfonsi essendu 9esimu annantu à a lista.
– A lista France Insoumise, creditata da 7 % di i voti, avarà senza dubbitu un eletta Bunifazzinca, incù a capilista, Manon Aubry. Ci voli à nutà chì trè candidati sò urighjinarii di Bunifaziu annantu à issa lista di manca.
– A lista di Dominique Bourg (Génération écologie) pruponi una candidatura Corsa, quidda di Henri Malosse. Ùn sarà podassi micca elettu, a lista essendu creditata di 1,5%.
– A lista di u PCF, rapprisintata da Ian Brossat, hè creditata di 2,5 % di i voti. Ùn avarà podassi micca eletti, malgradu à a candidatura di Michel Stefani annantu à issa lista.
– A lista Patriotes di Florian Philippot (2%) è quidda di l’UPR François Asselineau (1%) ùn dani micca rapprisintazioni Corsa fin’à a prova di u cuntrariu.
Corsi eletti, ci ne sarani dunqua unu (infatti una) o dui, à u massimu.
Tandu, issi sundami sò naziunali, ùn sò micca rapprisentativi di una tendenza Corsa, induva, à contru-tendenza, u RN pò sbuccà in testa di manera larga è essa seguitatu da LR.
Iss’ultimi ghjorni ci sò stati è ci sarani qualchi picculi visiti cum’è quidda di Delphine Batho (Génération écologie), in Patrimoniu :
Quidda privista di François Xavier Bellamy in San-Giulianu, u sabatu 18 :
Quidda di Agnès Buzyn (LREM) in Bigornu :
O ancu quidda di Thierry Mariani (FN) :
A Corsica ùn hè micca a più prisenti ind’i dibattiti d’issi Aurupei in Francia.
Solu asempiu, a visita generalista (sic!) di a ministra di a saluta, Agnès Buzyn, pà a lista sustinuta da u presidenti Macron (LREM) è di una parti di l’anzianu PRG di Corsica. Hà datu un intarvista induv’edda ricurdaia una generalità:
« Tout le monde bénéficie de l’Europe, même dans les villages reculés […] L’Europe nous protège et nous aide […] Vous pouvez être fiers dans la région Corse, d’être Français et d’être Européens, tout cela se coordonne. » Agnès Buzyn
Ma quali pudaria essa contr’à u fattu chì i Corsi siani Corsi prima, Francesi poi è Aurupei infini?
Hè un’evidenza.
Semi u populu Corsu, hè un fattu.
U populu Corsu faci parti di i populi di Francia – semi francesi – hè un fattu.
I populi di Francia facini parti di i populi Aurupei, ùn si pò nigà à iss’evidenza.
Daretu à l’evidenza, certi parlani di un prugramma chì sbaffa (clivant, NDLR), di un’incuerenza di a dimarchja incù una capilista, Nathalie Loiseau, chì hà fattu parti di una lista di dritta radicali ind’a so ghjuventù accumpagnata da un sicondu di lista eculugistu di manca, chì hà ancu ricusatu di cuddà in un aviò induva c’era un clandestinu in traci d’essa espulsatu. Tamanti sfarenzi!
Incuerenzi podassi piattati daretu à u « Et en même temps » caru à u presidenti Macron.
Quantu tempu tinarà issa formula ?
Di Corsica, ni hè pocu quistioni, à u tal puntu chì – par asempiu – u merri d’Aiacciu ùn si hè ancu prununciatu annantu à u so sustegnu (cf Corse-Matin di u 13 di maghju di u 2019).
« Pinseti à tutta issa ghjenti chì hè morta pà lasciacci un’Auropa, un Mondu di paci. » Jean-Luc Millo, u merri di Livesi ind’u so discorsu di l’8 di maghju di u 2019 à l’uccasioni di a celebrazioni di a fini di a guerra in Auropa (08/05/1945).
Malgradu à u fattu chì a Corsica sia assai sminiticata da l’apparatchik parighjini, una scelta hè da fà.
È vò, trà i 34 listi, chì scelta fareti ?