Fruttu di a mossa di una squadra d’amichi, “I Condottieri” hè un associu criatu quattru anni fà chì s’addunia una volta à u mese da ghjucà tutti inseme è sparte una bella stonda trà di elli. Oghje, a so vulintà hè di fà cunnosce è di demucratizà a pratica di u ghjocu in Aiacciu.
Ghjucà iè ! Ma à chene ?
Quandu si sente “ghjocu” hè difficiule di sceglie. À chì pensa à a Belote, l’unu à a Morra è l’altru à u Monopoly. Ghjè ghjust’appuntu a diversità di tutti sti piaceri maliziosi ch’elli s’impegnanu à prumove I Condottieri.
“U nostru nome, tramanda l’idea chì si pò ghjucà à ogni ghjocu s’è ognunu sparte a listessa passione”
Daveru si pò truvà in issu lucale una varietà di ghjochi tamanta. Ghjochi di tola cum’è u Monopoly, mà dinò carte ch’elle sianu di Rami o di Pokémon.
U locu urganizeghja durante a settimana, seratine incù tematiche pricise è lascia à i so aderenti a pussibilità d’affaccassi quandu hè apartu da ghjucà à ciò ch’elli volenu incù i so amichi. In fondu di u lucale, grazia à u so partinariu Arcade Game, I Condottieri sò arnisati di tarminale d’arcade da rinvivì l’ardore di i nustalgichi di l’anni 80 !
“Arcade Game hè un partinariu strasurdinariu postu ch’ellu hè un’impresa corsa stallata in Aiacciu. Ghjera un dilettu zitellinu di pudè prupone à l’aderenti di strappà si annantu à isse mascine cusì mitiche.”
In tantu issu partinariu ùn hè solu è, I Condottieri t’anu a brama di viaghjà incù cullaburatori lucali. Sarà par asempiu pussibule pà i visitori di cummandà manghjuscula in unu di i risturanti partinarii è prufittà d’offerte speciale.
Tramandà è amparà à i più chjuchi u spiritu è i valori di u ghjocu
“Ciò chì ci hè piaciutu incù st’idea di Condottiero, ghjè chì i mercenarii di tandu eranu capaci di scambià di patrone o d’allianza, ma spartianu valori è un veru codici d’onore.”
I valori sò unu di l’appoghji di l’indiatura di i Condottieri, chì ci hè par un dettu, un anzianu arbitra di ballò in l’associu, attaccatu di sicura à u Fairplay. U ghjocu hè tandu un arnese perfettu d’amparà à i ghjuvanotti à aduprà un cumpurtamentu virtuosu è à accittà a disfatta incù onore.
“Avemu dinò a vulintà di fà capisce à i zitelli ch’ùn ci vole à esse troppu indiatu emuziunalmente in li spassatempi. Annantu à i ghjochi videi in ligna, ci hè assai trash talking è si vede ogni settimana chì annantu à internet ci sò cummunità tossiche. Pruvemu à fà privenzione è à spiecà li ch’ellu ghjè bè d’alluntanassi appena di ciò ch’ellu si pò sente in lu mondu virtuale.”
Un’ andatura assenata, sapendu chì da priparà l’accolta di i più chjuchi, l’associu travaglia incù un’infirmiera puericultrice !
L’uppurtunità sò parechje è l’imaginazione di I Condottieri pare senza cunfine. In più di tuttu ciò ch’elli facenu, pruponenu attelli di pittura annantu à figurini è t’anu a brama d’offre atteli di scrittura da scrive da par sè e sturiette di ghjochi di rolu !
Pudeti ritruvà i prugramma ogni settimana è cuntattà li annantu à a pagina facebook di I Condottieri. I tema di e serate ùn sò mai pari, è u marcuri dopumeziornu hè dedicatu à i zitelli.
Si pò tandu vena à scopre u tempu di una serata sicondu u vulè à u prezzu di 3 euri pà i visitori.
