Pittura llu ghjornu #2, M 82

Titulu : M 82, Wojciech Fangor
Tecnica : Oliu nantu à a tela
Muvimentu : Op Art
Museu : Museu Naziunali in Cracovia

Wojciech Fangor era un pittori pulunesu, designer graficu, artistu d’affissi è scultori. Hè statu u primu artistu di Pulogna chì hà avutu una spusizioni “solo” didicata à lu so travaddu à u Museu Guggenheim di New York. Diventa u riprisitanti di u muvimentu Op art. Ind’u so travaddu, s’hè cuncintratu nantu à i temi di i culori è di a luci : quidda luci, mustralla in u so spettru è in l’effetti crumatichi di a so separazioni, sò divintati l’ubbiettivi principali di Fangor. Hà pruduttu teli cumposti da chjerchji è ondi culuriti. Oghji, i so travagli anu stabilitu record nantu à u marcatu di l’artisti pulunesi.
I transizioni trà i culori sò sfughjenti ; attirani è rispinghjini u spittatori. L’assenza di limiti chjari trà i tinti introduci un sintimu d’inditarminazioni di a forma è di a fusioni lli culori. In l’anelli pinti da Fangor, pudeti veda l’azzioni di a tecnica llu sfumato, praticata è discritta da Leonardo Da Vinci. Wojchiech Fangor hà utilizatu quista tecnica par chì i mezi di sprissioni divintessini l’ubbiettivu di a pittura. U sfumato di Fangor si custruisci intornu à a pinitrazioni è l’inditarminazioni. Incù transizioni dilicati trà lumi è ombri, è a cunfusioni di i cuntorni trà i culori cuntrastanti, l’imaghjini raghjunghjini un spaziu di pinitrazioni visuali.

Fonti : Dailyart

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.