Baptiste Nativi : da u legnu à u strumentu

Ghjè ind’una rimessa di a casa famigliale vicinu à Aiacciu chì Baptiste Nativi hà criatu u so attellu di liutaria dipoi avà un’annu.
“Aghju cumminciatu à crià ghitarre trè anni fà, mà solu pà u piacè, invece chì oghje aghju fattu una furmazione ind’è un liutaghju in Marseglia è sò vultatu in Corsica da cuntinuà à spirimentà”

I so spirimenti, à ellu, sò fatti di legnu, di corde è d’elettrònica : ghitarre elettriche, fatte da manu, dissegnate è imaginate da par ellu.

“A me furmazione fù prima quella di l’arte. Aghju fattu un bascigliè tecnicu in arte è t’aghju dinò una furmazione di rinnuvatore di ghjesgia, un travagliu chè facciu in giru à a Corsica incù u me ziu, quand’ellu ci hè un cantieru.”

È si vede subitu ch’ellu hè un artista : ogni ghitarra hè custruita incù una sgualtrezza è una pricisione trimende. Baptiste sceglie u so legnu apposta, l’essenze ideale par tinghjellu, i micròfoni i più boni : nulla hè lacatu à l’azardu !
“Un possu micca imaginà di fà una ghitarra inciampulata, travagliu incù legni nobili, cù materie raffinate è furnimenti di prima qualità. Ch’ellu sia castagnu o alivu corsu, calipitu rosulu ecc. U legnu, ghjè ellu chì dà a so anima à u strumentu, mi tocca à rispittà lu.”

Da cuì à pocu, Baptiste cumminciarà à vende e so ghitarre à u publicu mà, a farà incù issu stintu artisticu di pruduce sempre un’ughjettu unicu.
“Par avà, ne aghju fattu assai, dà addestrà mi è n’aghju vindutu pocu, l’idea era, da veru, di ammaistrà prima, tutte e tecniche nanzu di crià a me impresa è di cummircializà e me criazione. Oghje, aghju guasgi finitu di mette in ballu un prucedimentu di fabbricazione chì mi parmittarà di fane parechje à tempu.”

Dà cuì à chì Baptiste finisca i so ultimi aghjustamenti, pudette sempre suità lu annantu à u so instagram : @nativiwoods , induv’ellu posta di manera rigulare ritratti è stories di i so prughjetti.
Una bella storia à suità subitu !

Lasciate un cummentu ?

Questo sito usa Akismet per ridurre lo spam. Scopri come i tuoi dati vengono elaborati.