Mickaël Deiana t’hà 31 anni è a voglia di diversificà u sport in Corsica. Sempri una parodda pà fà rida la ghjenti, incù eddu si pò discora di tuttu. Di u mondu, omu à u spiritu apartu, ghjè assai intarassanti di fà si una discussioni incù eddu. Di musica, un veru Jukeboxe! È di sport ben sicuru ma soprattuttu di baseball, Football US è di Hockey, trè sport ch’issu ghjovanu aiaccinu hà praticatu parechji anni.
Tant’anni di pratica chì ani da fà crescia un’idea..una voglia.. quidda di crià a so squadra di baseball, una nova squadra, quidda di fà avanzà a so isula, a Corsica. L’idea di sviluppà un sport scunnisciutu da a nostra Cursichedda. Mickaël ni parla incù u so amicu intimu è incù u so frateddu. I dui so sicuri, ci hè qualcosa à fà è volenu aiutà! Ma pà principià iss’avventura ci hè bisognu di un sponsor…chì u celu ti sintissi! Bruno u frateddu di Mickäel t’hà un cummerciu in Aiacciu è saria unuratu d’essa u sponsor! U Temple Café Concert diventa dunqua u primu sponsor di I Filanci, squadra di baseball. È u sonniu diventa rialità in lu mesi d’Uttobri di u 2018.
Pà u nomi di a squadra Mickaël rifletta incù u so amicu. Un animali saria bè. Imperiali, maestosu, puttenti è prisenti in Corsica, u filanciu vinarà naturalamenti à i dui omi. Pà u logo Mickaël fà un primu abbozzu è scontra un ghjovanu passiunatu chì li faci u logo difinitivu. L’idei li venani ma nisuna decizioni hè pigliata solu da eddu. Ghjè u spiritu di spartera chì conta. Pianpianinu u sonniu avanza. Una prima sirata urganizata à u Temple Café Concert pà vincia soldi è prisintà u prughjettu à la ghjenti. Oghji, 22 parsoni sò scritti in a squadra, da 12 à 40 anni.
« Eru quì quandu Micka principiava à parlà di crià una squadra di baseball, erami à u Temple Café Concert, u sponsor di u club. Mi piacia dighjà chì cunnisciu un pocu u baseball soprattuttu pà via di a cultura ghjapanesa è aviu dighjà praticatu u softball ( una varianti più « simplici » di u baseball) quandu eru ziteddu in vacanza in Savaghju, un beddu ricordu in mimoria mea! Pà u restu ciò chì mi piaci ghjè u scopru umanu, ghjè un’uccasioni schietta d’amusà si trà amichi prufitendu di u benefiziu di u sport, ci un fraiutu pà divintà migliori è semi tutti invisititi in a vita di u nostru club. Issa’energia hè cumunicata da Micka deiana, u nostru coach ma ancu di a squadra sana. Pà l’avveni spergu chì u baseball si sviluparà in Corsica, chì u club crisciarà è chì nò faremi scopra issu sport à più pussibuli, soprattuttu à i ziteddi » ci conta, Mario Giovoni chì faci parta d’issu viaghju dapò u principiu.
Un antru sponsor ch’ùn vò essa cunnusciutu hè statu incantatu da u prughjettu. Si pò accatà u matiriali, i vistiti. A merria d’Aiacciu impresta u tarrenu. Ci pari chì tuttu hè prontu è chì I Filanci sò beddi pronti à amparà è à scumbatta! Un prughjettu di crià una liga corsa di baseball in lu 2019 escia. Si tuttu và bè ci sarà dunqua un campiunatu di Corsica è tutt’a squadra hè felici. 4 mesi è Mickaël ùn si pianta micca. Una prima intervenzioni à l’EREA, incù u prighjettu di turnà. Una incù l’impieghi di u magazenu Decathlon incù un scambiu. Una piccula amparera, piccula dimustrazioni di baseball, un’iniziu contr’à matiriali rigalati da issu magazenu.
Aveti quì l’asempiu propiu magnificu chì fermani ghjovani di stintu di trinca. Micka hè cuntentu di a so squadra, di u seriu mischiatu à un’embiu di gioia è di risa. Quandu li dumandu s’eddu mi pò dà 5 paroddi chì pà eddu riprisentani a squadra, a voci sicura è fiera mi risponda « Amicizia, piacè, spartera, spiritu di squadra è sviluppu ».
Julien Ciavaglini, ghjuvanottu di a squadra ci dici «Socu felici di fà parti di l’aventura. Ghjè un « challenge » di sviluppà issu sport scunnisciutu da u publicu ma incù i strumenti di cumunicazioni chì nò t’avemi: futugrafu, media, è a nostra voci emi da riescia à fà cosi prumittenti. Sta staghjoni hè soprattuttu una di « divertimenti » chì nò scuprimi ghjustu i reguli, i fundamenti è dopu pruvaremi à fà picculi scontri incù l’altri picculi club di Corsica. Aghju pussutu scuprà issu sport incù amichi intimi ciò chì mi parmetta d’avè una cuesioni mentali cullittiva di qualità. Ghjè di sicuru, u fundamentu d’issu sport »
Pà scuprà issu sport incù una prova, è pò essa fà a vostra scrizzioni pudeti chjamà à Mickaël Deiana à u 06.60.58.36.56. A cutisazioni hè di 180 euros pà a staghjoni (visiti cumprati da u club, materiali è guanti impristati, aveti solu bisognu di cumprà i vostri scarpi ma tutti i rinsignamenti vi sarani datti).
A squadra I Filanci fà u so caminu è cum’eddu si dici indè nò « chì pianu và sanu.. » .. A squadra Tempi prega allora à I Filanci, pà cumpià u pruverbiu, d’andà luntanu!