Site à prò o contru à u cambiamentu d’ora ? Preferite l’ora d’estate à quella d’invernu ? Una cunsulta di a populazione permette di dà u vostru parè fin’à u 3 di Marzu nantu à u situ di l’Assemblea Naziunale. ( lea in fine d’articulu )
U cambiamentu d’ora d’uttobre è di marzu hè qualcosa chì si face ogni annu. Ma purtantu u presidente di a cummissione Auropea, Jean Claude Juncker hà annunziatu chì stu cambiamentu devia esse piantatu. Ma ogni paese deve dà un avisu è ùn hè tantu simplice.
Ma da induve vene st’idea di u cambiamentu ?
U fattu di cambià l’ora duie volte à l’annu hè statu decisu à u principiu per fà l’ecunumie. Mentre a prima guerra mundiale, parechji paesi l’anu aduttatu cum’è l’Alemagna u Reame Unitu, a Francia o i Stati Uniti per esempiu, ma per certi ùn hà duratu tantu.
Ghjè dopu à u ‘‘choc‘‘ di u petroliu di 1973 chì u cambiamentu d’ora hè statu messu in piazza. Ma hè una decisione di l’Unione Auropea in 2001 chì hà messu in piazza sti cambiamenti pè l’ultime dumenicate di marzu, per l’ora d’estate, è d’uttobre per quella d’invernu. Oghje, una sessantina di paese facenu stu cambiamentu in u mondu.
Perchè piantà ?
Parechji studii anu mustratu chì ùn era tantu efficace per fà l’ecunumie, cum’elli a dicenu studii di l’Ademe (Agenzia di l’ambiente è di u maneghju di l’energia ), per u lume femu l’ecunumie ma per a scalleria è a climatisazione, sfarenze ùn ci n’hè. Certe parsone dicenu chì u fattu di cambià l’ora duie volte à l’annu ùn face prò à u nostru ritimu di sonnu.
A China in 1991, a Russia è Bielorussia in 2011 è a Turchia in 2016 anu decisu di piantà u cambiamentu d’ora. A cummissione Auropea hà fattu una cunsultazione mentre l’estatina, ci sò stati 4 millione di risposte è anu mustratu chì 84% d’Auropeani anu vutatu per piantà u cambiamentu d’ora.
Per quandu avemu da piantà ?
U prugettu à u principiu dicia chì ‘‘à partesi di u primu d’Aprile di u 2019 i Stati membri ùn cambiaranu più e so ore legale‘‘ è chì ogni Statu ‘‘ devia sceglie nanzu u 27 d’Aprile ‘‘. Ma in pettu à e difficultà, i ministri di i trasporti di l’Unione Auropea si sò adduniti in Austria in fine di mese d’uttobre. U cunsigliu di l’Unione Auropea è u Parlamentu anu prisentatu una mudificazione di a direttiva per spiazzà a fine di u cambiamentu d’ora per 2021.
Dunque ci vole à sceglie.. ora d’estate o d’invernu ?
Hè u prublema maiò perchè a ghjente ùn anu tutti u listessu parè. A cummissione lascia a libartà à i Stati di sceglie ma preferisce ch’elli si mettissini d’accordi, per ch’ell’ùn ci sianu prublemi trà, sopratuttu, i paese chì sò vicini è quelli chì anu cunfine in cumunu. Siente a Cunsulta Auropea, 56% di e parsone anu sceltu l’ora d’estate è 36% quella d’invernu. Certi paese anu digià decisu, Portugallu, Chypre, Pologna, sò per quella d’estate è Finlande è Danemark per quella d’invernu.
In Irlanda u Brexit pone assai prublemi perch’è u Reame Unitu ùn vole micca abbandunà u cambiamentu d’ora chì mettarebbe a puzza trà l’Irlanda è l’Irlanda di u Nordu.
Date u vostru parè ! Andate à Vutà !
Si vota quì : https://questionnaire.assemblee-nationale.fr/785621