U 24 di frivaghju, da 7 ori di mani à 10 ori di sera, 1 470 403 sardi erani chjamati pà vutà à i so cunsiglieri righjunali. Trà di eddi, 53,8 % (790 709) si sò spiazzati, in piena crisa di u latti.
U cuntestu lucali era tesu : certi pastori minacciavani di bluccà i scagni di votu, pà via di i prezzi troppi bassi di u latti di pecura vindutu in Sardegna.
U cuntestu lucali facia chì a manca (PD, SEL, naziunalisti di manca) avia u puteri da 5 anni.
U presidenti surtenti, Francesco Pigliaru (PD, centru-manca), ùn si rapprisintaia micca, lasciendu a sfida à Massimo Zedda (43 anni, merri di manca di Cagliari). Sfida tandu vinta da a cualizioni di centru-dritta guidata da Christian Solinas (42 anni, senatori di a Lega, sicritariu di u Partitu Sardu d’Azzioni, naziunalistu sardu).
U risultatu hè cascatu più di 12 ori dopu à a fini di l’uperazioni di votu pà via di u sistemu di votu strà cumplicatu missu in baddu da l’autorità eletturali.
Vi prisintaremi quì i principali listi di u scrutiniu, fendu attinzioni di dittaglià di manera pricisa i raghjoni d’issi risultati.
I. A mudalità di u votu.
In un primu tempu, prima di fà vutà a ghjenti, i listi di candidati di i circuscrizioni micca prisenti in un cunsigliu regiunali precedenti devini essa firmati da à u minimu 500 parsoni pà i circuscrizioni di menu di 500000 abitanti. A cundizioni era dunqua indirizzata versu à u « Movimento 5 stelle », ch’ùn era micca prisenti in cunsigliu regiunali, ùn avendu pussutu prisintà una lista cinqui anni prima.
U vutanti sardu avia, dopu à a validazioni di i listi, a scelta trà 7 cualizioni pà un votu à un solu giru :
– Christian Solinas (U vincitori di centru-dritta : PSd’AZ, Lega, Forza Italia, Fratelli d’Italia, Fortza Paris, Riformatori Sardi, UDC è 4 altri listi)
– Massimo Zedda (Manca : Partito Democratico, Liberi e Uguali è 6 altri listi di manca).
– Francesco Desogus (Movimento 5 stelle)
– Mauro Pili (Sardista di dritta, ex Forza Italia : Sardi Liberi)
– Paolo Maninchedda (Manca naziunalista : Partito dei Sardi)
– Andrea Murgia (Naziunalistu : Autodeterminatzione)
– Vindice Lecis (Cumunistu : Partito della Rifondazione Comunista – PCI)
I 24 listi sò cumposti da 60 nomi ciascuna, sia 1440 candidati ind’i 8 circuscrizioni :
1/ Cagliari – sud : 20 nomi
2/ Sassari – nord punenti : 12
3/ Nuoro – livanti/centru livanti, Olbia-Tempio – nord punenti/nord livanti, Oristano – punenti : 6 ognuna
4/ Carbonia-Iglesias – sud-punenti : 4
5/ Medio Campidano – sud-punenti : 3
6/ Ogliastra – livanti : 2
7/ 1 hè attribuitu à u candidatu scunfittu à a presidenza.
Hè elettu presidenti di a Sardegna u candidatu maghjuritariu relativu o assulutu in voti dopu à un giru di scrutiniu. 60% di i seghji sò dati à a cualizioni ghjunta in testa avendu ottentutu più di u 40 % di i voti. À u casu cuntrariu, 55% di i seghji s’è a cualizioni utteni trà 25% è 40%, 0 seghji in più s’è a cualizioni in testa ùn ghjunghji micca à 25 % (casu piuttostu imprubabili). Pà avè eletti, una cualizioni devi rializà à u menu 10% di i voti (5% pà i listi sulitarii). À issu sughjettu, un casu stupendu s’era prisintatu in lu 2014 induva Michela Murgia, sardista, avia ottenutu 10,3 % di i voti eppuru…0 elettu. S’è a cualizioni faci, in issa cunfigurazioni privista da a nova legi righjunali, 10%; allora, ùn ci hè micca una parcentuali minima pricisa pà avè seghji.
U ghjornu di u votu, l’alittori sardu avia trè pussibilità di votu :
1/ Pudia dà preferenzi à un candidatu o 2 candidati di generi opposti di a listessa lista di una circuscrizioni eletturali. Ind’u casu induva ùn esprimi micca preferenzi pà 1 o 2 candidati d’una stessa lista è barra simpliciamenti a sigla di u partitu, vota ANCU pà u capilista di cualizioni.
2/ Pudia vutà sulamenti à u presidenti.
3/ Pudia vutà pà una lista scrivendu 1 o 2 candidati di generi opposti di a listessa lista di una circuscrizioni eletturali è barrendu à a sigla di u partitu ma vutà pà un altru capilista.
Mudalità di votu cumplicata, ùn hè?
Dopu ad avè vutatu, mori sardi ani magnatu una « carbonara de iscalzofas » è podassi aspittatu pà sapè i risultati di l’exit poll (sundami).
II. I sundami : senza valori ?
Versu à 10 ori di sera, Rai 3 hà publicatu un sundami dendu a dritta è a manca à tocca tocca.
A lista di u M5S era data in testa, incù parcentuali vicini à quiddi di u PD è di a Lega.
U sundami duranti à a campagna daia anch’eddu u M5S à liveddi alti (>23%). E tandu, ci hè statu un sbaddu maiò.
In fatti, l’istituti di sundami si sò sbaddati.
Pà a serata di u 24 di frivaghju, versu à 10 ori di sera, i dui candidati principali, Solinas è Zedda erani dati à tocca tocca. U primu, di centru-dritta, era datu trà 37 è 41 %, Zedda (Manca) trà 36 è 40 %.
A manca (da a democristiana à quidda cumunista), tandu minuritaria in voti di partiti (- 12 à -14 punti rispettu à u centru-dritta : democristiani, suveranisti è sardisti) avaria pussutu essa salvata da a pupularità di u so capimachja Zedda, incù i sacrusanti voti di preferenza.
U « Movimento 5 stelle », eddu, era datu cum’è primu partitu incù una parcentuali andendu trà 14 à 18 % (PD : 13 à 17 %, Lega : 12 à 16%).
Essa u primu partitu ùn basta micca pà avè una maghjurità, u scrutiniu dendu una prima à i larghi cualizioni >25/40 %.
Pà a so prima participazioni eletturali à i righjunali, u M5S avia prupostu à un candidatu – poi cundannatu – di essa u so capimachja. A scelta finali hè andata versu à un bibliotecariu di Cagliari, scunisciutu. U risultatu finali era luntanu di i 23 % di u sundami pre-eletturali è di u 14-18 di l’exit poll.
Si vedi chì certi capimachja ùn ani micca ricivutu u numaru tutali di preferenzi uguali o superiori à quiddu di a so cualizioni. Par asempiu, u vincitori, Solinas, hà ricivutu menu voti cà a so cualizioni (363 485 vs 365 323), listessa pà Maninchedda di u Partitu di i Sardi (25 474 vs 26 084). Tutti l’altri capimachja ani ricivutu un numaru superiori di preferenzi rispettu à a cualizioni edda stessa : Zedda, pà via di u so arradicamentu di merri di a capitali Cagliari, hà raccoltu 250 355 voti quandu a so cualizioni facia sulamenti 213 131 voti.
Si pò dì chì i 30-33 % raccolti da a manca sò in parti duvuti à a parsunalità di Zedda è à u so arardicamentu, u votu di manca aumentendu assai (+9,1 punti in termini di partiti/+12,3 punti in termini di cualizioni) dapoi à l’alizzioni di a camara è di u senatu di u 2018.
A dritta hà presu una quindicina di punti quand’è u M5S hà persu…più di 31.
Comu si pudaria spiegà a falata di i cinqui steddi è u ritornu di a sfida dritta-manca ?
III. A falata secca di i pentastiddati.
À l’elezioni pulitichi sardi di u 2018, u M5S piddaia pà eddu solu 369 196 voti, sia 42,49 % di u tutali, denduli u dirittu à 11 diputati annantu à 17.
À i righjunali di u 2019, u M5S pidda pà eddu solu 68 636 voti, sia 9,72 % di i voti, 6 seghji/60. Sò esclusi quì i preferenzi.
– 300 160 voti, quand’è i so avversarii ne perdini à u massimu 73 000 (Forza Italia).
Si pudaria dì : « Come mai ? »
Dipoi à u mesi di ghjugnu di u 2018, u M5S, muvimentu anti-partitucraticu, à pro di a demucrazia diretta, guverna l’Italia incù a Lega (partitu di dritta) di Matteo Salvini.
A Lega, pà a so prima prisenza ufficiali è massiccia in Sardegna, s’era alleata à u « Partitu Sardu d’Azione », uttenendu 10,8 % di i voti, eligendu u listessu Solinas è un diputatu Leghista, Guido De Martini. A lega, daretu à u M5S, avia fattu un risultatu tandu impurtanti.
Dipoi, u M5S hà persu credibilità in Italia : hè pocu visibili à a televisoni, lasciendu u spaziu largu à u ministru di l’internu Salvini. Si hè dunqua passatu u fenomenu di u PCF di Marchais chì, in a Francia di a siconda parti di l’anni 1970, vulia spiumà a ghjaddina sucialista. L’inverciu s’hè tandu passatu.
Hè ciò ci pari essa a situazioni quì : a cualizioni guidata da u PSd’AZ è a Lega hà presu u vantaghju nettu annantu à u M5S.
Da un unurevuli 10,8 %, u duo Lega-PSd’AZ hà raccoltu 21,25 % in dui listi (51,71% pà a cualizioni intera) vs 9,7 % di u M5S (11,18 % pà a cualizioni intera).
Ancu i cità amministrati da i 5 steddi vedini i voti spariscia cum’è par magia.
Un asempiu? Posthudorra (Porto Torres), hè una cità presa à a manca in lu 2015 incù 72,74 % di i voti (8458 voti). U muvimentu hà avutu u tempu di gestiscia a cità. Hà raccoltu un bunissimu risultatu à a camara di i diputati un annu fa :
Sta volta, l’alittori ani piuttostu sceltu à a cualizioni di centru-dritta (sopratuttu a Lega è u PsdAZ) :
U M5S, eddu, pidda sulamenti 18,45 %, sia 1 479 voti. Perdi dunqua 6979 voti, 54,59 punti in menu rispettu à i municipali di 5 anni fa.
Una falata secca è brutalissima chì si pò spiegà da l’addisperu di l’abitanti versu à un amministrazioni ch’ùn faci tantu pà eddi. Un articulu di un viaghjatori corsu (l’autori d’issu listessu articulu) parla di manera longa di u cattivu statu di a cità, di i cummerci abbandunati di manera massiccia in una cità fantasma.
U merri americanu ùn pari micca avè purtatu a prusperità dinamica in cità. A sanzioni hè incuntestabili.
Ancu l’altri cità à 5 steddi ùn ani tantu vutati pà Desogus, dendu piuttostu i voti à a manca è à a dritta.
In fatti, sò dui i cumuni à avè piazzatu à u M5S in testa, a cità di Oschiri è u paesi di Lodine.
Sanzioni ancu di i ministri chì vedini i principii di u M5S cunfruntati à a rialità ecunomica è suciali di u paesi. Asempiu simplici : u M5S voli chjoda i cummercii a dumenica, ùn voli micca di u tunnellu Lioni-Turinu (TAV). I leghisti, eddi, sò piuttostu favurevuli à issu tunnellu è sò vuttati da i picculi artigiani è cummercianti, favurevuli à l’apartura di a dumenica.
I dui partiti guvernani dunqua incù pocu intaressi cumuni.
Ci voli ancu à pricisà chì u M5S ùn hà micca arridicamentu pricisu in tarritoriu, essendu natu annantu à u Web è avendu sulamenti qualchi figuri cunnisciuti :
– Un capimachja : Beppe Grillo
– Un capilista : Luigi di Maio
– Una famidda chì gestisci : I Casaleggio
A Lega (Nord), edda, hè arradicata da l’anni 1980 à u Nord di l’Italia, incù eletti famosi cum’è Mario Borghezio, Umberto Bossi (presidenti à vita), Roberto Maroni, Irene Pivetti, Matteo Salvini, Giulia Bongiorno (ex Berlusconiana/Alleanza Nazionale).
In generali, una sciappata à 5 steddi, ci hè stata.
A sciappata hè stata talmenti forti chì u M5S ùn hà vulsutu rendasi ind’è l’animatori d’emissioni pulitichi cum’è Porta a Porta di Bruno Vespa (Rai 1).
U M5S s’hè sulamenti cuntentatu di publicà un articulu.
In fatti, ancu u capimachja di i 5 stelle pà iss’alizzioni, Francesco Desogus, ùn entra in cunsigliu righjunali. A scunfitta hè assai larga, ancu s’è i parsunalità vicini à u M5S dicini ch’edda hè una vittoria, intrendu cusì in un parlamentu righjunali supplementariu.
IV. A ricuddata pà a manca
A manca, divisa in dui campi, piddaia 180 749 voti pà a camara di i diputati di u 4/03/2018, sia 20,80 % di i voti è 2 eletti. Ni pidda 213 131 (30,18%) in lu 2019, o ancu 250 355 (32,93 %) pà l’intera cualizioni è 18 eletti/60.
Una bedda ricuddata in parcentuali, tenendu contu di l’astinsioni (34 % un annu fa, 47 pà iss’alizzioni).
Ancu s’è sò pochi i cumuni induva a manca unita ghjunghji in testa (0 in Gaddura induva a dritta hà raccultu 57,5 % di i voti), u merri di Cagliari pò essa cuntentu di duppià u M5S è francà i 30 %, parcentuali 10 punti sopra à i risultati di u 2018. Ancu s’è a manca perdi a righjoni incù 9,52 punti in menu rispettu à u 2014, hà truvatu un capimachja durevuli è esperimentatu.
Ghjunghjendu in testa in Cagliari incù 44,4% di i voti, a manca hà fattu u « Massimu » ch’edda pudia. Ancu meddu, u PD (Partito Democratico) hè in testa di tutti i partiti prisenti in issu scrutiniu.
95 214 voti, sia 13,68 % è 8 seghji quand’è u sicondu partitu, a Lega, raccogli à 80 101 voti, sia 11,35 % di i voti è 8 seghji.
Perdendu guasgi 55 000 voti è 9 punti rispettu à i righjunali di u 2014, ferma sempri in testa di i voti.
Un miraculu ind’un celu bughju pà a sucial-demucrazia aurupea.
Issu picculu miraculu ùn hà micca bastatu pà Zedda è i so alleati. U risultatu ùn essendu quiddu chì spiraia, una sanna s’hè rotta in Sassari. In fatti, vistu chì a cualizioni di centru-dritta hè ghjunta in testa in issa città piuttostu favurevuli à a manca, u merri PD, Nicola Sanna, hà priferitu lascia a merria à un cummissariu straurdinariu è parta, poi cambià avvisu è ritirà a so demissioni.
In fatti, a partita era di ghjà persa pà a manca, ancu prima di u votu.
Puru, in certi paesi, cum’è Buddusò, a parolla di Sanna ùn hè stata omancu intesa :
Fughjita rispettu à a realità o curaghju ?
V. A vittoria di a dritta : da i scontri publichi à i sciffri lucali.
U trionfu di a cualizioni di centru-dritta è i so 365 000 alittori hè duvuta à l’invidia di cambiamentu di i Sardi ma micca sulamenti.
A campagna di l’amichi di Solinas hè stata mori animata da eletti naziunali cum’è u capimachja di a Lega è ministru di l’Internu, Matteo Salvini.
U ministru leghista di l’agricultura, Gian Marco Centinaio, è l’On.Eugenio Zoffili, cuurdinatori lucali di a Lega, si sò anch’eddi spiazzati tra a ghjenti :
Silvio Berlusconi in parsona o ancu On.Giorgia Meloni (capimachja di Fratelli d’Italia, d’urighjini Sarda) sò vinuti.
Quand’è a manca hà ricusatu di riceva tanti capimachja è i cinqui steddi faciani i riunioni incù Di Maio in picculi ustarii, a dritta ùn si n’hè micca privata.
A cosa a più stupenda pò essa u risultatu di a Lega (Nord), di tradizioni indipendentista Padana, cum’è u dicia u ghjovanissimu diputatu di a Lega Toscana, Edoardo Ziello.
« U travaddu hà funziunatu, ancu incù a crisa di i pastori sardi. Si hè arradicata in un tarritoriu [a Sardegna] induva, qualchi anni fa, era impensabili di sventulà una bandera di Alberto da Giussano [quidda di a Lega]. » Edoardo Ziello
Val’à dì chì a Lega Nord si hè trasfurmata da un partitu secessionistu Nordistu (fighjulà a video à partasi da 10:20) in un partitu naziunali, ancu sensibuli à l’attesi di l’abitanti di u Sud Italia, ch’ùn erani micca stra bè cunsiderati da certi siti vicini à a Lega. Dapoi, Matteo Salvini, ex-partigianu di a “Liberazioni di a Padania” hà dumandatu scusa à u Sud.
U cunstatu di l’On. Ziello hè dunqua parfettamenti quiddu di un cambiamentu di strategia tarrituriali di a Lega, prima partitu naziunalistu Padanu (piaghja di u Pò) è federalistu, poi cunservatori è autonomista talianu.
In fatti, in l’alizzioni di a camara di u 2013, a Lega piddaia sulamenti 1 330 voti in tutta a Sardegna (0,14%), 10,8 % in lu 2018, 11,35 % oghji (è ancu 21,25 % piddendu in contu chì u PsdAZ hè avà alleatu esclusivu di a Lega). Spettaculari cuddata, in parti duvuta à a scunfitta strutturali di Forza Italia.
A cualizioni pidda guasgi 95 000 voti è 16 punti rispettu à l’alizzioni di a camara di u 2018, 66 000 voti è 8 punti rispettu à u 2014 (in cundizioni sfarenti).
Hè dunqua un trionfu pà a Lega ma micca sulamenti.
VI : « Indipendenza sola sperenza ? »
Tutti i media dicini chì a Lega hà vintu in Sardegna. Hè da palisà incù u fattu chì u capimachja d’issa cualizioni, Christian Solinas, hè un Sardista, membru di un partitu seculariu – PSd’AZ – cuginu di quiddu prisenti da u 1922 à u 1927 in Corsica, u Partitu d’Azzioni di Petru Rocca, incù u so ghjurnali « a Muvra ».
U PSd’AZ si rivendica sempri indipendentistu, cum’è pricisani i so statuti :
« Art. 1 – IL PARTITO
Il “Partidu Sardu – Partito Sardo d’Azione” è la libera associazione di coloro che si propongono, attraverso l’azione politica, di affermare la sovranità del popolo sardo sul proprio territorio, e di condurre la Nazione Sarda all’indipendenza. »
Ma si devi pricisà una cosa, u PSd’AZ ùn hè micca u solu partitu di a cualizioni di centru-dritta è un dumandarà micca dumani l’indipendenza di a Sardegna, cum’è i tanti volti ch’eddu s’hè alleatu incù cualizioni di centru-manca o centru-dritta.
Avendu sulamenti 7 à 8 seghji annantu à 60, i soli indipendentisti o sardisti ùn sò micca in pusizioni di dumandà l’indipendenza di a Sardegna, è un la volini mancu appena, in fatti.
Cum’è a dici u novu presidenti elettu :
« U PSdAz era federalistu in lu 1921, autonomista dopu à a siconda guerra è diventa indipendentistu versu à l’anni 1980. Ùn saria micca pensabili, in lu 2019 di usà u listessu discorsu di quiddu di trenta o quarant’anni fa. » Christian Solinas.
Dunqua, a Sardegna hà presu una strada dritta, ma micca quidda di l’indipendenza, quidda di a dritta.
Pà fà un’analisi di i risultati d’issu novu guvernu di a righjoni Sardegna, ci vularà à fighjulà à l’indicatori macro-economichi da quì à 2 o trè anni è sopratuttu quiddi di u disimpiegu, fenomenu impurtantissimu in Sardegna, incù 46,7 % di i 15-24 anni senza impiegu.