A storia d’Asia Bibi, silenziu in Corsica?

Hè libara Asia Bibi, assolta da a corti suprana ‘llu Pakistan hà lasciatu in u sicretu ‘lli più maiò u so paesu par si n’andà à u Canada u 29 di Ghjinnaghju, dopu novi anni passati in u curridori di a morta. L’affari avia presa una piazza assai impurtanta in i discursati intarnaziunali chì a donna era sempri sottumissa à minacci da gruppi riligiosi intigristi, una dumanda d’asili puliticu era ingagiata apressu ‘lla cumunità intarnaziunali. Parò a storia di Asia Bibi, divintata simbuli ‘llu martiriu cristiani, ùn hà guasgi micca ingeritu presi di pusizioni in u dibattitu publicu in Corsica.

Mentri l’ultimi mesa, trè cumunicati di l’AFP (l’Agence française de presse) sò stati sparti da u ghjurnali rigiunali Corse-Matin à pruposittu ‘lla so grazia. Sola una voci pulitica si hè alzata par sustenalla è uppusassi à l’intuleranza riligiosi, Fabiana Giovannini, eletta « Pè a Corsica » avia publicatu à u mesi di Nuvembri una tribuna in u ghjurnali « Arritti ». http://arritti.corsica/edito/accapu/asia-bibi/

Issu silenziu posa parechji intarrugazioni, sapendu chì l’eletti è i reti d’infurmazioni sò stati chjamati à sprimassi nantu à stu sughjettu.

  • Asia Bibi, figura ughjinca di l’upprissioni riligiosi, eccu un riassunti ‘lli fatti :

U 14 di Ghjungnu 2009: Asia Bibi bia l’acqua d’un pozzu è offri un recipienti impiu à trè donni musulmani. Una ‘lli donni si rifusa di bia, a ghjovanna cristiani avaria imbrutattu l’acqua, chì cunsedera a so riligioni « impura ». Asia Bibi si difenda, dicendu chì u prufeti Mahomet ùn saria sicuramenti d’accunsentu incù i so ditti. Una lagna hè posta à u cummissariatu sicondu à a leghja anti-blasfemi ch’esista dipoi 1986. Ogni annu, 300 parsonni, musulmani com’è cristiani sò accusati di blasfemi contru à u prufeti Mahomet. Asia Bibi hè arristata hè missa in prighjò sin’à u so ghjudiziu.

U 8 di nuvembri 2010 ; Hè cundanata à l’impiccatura, ma stu primu prucessu ùn rispitta micca i reguli ghjudiciari, chì l’avucati ‘lla difensa ùn hà micca intarrugatu i testimoni di l’accusazioni. Aspittendu un prucessu novu, Asia Bibi hè mandata una ciconda volta in prigiò. U mollah Yousuf Qureshi voli offra 4500 euroi à quissu chì a tombarà.

U 4 di Ghjenaghju 2011 ; Salman Taseer, guvernori ‘llu Pendjab hè tombu, era u sustegnu principali d’Asia Bibi.

U 16 d’Uttobri 2014; A corti cunfirma a cundanazioni à morta, idda faci un’ultima chjama à a Corti supprana ‘llu Pakistan ch’hà trè anni par renda una dicisioni. In 2015, hè piazzata in isulamenti par a so securità propia, minacciata da l’altri imprighjunati è i so guardiani.
U 12 d’uttrovi 2018 ; U partitu islamistu Tehreek-e-Labbaik Pakistan (TLP) chjama à l’impicatura d’Asia Bibi è minaccia i ghjudici, parechji millai di stremisti manifestani in i cità.
U 31 d’uttrovi 2018 ; Asia Bibi hè assolta, sicondu à i ghjudici, ùn esista alcuna rimarca contru à u Coran, è sbagli di pruciduri sò stati trovi. A l’annunzia ‘lla dicisioni, i manifistazioni ‘llu TLP attrunchjani u paesu sanu ; assediani i vii, brusgiani i vituri è mughjani à l’accidu d’Asia Bibi. U Guvernu lucali ‘llu Sind annunzia prutegà tutti i so minorità riligiosi.
U 2 di Nuvembri : U guvernu pakistanesi trova un pattu incù l’Islamisti, Asia Bibbi, sempri imprighjunata ùn isciurà micca ‘llu paesu nanzi à una rivisioni ‘llu ghjudiziu. U so avucatu, minacciatu di morta fughji u paesu incù a so famidda.
U 8 d’Nuvembri : Hè mandata in aviò versu a capitali Islamabad, u primu ministru pakistanesi s’hè ingagiatu à assicurà a so securità sin’à l’asili puliticu, sicondu à u so avucatu, u Canada saria una distinazioni priviligiata.
29 di Ghjinnaghju 2019 ; Hè stata accolta à u Canada incù a so famidda, in u sicretu.

  • In Corsica si veda un’indifarenza ginirali malgradu i richiesti.

Parò, nant’à i sursella di l’Assemblea di a Ghjuventù corsa una chjama hè stata lampata par avisà l’upinioni publica nant’à u piriculu aspittendu Asia Bibi è a so famidda. U 20 di Nuvembri 2018, i ghjovanni ‘llu gruppu puliticu « Custruimu l’Avvene » hani mandatu un primu cummunicatu di stampa à i rispunsivuli pulitichi corsi (Assemblea di Corsica, diputati) è a i reti d’infurmazioni principali (ghjurnali è radio).
Raminta u cummunicatu chì « dapoi novi anni st’affari hà fattu sgucciulà l’inchjostru, ma sopratuttu u sangui. » I prissioni ‘llu TLP sò tali, chì ùn si la senti più u guvernu di cunfirmà a pena di morta, privista da a leghja par i blasfimatori. Oghji l’inimicizia trà u statu è i riligiosi intigristi ùn sò guasgi più ammaistrati da l’autorità publichi. Com’è u gruppu ammintalu dinò, hè stata intarrugata Theresa May nant’à u casu d’Asia Bibi, a prima ministra hà spigatu chì a migliora suluzioni sari una pruposta d’accoglia isciuta d’un paesu induvi i cunflitta riligiosi ùn sariani micca. Di più, casa cumuna di Parigi, incù a so merra Anne Hidalgo s’hè ditta pronta à offra l’asiliu, prupusizioni acquistata da Jean-Yves Le Drian è Marlène Schiappa.

Solu un urgani d’infurmazioni si hè fattu u ribombu di sta situazioni, a radio RCF hà chjamatu unu ‘lli membri, Jean-François Giffon à l’urigina ‘llu cummunicatu di stampa, iddu spiega chì a storia d’Asia Bibi ùn hè micca un’affari scartata à u Pakistan, parò hè divintata un simbuli ‘lli parsicuzioni riligiosi dopu stu scatinamentu di viulenzi. D’una siconda parti, i ghjovanni dumandani à l’eletti di purtà a voci ‘lla Corsica è di fà intesa un’offerta d’asilu puliticu apressu ‘llu Pakistanu è ‘lla cummunità intarnaziunali. Sicondu à i so paroli « a Corsica pudaria essa stu paesu d’accoglia (…) un’azzioni chì a rendarà à l’alteghja ‘lli so valori d’uspitalità è di cummensalità. »

A u principiu di dicembri, dui chjami telefunichi sò stati scambiati in privatu incù l’eletti, st’ultimi si sò ingagiati cummunicà nant’à u sughjettu, oghji u gruppu aspitta sempri una presa di pusizioni chjara in u quadru ufficiali è publicu, un sicondu cummunicatu mandatu à i stessi urgani pulitichi è d’infurmazioni faci u riassunti ‘lli risposti ricivuti, incitendu quiddi chì raprinsintani l’upinioni à esaminà siriusamenti una prupusizioni d’asilu puliticu. Mentri l’ultima riunioni di l’Assemblea di Corsica, u 29 di Ghjinnaghju u sughjettu ùn hè statu amintatu.

  • Un silenziu longu chì posa parechji quistioni

Primu, ghjè l’andatura di l’Assemblea di a Giuventù chì pari cumprumissa da stu silenziu. Dapoi a criazioni in Ghjungnu 2017, t’hani sprimatu l’eletti, è parechji volti a so vulintà d’insuffià un veru puteri di raprisintazioni à st’urgani puliticu, parò i risposti scarsi à Custruimu l’Avvene parini à essa una mancanza di cunsiderazioni par un sughjettu intarnaziunali ch’hè purtatu da voci ghjuvanni è ingagiati fora ‘lla Corsica.

U cuntrastu hè fortu dinò, quandi si veda a cumunicazioni ch’hè stata fatta da l’eletti mentri l’istati, è ancu oghji intornu ‘lla quistioni ‘lli migranti. Tuttu u mondu si ramenta chì l’esecutivu corsu s’hè purtatu vulintariu à l’accoglia ‘llu bateddu l’Aquarius, in piriculu à u largu ‘lli costi taliani è traspurtendu 629 parsonni. Sta dicisioni era apparsa naturali in sta stonda d’urgenza umanitaria, è quissu nanzi tutta riflissioni di lugistica d’accoglia o di securità. A rispunsivuli di SOS Méditerranée avia datu un’intarvista à France Culture in 2018, denunziava a scunniscenza ghjuridica di l’eletti è sta prupusizioni mandata fora ‘lla legislazioni privista, fatta di più senza l’accordu di l’autorità maritimi ch’ùn sò micca stati cuntattati nanzi.

L’assenza di cunsidarazioni ‘lla Corsica, è di manera più ginirali ‘lli paesi auropei nant’à u sorti infaustu chì tocca i cristiani marturiati, palisa chì si sguassa pocu à pocu a cuscenza di campà nant’à a riva cumuna di u Meditarraniu, civilisazioni ch’hà vistu installassi i cristiani dapoi 2000 anni, è induvi s’assumiddani i paisaghja d’aliveri, di vigni è di cuddetti chì corrini da l’Auropa suttana sin’à a Persa.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.