Ghjillechi gialli : Lagnanza d’un populu ch’hà presu l’abitudine di sprimassi

“Cresce la voce, crepa lu mondu. Trova ribombu è vincerà…”

U piacere di sprimàssi

Dipoi ch’elle si sò affaccate e rete suciale in lu nostru cutidianu, l’omi anu pigliatu un abitudine piacente à spirmàssi sopra tutti i sughjetti, senza alcuna paura, senza nisuna vergogna, senza a minima ritinuta. I prutezziunisti anu perpetuatamente chjamatu à ricusà i furdani è i migranti, i Vegan à piantà u sfrutamentu animale, etc. Mà ciò chì tandu firmava cume cuntrastu di zincu, o cunsiderazione più o menu alculizate di meza notte, oghje si sparte è si stende in l’agurà parsunale ch’ognunu pussede cù li so amichi Facebook, i so seguitori Twitter o quelli di Youtube.

Iss’arnesi, guasgi tutti americani, n’anu tinutu di ste radiche un’idea di a libertà di spressione tutale (fora di a sessualità, bellu tabù in l’aldillà puritanu di l’Atlanticu). Tandu, s’hè pussutu vede sbuccià sia cummunità, sia gruppi di discussione, trolls è tant’altre cose ch’ùn bastaria micca un articulu à analizà. Ciò chì si capisce subitu quandi vò vi scrivite annantu à Facebook par asempiu, ghjè chì si pò dibatte di tuttu, senza fine, senza cumprumessu, sin’à cascà di stanchezza à cinqu’ore di mane. Sin’à chì l’argumenti di l’unu o di l’altru s’imbulicheghjinu è chì tuttu divintessi assai assai nebbiacosu.

Intantu, à a ghjente, l’hè piaciutu issu purtavoce numericu. Elli, ch’eranu cunsumatori d’infurmazione, oghje ne ponu esse le surghjente inarrighjevule, li criatori prulissi. Più impurtante : fora di quelli chì paganu publicità, tutti so pari è, l’adulescenti chì quattru anni fà si filmavanu in le so stanze, oghje anu quant’audienza ch’un ministru o un ghjurnalistu.

Ùn trattaremu micca di u cuntinutu di l’idee chì sò mosse grazia à iss’arnesi ma piuttostu di l’effetu ch’elli t’anu avutu sopra à a sucetà francese. Cume à l’epica di i “Verani Arabi”, u muvimentu di i “ghjillechi gialli” s’hè cuurdunatu sopratuttu annantu à e rete suciale, par via di gruppi Facebook è di filmi video d’anunimi, divintati in pochi ghjorni i fanali di un muvimentu suciale ginerale.

D’induva vene a frustrazione ?

Cume l’emu dighjà detta sopra, omu si sente ascultatu, vistu, intesu da e rilazione ch’ellu t’ha annantu à e rete suciale è, u so parè hè validatu (o micca) da u numaru di spartere è di likes ch’ellu riceve sottu à a so publicazione. Cumu capisce, tandu, chì u Statu, u guvernu, a Ripublica, elli ùn lu stanu micca à sente ?

Ùn hè micca un’azardu sè a prima rivindicazione di i ghjillechi gialli ghjè a messa in ballu d’un Referendum d’Iniziativa Culletiva (RIC)… Sè u mondu sanu i pò ascultà, avà ùn ponu più suppurtà chì ind’u spaziu dimucraticu a Ripublica sia cusì cionca è cusì ceca.

Cum’elli anu trovu, par via di e rete suciale, un sistema di prima trinca da affirmà un upinione, cercanu avà tutti mezzi da esse ascultati da u guvernu. L’ultimi mezzu trovu, so i finanzi participativi. Qualchì ghjornu fà, una video, ind’ellu si vidia un umone vistutu di neru minendu à cazzoti pulizzeri in armatura, hè divintata virale annantu à e rete suciale. È quandi st’omu, u boxer Christophe Dettinger, hè statu arristatu, ci n’hè ch’anu vistu in ellu una razza di cavalieru, di vinditteru, d’eroe è, ci vole à dilla franca, a video hè quante stunante ch’epica. Ciò ch’ellu hà fattu, và di sicuru contru à legge, è purtantu, certi anu vulsutu sustenelu participendu à finanzà par anticipazione i so onorarii d’avucatu.

In rialità, ghjera da veru una mossa di sustegnu è di validazione certa à l’omu è à l’attu. I pulitichi ci anu vistu subitu un attacu à a Ripublica : ben intesu chì iss’opara era pulitica parchì ghjè torna, una manera di fà esce una critica contru à u sistema in ballu è contru à u guvernu.

Ma ciò chì ghjè intarrisante, da veru, ghjè chì subitu subitu, in riazzione, sò stati criati muvimenti di finanzu participativu pà aiutà è sustene i pulizzeri feriti in le manifestazione, stanchi persi ch’elli sò è di più in più infastiditi.

Chivi, si po usservà, bellu chjaru, chì d’issi siti cume Litchee è GoFundMe, a ghjente ne ha fattu un veru modu di sprissione : l’hà parmessu di dà u so avisu, u so puntu di vista è di lighjitimà tal o tal causa. Ghjè in fin’ di contu, un primu palliativu à issu RIC ch’elli bramanu tantu.

Rinditevi contu : arimane a ghjente era pronta à fassi scuzzulà da i CRS da pudè sprimà e so rivindicazione. Oghje, allora ch’ella si dice tassata à buzzeffe da l’impositi, ghjè pronta à pagà da cuntistà a pulitica di u guvernu è u funziunamentu stessu di a Ripublica.

Ghjunta hè l’ora pà l’esecutivu di piglià a misura di u bisognu trimende ch’hà a ghjente di participà à u dibatittu ripublicanu, chì un alizzione tutti i 5 anni di una magiurità è di un prisidente elettu par difettu, ghjè chjaru ch’ùn li basta più.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.