Alegria di Natali

A notti hè cascata è l’aria fresca senti l’alegria. Un picculu ventu accarezza lu so visu. Piccia lu focu in li so ochji. Sta sera passa Babbu Natali. In i stretti di u paesi la ghjenti rientrani in casa. A messa hè compia, femi piazza à a cena. Ci sò lumi è sciaminè, Andria hè cuntentu, sta sera hè Natali. A so mani chjuca è dolci apri a porta di a casuccia. U calori fascia a famiglia è li risi si facini senta. Una minnanna chì pripara è un missiavu chì conta. Chì conta a so zitiddina, i Natali di prima. Chì conta a spartera è a voci di u so babbu mulatteri. L’odori di u caprettu prufuma, babbu gira a pulenta. Mammà metti a tola. « Ùn ci voli à sminticà u me mascettu, u piattu di u puvarettu, tradizioni di i tempi landani in a nostra Cursichedda, pà l’omu infelici ma sempri degnu ». L’amori viaghja è si poni, da una mani di una mamma à una buccedda di un ziteddu. Da l’ochji di una minnanna à i bracci di un missiavu. Da un babbu sirenu è fieru di veda a so famiglia sana. Un embiu festosu badda badda nant’à issa musica alegra. U ripastu hè finitu è Andria hè beddu pienu. « O Missià aiò conta mi ! Una fola, una sola ! ». « Veni u me tisoru, Missiavu t’hà da cuntà, cunnosci a fola di Matteu ? Quiddu chì circava a libertà ? ». Andria posa in bracci di u so babbonu, vicinu à u sciaminè è aspetta smaravigliatu a storia di Zì Mattè ! Sta sera passarà Babbu Natali, quandu Andria durmarà. Lachendu qualchì rigali è una lettera, qualchì parodda di felicità. « Caru Andria eccu i to rigali è un pocu di cicculata. Ti cunnoscu sei bravu, socu chì tù spartarè. Sai o Andrì chì Natali hè amori è a to risa pò scaldà. Un cori solu, un affannatu, quiddu chì campa di puvertà. Ti dicu à prestu o carucciu è fà sempri casu à l’altri. Un ghjornu capisciarè u puteri di a to bravezza. Quidda naturali pà tè ma sminticata da i maiò, Bon Natali o tisò!». Dumani matina, Andria si svigliarà animatu da una gioia tamanta ! Scuprarà i so rigali è issa carta straurdinaria. « A sapiu o Mà ! Babbu Natali hè passatu ! M’hà lacatu rigali, cicculata è sai o mammà, m’hà dettu chì socu bravu ». Iè, l’ochji d’Andria ani da luccicà è sapeti chì à a porta, qualchissia hà da pichjà ! Cascheti bè o puvarettu, chì t’emi latti caldu è un piattu…emi ancu o puvarettu, un pocu di cicculata.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.