IN MIMORIA…

Quattru sculare di u Culleghju Fesch d’Aiacciu anu vintu u cuncorsu naziunale di figurette “Bulles de Mémoire” è so state ricivute in Parighji è Berlinu.

Cirimonia à l’Hôtel National des Invalides in Parighji :

Léa M., Ninon P., Elsa T. è Tessa V., quattru sculare di u Culleghju Fesch in Aiacciu, dopu avè vintu u premiu rigiunale 2018 di u cuncorsu di figurette (B.D) ottinutu in Aiacciu di maghju scorsu pà avè messu in figurette a storia di u Capitanu Nicolai, anu guadantu u premiu naziunale di l’Ordine Naziunale di a Liberazione è so state scelte par andà in Parighji è in Berlinu pà u cintinariu di a fine di a prima guerra mundiale.

Da u 14 à u 19 di nuvembre scorsu, accumpagnate da u so prufissore d’arte plastiche Jean-Laurent Arrighi, e quattru ghjovane artiste corse anu campatu un mumentu eccezziunale di a so scularità.

Prima, u 14, anu ricivutu u so premiu durante una cirimonia sulenne urganizata da l’ONAC in lu pristigiosu Hôtel National des Invalides in Parighji. U 16 di nuvembre, dopu à esse state ricivute, u 15, da l’imbasciatore d’Alimagna in Francia à l’Hotel de Beauharnais, anu pigliatu a strada di Berlinu par participà, incù 500 ghjovani vinuti da u mondu sanu, à e riscontre mundiale « Youth for Peace ».

Riscontra in Berlinu incù i dui prisidenti, u francese è u tedescu :

Chivi, 100 anni dopu à a fine di a prima guerra mundiale, e zitelle corse anu pussutu participà à diversi attelli è fori annantu à a pace da pudè rimette, in fine di sessione, 100 pruposte sopra issu tema à i dui prisidenti di a ripublica Macron è Steinmeier.

E ghjuvanotte so state dinò, in lu quadru di u Volkstrauertag (ghjurnata tedesca di u ricordu), invitate à participà à una cirimonia cummuvente à a famosa prighjone di Plötzensee induve u regime nazi hà fattu tumbà millaie di parsone chì s’uppunianu à u so modu di guvernu tutalitariu. Duie di e sculare di u Culleghju Fesch so state scelte da dipone cù dui sculari tedeschi un mazzulone di fiori bianchi annanta u Mimuriale inalzatu in mimoria di tutte e vittime fatte di a dittatura d’Hitler tra 1933 è 1945.

IMG_2870.jpeg

 

Participazione à a Ghjurnata di u Ricordu à u Bundestag :

Par compie, u 18 di nuvembre, e nostre ghjuvanotte aiaccine so state ricivute à u Bundestag (assemblea naziunale tedesca) induv’elle anu pussutu participà à a Ghjurnata di u Ricordu in prisenza di a Cancilliera A. Merkel è di u Prisidente di a Ripublica francese.

Eccu una bella ricumpensa par u so travagliu storicu è artisticu.

Filicitazione à Léa, Ninon, Elsa è Tessa, e nostre sculare corse è à i so prufissori di u Culleghju Fesch, J-B Torre è J-L Arrighi.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.