Corsicoin : una muneta 100% numerica è corsa

Dipoi à qualchì mese, si vede fiurisce annantu à e rete suciale è à internet  unepoche di publicità pà u Corsicoin chì si prisenta cume una muneta corsa ispirata da a muneta di a ripublica di u 1755. Ma chì ghjè st’affare ? Una cripto-muneta ? Un bitcoin corsu ? È cumu si po aduprà ?

Da capisce ciò ch’ellu hè, ci semu intratinutu incù Guillaume Figlie, capu di a cummunicazione di Corsicoin.

R : Bonghjornu, prima chì ghjè Corsicoin ?

G.F : Salute, ancu sè u nome face assai pinsà à u Bitcoin, Corsicoin ghjè un appiicazione chì sarà messa in linea à u principiu di u 2019. Annantu à l’app, a ghjente mittarà 1€ è avarà tandu un creditu di 1 Corsicoin, valore chì ùn muvarà mai. Cù l’app, si pudarà truvà tutti i cummercianti chì accetanu issa muneta è tandu spende i so Corsicoin quallà inde elli.

Difattu, viaghja cume una muneta lucale, ma chivi, ùn ci hè ne biglietti, ne baiocche.

R : Tandu, di spende i so soldi in Euro o in Corsicoin, chì scambia ?

G.F : Quand’elli accetanu u Corsicoin, i cummercianti si vedenu offre una vera visibilità annantu à l’app è, in ritornu, avaranu a pussibilità d’offre à i so clienti unepoche di prumuzione spiciale riservate à quelli chì utiliseghjanu u Corsicoin. Sè u valore di e duie munete ghjè u listessu, u putere di cumprera crisciarà sè omu paga in Corsicoin.

R : Quantu ci sarà cummerci annantu à a vostra reta ?

G.F : Par avale, ci hè una centinaia di cummercianti chì facenu a scumessa di Corsicoin è di viaghjà à fiancu à noi. A maiò parte si trova, par avà, in giru à Aiacciu postu chì no’ semu tutti di u rughjone aiaccinu (i fundatori Ndar). In tantu, dipoi che no’ avemu cumminciatu à cummunicà, parechji cummercianti ci chjamanu d’altrò in Corsica da fà parte di u prughjettu.

R : Tandu, cripto-munete ùn ci ne hè ?

G.F : Oghje, semu in traccia di finanziàci pà u sviluppu di l’appiicazione. Annantu à u situ di finanziu participativu corsu Move. Quelli chì ci volenu aiutà, ponu mette  soldi quant’ella li pare annantu à u prughjettu. Par esempiu, sè omu mette 200€, à u principiu di l’appiicazione, t’avarà 50 Corsicoins è dinò 200 CSC chì hè una cripto-muneta chè n’avemu sviluppatu à cantu.

Sè u Corsicoin s’arremba annantu à u prezzu di l’euro, u CSC, ellu, fluttueghja da par ellu, sicondu à a dumanda è l’usu. U scopu ghjè ch’ellu sia scambievule in Corsicoin annantu à l’appiicazione, è forse, tandu, crisciarà da par ellu u so valore.

R : Cummunicate assai annantu à l’identità, saria dunque un’attu militante d’aduprà a vostra appiicazione ?

G.R : Ghjè vera chè no cummunichemu assai sopr’à l’identità Corsa è sopratuttu a Ripublica Corsa di u 1755. Di fattu, pruvemu à rende à i Corsi una muneta propria ma a pudaranu aduprà ancu i turisti. Postu ch’ellu ci sarà un listinu di i cummercianti chì l’accetanu, ghjuvarà dinò di guida di e cità.

Certu, Corsicoin ùn hè micca un’indiatura pulitica, eppuru, ghjè sicuru ch’ellu hè un attu militante ecunomicu postu chì sti soldi un si ponu spende cà nantu à l’isula. Ogni parsona chì vurrà cunsumà in Corsica incù l’appiicazione farà una scelta à prò di l’ecunumia cirnese.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.