This is my land : l’educazione in Palestina è in Israel

Isciutu in u 2014, This is my land hè un ducumentariu realizatu da Tamara Erde, una rializatrice israeliana. L’artista, nata in Tel Aviv in u 1982, hà sceltu di campà in Parigi è tandu l’alluntanamentu di u so sguardu l’avarà aiutata à pinsà u so paese di manera di più ubbiettiva. U scopu di This is my land hè di studià u cunflittu israelo-palestinese intorna à un tema : l’educazione data à i zitelli di e duie parte.

Custruiscesi di pettu à l’Altru, custruiscesi cù l’Altru

A dice à l’iniziu di u filmu, Tamara Erde hà rimessu in causa l’educazione ch’ella hà ricivutu à a scola è ind’ a sucietà israeliana. S’hè avvista di l’orientazione di i sapè dati à i sculari è di a mitificazione di a storia israeliana. Pà avè una analisa più precisa di ‘ssi fatti, hà sceltu d’intarrugà è di filmà prufessori è zitelli sfarenti : da una scola publica palestinese à una scola publica riligiosa ind’ a culunia israeliana d’Itamar, passendu da una scola mischiata, micca guvernativa, vole offre u panorama di i punti di vista chì si danu di pettu in Palestina è in Israel.

Una parolla si ritrova sempre, di manera chjara o sottintesa, strutturendu i dui discorsi : l’Altru. Ch’ella sia pà i Palestinesi o pà l’Israeliani, l’insignamentu si gira versu quellu chì raprisenta un nemicu, un amicu o ghjustu una sfarenza, sia fisicamente o ideologicamente.
Ind’è issu ducumentariu, sò pochi l’esempii d’addunita è di cullaburazione, ancu s’elli esistenu, colpa di a viulenzia di u cunflittu, di l’espansionisimu siunistu è di a resistenza araba. Una prufissore palestinesa di a scola mischiata, Aiashe-Khatib, sprima a so vulintà di raccogliesi pà « amparà à cunnosce à l’Altru è guardà l’avvene inseme ». Puru, a dice franca : ùn hè cambiatu nulla dapoi 40 anni è ùn hè micca uttimista, chì in la so scola t’hà dificultà à stà zitta di pettu à certe dichjarazione di u prufissore ghjudeiu incù u quale travaglia tutti i ghjorni è intrattene rilazione bone.
Ci sò dinò l’esempii di scole più radicale, induva l’Altru ferma un nemicu. Mentre a visita di un munumentu murtoriu, un zitellu di a culunia ghjudeia d’Itamar grida « I Ghjudei in Paradisu, l’altri in infernu » è u so prufissore ùn u litica micca, pigliendu a so parolle cum’è una burla. D’altronde, l’idea d’una superiurità di l’Abrei hè spressa guasgi di manera sistematica da u guvernu israelianu è si ritrova ind’ i manuali sculari.

U Ministeru Israelianu di l’Educazione cuntrulleghja tutti i libri è i maestri di scola, ch’ella sia in Israel o in Palestina. A u principiu di u ducumentariu, si vede à Tamara Erde chjamendu à un prufissore palestinese pà filmallu : ùn sarà mai intarrugatu, u Ministeru li hà ricusatu u drittu di parlà colpa di a so orientazione pulitica. Cusì, u Ministeru ammaestra u prugramma di storia, chì ùn lascia nisuna piazza à a Palestina, fora di u so statutu d’uppunente : inde tutti i manuali ufficiali, ùn ci hè cà una maghjina sola di una zitella palestinesa è u so populu, quand’ellu hè raprisintatu, hè caricaturatu di manera razzista. In quantu à i libri annant’à a storia palestinesa, so censurati da u Statu parchè sò l’appughjatoghju di un contra putere intelletuale pussibule. Vae victis, cù l’autorità di u Statu siunistu sopra à l’educazione, a Palestina è a so ghjente so sguassati, diventanu un tabù chì ùn ghjova più cà a legitimisazione di l’espansiunisimu.

« Chì vole dì « cunflittu » ? »: parechji discorsi è realità diverse

This is my land mostra a cunfruntazione trà dui discorsi chì ùn s’accordanu micca, è puru raprisentanu duie realità, ben ch’elle ùn sianu nantu à u stessu pianu : s’opponenu una realità cuncreta, di a tarra è di u campà, è quella più simbolica di a riligione è di a pulitica. Ind’ un spaziu induva a viulenzia armata è urganizata face vittime guasgi tutti i ghjorni, l’educazione ufficiale piatta l’ochji di i zitelli è l’impedisce di vede i fatti di manera ubbiettiva. Sò prudutte parechje realità contradittorie. Versu a fine di u ducumentariu, diu zitelli sò filmati, unu ind’una scola palestinesa, l’altru in Israel. U primu ci conta a morte di a so mamma, tomba ind’ i so bracci da un suldatu israelianu. U sicondu, à Tamara Erde, li dumanda u sensu di a parolla « cunflittu ». I libri parlanu di a storia cum’è una successione di macelli è di persiguizione, micca cum’è un cunflittu o una guerra, postu chì l’Altru hè statu guasgi sguassatu da a storia. A realità ubbiettiva, chì tuttu ognunu pò percepisce senza sustene un puntu di vista o l’altru, hè nigata. Basta à pichjà « espansione d’Israel » nantu à Internet pà vede a prugressione di e culunie annantu à u tarritoriu palestinese. Puru, un scularu israelianu pensa chì « da quì à 20 anni, u paese ùn sarà appaciatu l’Arabi saranu più numarosi cà noi è pigliaranu tutte e terre ». Ind’ a scola mischiata, si ritrova u stessu prublema ingiru à u statutu di a lingua araba : lingua ufficiale, ùn hè micca parlata da i Ghjudei ma tutti i Palestinesi anu amparatu l’abreu.

Trà strumentalisazione è ghjustificazione : a ricerca di legitimità di u Statu israelianu

È puru, inde ‘ssu ducumentariu, si capisce chì l’arabu hè un arnese di u Statu israelianu. Participeghja di a strumentalisazione di i zitelli da u Statu, chì intrattene una cultura di l’armata è di u putere. Un zitellu chì parla l’arabu hè un zitellu chì pò entre ind’i servizii di rinsignamentu è empie u so duvere. U prublema di a securità hè centrale ind’è e scole israeliane è parmette d’auturizà a viulenza contru à l’Altru. Sicondu à Nurit Peled Elhanan, prufissore à l’università ebraica di Jerusalem è militante pacifista israeliana, ùn hè cà un elementu di a logica di ghjusitificazione di l’ideulugia sionista è di l’espansiunisimu è u Statu utilizeghja a viulenza subita da l’Abrei mentre a Shoah pà dassi una legitimità. L’educazione ripruduce a ferita di a Shoah, à traversu l’amparera è e cummemorazione, invece di custruisce annantu à ella. Par ella, a mimoria hè un elementu chì contribuisce à fa nasce a viulenza ind’è i sionisti. U populu israelianu essendu un populu vittimu, ùn pudaria micca esse boia è tombaria solu pà difende a so securità.

Tandu a Shoah è a riligione sarianu i mezi di dà una legitimità à a viulenza sionista indrentu à l’educazione di i zitelli ghjudei, amparenduli ch’elli anu u duvere di ripiglià è di difende a terra chì li hè stata rubatta, ciò chì ghjustificheghja l’usu di a viulenza.

Eccu u travagliu d’analisa di Tamara Erde, chì parmette di stacchittà l’impurtanza tremenda di l’educazione ind’ u rinculu di a pace in stu rughjone di u mondu… è forse ancu di fà nasce cuntrasti di filusuffia murale ingiru à l’idea di mimoria.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.