Da a pittura à u ritrattu revoluziunariu, u circulu di a storia.

Dui settimani fà, una fotografia simbolica di a guerra trà u Statu d’Israël è a Palestina hè stata publicata nant’à i reti suciali. Dapoi, pudeti vede ch’ella hà fattu un rombu tamantu.

Stu ritrattu hè statu presu u 22 d’Uttrovi di u 2018. U fotografu, Mustafa Hassouna travagliendu per l’agenza turca Anadolu hè quellu ch’hà immurtalizatu issa stonda guasgi storica. Vidimu un abitante di Gaza, chjamatu Ahmed Abou Amro. U ghjuvanottu participeghja à una manifestazione in Beit Lahiva contru à a restrizzione di u spaziu marinu di pesca à u largu di i costi di Gaza.

U so pettu hè scupertu, forse ch’ellu hà cacciatu u so t-shirt in a caldura di u fumu, di a so manu dritta, alza incù fierezza a bandera palestiniana,  una sfrombula in l’altra manu, arma simbolica di i manifestanti palestiniani dapoi u principiu di i cumbatti in l’anni 1980.

Subitu, issa imaghjina hè diventata virale, spartuta parechje millaie di volte à nantu à i reti suciali. A so celebrità vene di stu paragonu intrigante incù a pittura famosa di Eugène Delcroix  « La Liberté guidant le peuple » issa assumiglianza hè stata truvata da l’internauti, incù st’opara iconica di a revoluzioni francesa duranti i trè gluriose di 1830.

Com’è a donna di a tela, u ghjuvanottu di Gaza, palisatu da stu ritrattu hà presu una diminsione allegorica di a libertà in u so paese chì lotta dapoi anni è anni contru à i riprissioni è a culunisazione di u Statu d’Israël.

Condivisa da l’agenza di fotografia internaziunale Getty image, u ritrattu scatena e passione nant’à i reti, dopu chì Laleh Khalili prufissora in scienza pulitica à l’Università di Londra l’avia spartuta u 23 d’uttrovu, u lindumani di a so cattura. Dapoi u so primu spartu u ritrattu hà avutu più di 46 000 « retweets » à nantu à u reti suciali Twitter.

U canali di televisiò Al-Jazeera si n’hè andatu à intervistà u ghjuvanottu Ahmed Abu Amro, 20 anni. « Socu statu surpresu chì sta fotografia diventessi virale » hà dettu tandu à u canali.

Issu ritrattu allegoricu è guasgi iconicu per u populu palestinianu palesa bè dinù a situazione critica di i cunflitti guerrieri in Gaza, chì sò diventati u cutidianu di l’abitanti. Forsa issa fotografia hà da entre in a storia di u paese.

 

Un articulu di Lucia Salasca

Lasciate un cummentu ?

This site uses Akismet to reduce spam. Learn how your comment data is processed.