È più precisamenti à u TCC (Temple Café Concert). Un cantatori famosu ci canta “La vie c’est plus marrant, c’est moins désespérant en chantant”. Ma chì verità! A vita hè un pò menu pisanti, un pò più bedda cantendu. A musica ghjè pà contu meu una terapia. Una manera di fà baddà l’anima, di surrida o ancu di pienghja, una manera di traduccia l’emuzioni. Mi hà sempri piaciuta di pudè ascultà musica “live” è ancu sè qualchì lochi asistani, sò ci voli à ricunnoscialu..pochi! Aghju truvatu qualchì anni fà u me paradisu in Aiacciu. U Temple Café Concert. Vicinu à u liceu Letizia issu lochu, suventi scunnisciutu o certi volti ghjudicatu mali pà via di a populazioni ughjinca di liceani. A sera issu locu ci prupona sirati dedicati à a musica, à l’arti musicali induva ùn si ritrova micca u cuntestu liceanu. U ghjovi da sera par asempiu, ogni ghjovi, si passani i Jam Session…
Yann Leborgne è Bruno Deiana (patronu di u TCC)
Và bè ma cosa hè una Jam Session?
Ùn cunnisciti micca? Una Jam Session hè ciò ch’eddi chjamani i francesi un “boeuf musical” in fattu hè una sissioni d’impruvisazioni musicali. “Jam Session” in inglesu, “boeuf” in francesu è in corsu? Bah! ùn la socu! Pò essa saria amusanti di truvà una parodda..boiu? “Trà lu boiu è lu sumeru …” Ok ghjè vera chì i derivi ùn sò sani ahahah ripigliemi! Dunqua.. a parodda “jam” era in ghjinirali utilizata pà u Jazz, blues.. Oghji si parla solu di musica. Cuncretamenti, u ghjovi da sera, aveti una scena a dispusizioni incù strumenti. Piano, ghitarra elettrica è ghitarra folk, batteria, bassa sò prisenti à u TCC ma pudeti ancu purtà i vostri. Una scena aparta pà i musicanti è i cantatori, amatori o prufessiunali, chì vò vi cunnisciti o micca. Mentri qualchì mesi eru in cariga di l’urganisazioni di a prugrammazioni di i sirati à u TCC. U ghjovi era di sicuru u me ghjornu prifiritu. Aghju vistu travagliendu culà cosi magnifichi. Aghju scuntratu parsoni maravigliosi, luminosi, bravi è talentuosi. Certi sò ghjunti soli, senza cunnoscia à nimu in u bar è pà via di i Jam sò divintati amichi incù l’altri è anu ancu furmatu gruppi di musica!
Parechji strumenti à dispusizioni di u publicu, amatori o prufessiunali
Casca bè chì oghji semi ghjovi!
Ùn aghju micca pricisatu chì ùn ci hè bisognu à vulè o sapè sunnà di un strumenti pà andà à una jam. Pudeti andà pà ascultà, pà baddà, pà bia un colpu trà amichi… eiu socu sempri stata innamurata di a musica è sopratuttu di a ghitarra ma ùn sapiu micca sunnà. Ùn aviu mai tuccatu una ghitarra di a me vita a prima volta ch’eddu socu andata à una d’issi sirati, 5 anni fà. Un annu à ascultà quiddi chì sò divintati i me amichi, à ascultà ghjenti novi, strumenti novi è à 27 anni mi compru a me prima ghitarra. Viditi u puteri di a musica? è ciò chì un locu o una festa pò fà? A musica pò appacià, pò alligà u cori, pò accarizzà, pò fà viaghjà o à u cuntrariu arradicà, pò purtà gioia è surrisi. Viditi, quissu ghjè u veru puteri. Cum’eddu dicia u nostru famosu Aznavour “You are the one for me, for me, for me, formidable, You are my love very, very, very, véritable”.. Iè cara musica sei furmidevuli è vera, sei universali è sei festighjata ogni ghjovi à u TCC è ogni ghjornu nant’à a tarra!
Allora à sta sera?! 😉
Temple Café Concert, 2 avenue de la grande armée, Aiacciu- Tel 06.18.47.39.02