A trinità ‘ll’itarnità – Blù I, II, III

Tinsioni interna. A pedda lacerata, l’urgani, u sangu. U sangu neru, di fami, di seti, di frebba intarrugativa.

Una tela bianca.

Biancu spurgulatu, biotu di sensu. Mancani a vulintà di parodda ed a so missa in piazza. A so sprissioni piattata, rivilata à l’ochju nascosu ‘lla so angoscia parsunali, quidda ‘ll’inguerna nibbiascosi ‘lli casedda di petra è di linea. Sopr’à no u celu, spechju immensu chì sfalaia in l’urizonti appena archighjatu. Un celu chì divintarà un beddu turchinu, pur’è lisciu. Avà chì semi ind’una notti itarnali pidda tintu d’un blù prufondu, di luminosità par qualchì locu chì si ramenta sempri à la so notti ; un’inciartezza spalancata. Una parodda. Lampu ‘ssa foglia. Sterpu i linj, lacireghju a tela. Angoscia. U mo ciarbeddu hè prontu a schjattà. U sangu batti à i mo funtaneddi. Aghju l’ochju rossu è sempri a fami, a stanchezza di ‘ll’anni danò. U muru, muru hè tela, comu celu, comu visu tralasciatu, u muru si ricupreghja di culori ambiziosi. Vecu i guanci magri, pinti di biancu, una traccia longa è isitanti. Accindeghju u lumu. Dispongu l’arnesi. Ùn importa micca a forma, a matirialità ‘ll’ughjettu ma u so ubbiittivu sinsuali, carnali ind’u so essaru.
Quantu ghjorna dura ? Ch’iddu a sà sciddissi in fini un spaziu di sprissioni, pinsaia, pinsiaiu di sapè. Sapè a natura è u celu. Sapè a vadina chì corra è i casedda chì si duppiani ind’u mari. Sapiu ? Sapiu l’illusioni, è par avanzà ci voli à strughja la. Strughja l’illusioni è a rialtà. U riali è u sognu. Pà riducia tuttu in un puntu. Un puntu chì sarà un soli. Una linea l’aceddu.

Ottu soli neri.

A tascia a più dèbbuli hè lampata. Si mischia è si sparghji. Discorra è istarminà. A cuscenza ‘ll’isarciziu pueticu è l’incuscenza ‘lla spirienza praticata, ‘ll’abitudini si sprufondani. Voddu tumbà a pintura. Tumbà l’arti, u fattu rilighjosu è mitafisicu ‘lla parodda è a linea di culori. Firmarà u chjassu luminosu, i viottuli di sangu ; t’hè vinuta un’arsura prufonda d’assulutu. Fora, u bagnu eternu ‘lla pulvara di lumu s’opponi à l’asistenza ‘lla notti. Acqua è calcina. Un dittu bruttu nantu à biancori, ùn òpara d’alba è di feda.
Codda à tinsioni. Ti docu a manu è lu mo ciarbeddu trapanatu. Ti docu l’anima è mettu à mo pedda nantu à tavula. Ghjè quissu l’arti, sarà quissu u fattu di pruducia ; metta a so pedda nantu à a tavula, apra lu so corpu à iddu stessu, lascià corra u sangu spuzzatu, imbruttatu di mudarnità.
Battu, forti, più forti, unu, dui, ottu, è ottu punti di carbonu, di bilia, d’acrimunia sularia.

Ùn hè ancu frustu u soffiu di vita. È forsa chì i soli neri sarani altrettanti cori pà fà rinviviscia a salma pulvarosa.
Par avali s’apri è s’allarga torna, è cù forza, a ferita sanguinosa. I spiranzi di quinci, a tarra chì tù piddi ind’i to ditti fini, a parodda turchina è una tela d’uceanu. L’urizonti trimulenti travarsendulu. In l’uceanu cilestu vogani i soli.

Alineamenti. Ferita rossa. Senza cunfini.

Lotta. Lottu par ch’ùn murissi a fiamma di spiranza, l’urizonti chì riteni a piaca. Un’ulcerazioni chì ci dici ch’ùn cunniscimi micca i cunfini ‘llu mondu è ‘llu spiritu, ch’ùn si pò imaginà l’infinitu. Eppuru. Eppuru ti hà lampatu nentru, ind’una misura – a parodda u colpu di pinneddu – chì tu cunnosci comu fattu, simbolu o spirianza, avà n’ai da fà l’isarciziu. L’isarciziu ‘llu ritmu ‘lla culori. È lampu issa parodda in linj ed in punti rotondi, da soli neri à lacrimi gucciulanti ricuparti di sangu. Provu di cambià : u ritmu, a tecnica, u mo soffiu. Firma sempri u blù, inalterabili, cupartu quinci è quallandi di ciò ch’eiu socu, blù dapartuttu par ciò ch’iddu hè di tarribuli è d’intucchevuli, intucchevuli parchì tarribuli. Tarribuli hè ditta, spavintevuli. Sò spittatori d’una criazioni ch’aghju cridutu fà, facciu a spirianza ‘llu mo propiu isarciziu. Una nota, hà da essa quissu l’opara. Aghju macinatu è ai circatu ancu tù u caminu ‘lla rialtà. Quantu fubbi longu ‘ssu caminu, sott’à u soli è a pioghja, senza mai aggrundassi. Pedda nantu à a tavula.
Una piccula porta, u frontonu mezu sguassatu, è poi una fresca. Di rossu. A fresca ‘lla fami, danò quidda ‘lli me sogna. Una fresca di tarra, un muvimentu. U muvimentu. U muvimentu sarà l’ultima messa chì daraghju.

Muvimentu. Altura, è po’…?

A vadina di sangu hè francata. I soli neri si sò spenti ed in un muvimentu di rabbia, di frebba ghjunta da i fonda bughjcosi vischjosi ‘ll’acqua avilinata, aghju rimessu u turchinu. Aghju abandunatu sì. U blù astrali, un passu ver di l’umanità, parchì l’umanità vera hè quidda ‘llu nudda. ‘lla paci d’un mari lisciu, d’una foglia chì brusgiachjò ind’a culori ‘llu licenzu, ind’u murmuru dubbitosu ‘llu tempo. Senti ? U batticori chì ci porta, è forsa par l’ultima volta ch’avà forza ùn ci n’hè più. È quandu si basterà ? Si chjudarani l’ochja, l’ultima nota – u pizzicato – hè stata ghjucata. Una linea lasciata, a tistimunianza ch’avemi isistatu, una lacrima di sangu, ‘lli nosci strazzi, è i soli chì si sò uniti, pà furmà un circulu di tristezza, forsa d’alligirata. Aghju parsu ‘ssu cumbattu è l’aghju vintu. Casca prestu st’ultimu ghjornu, è sarà tempu di siparassi… Sarà l’ultima parodda, u muvimentu anch’iddu s’hè arristatu in una gocciula suspesa, un filu d’orizonti è di paci, s’alza pianu pianu a notti, spampidduleghja a luna rossa, si ne và u soli ‘lla me vita, l’ispirazioni moribonda lascia a so piazza, c’hè una notti itarnali, u blù sidarali chì s’offri à i to ochja, a mort’in figura hè u puntu finali ‘ll’opara.

Lasciate un cummentu ?

This site uses Akismet to reduce spam. Learn how your comment data is processed.