A muntagna d’oru : furtuna o dannazione pà a Guyana ?

Ghjera un puntu sinsibile trà Nicolas Hulot chì era contru à u prughjettu è Emmanuel Macron chì era à prò di quessu. A muntagna d’oru, nomme incantevule hè un prughjettu minieru spripusitatu in Guyana vistu dà u prisidente cume un’uppurtunità ecunomica pà u rughjone. Eppuru, sò parechji l’associi di diffesa di l’ambiente à battesi contr’a issu prughjettu ch’elli cunsidareghjanu cume assai piriculosu pà a natura.

U prughjettu

Tal chì prupostu annantu à u prughjettu, a muntagne d’oru duvaria esse custruita da u 2019 sin’à u 2022 pà esse sfruttata durante 12 anni. A stimazione di e cumpagnie miniere privede una scavazzione di 7 tunnali à l’annu, sia 85 tunnali in tutalità.

Mà issa muntagna ùn sarà ne cusì alta, ne tantu fatta d’oru. Sarà piutostu un tafone tamantu di 4,5 chilometri di longu, 400 metri di largu è sin’à 220m di prufundezza.

Impattu eculogicu :

Da fà issu cavone, ci vularà à sradicà 8 chilometri di furesta primaria, ciò chì raprisenta 8 stadii di football, mittendu in periculu u bistiame lucale. Dà caccià tuttu st’oru, a mina cunsumarà :

  • 8,5% di a cunsumazione elettrica di a Guyana
  • 142 millioni di litri di pitoliu
  • 140 000 L d’acqua à l’ora

Mà ciò chì spaventa u più l’associi di diffesa di l’ambiente, ghjè u modu di sfruttamentu di a minera. Di fattu, impiicarà un prucessu di cavatura à u cianuru, famosu per esse un vilenu putentissimu. I pozzi di ritensione sò supposti esse ermetichi, mà, l’associi t’anu a paura chì, in issa zona trupicale incù tante piuvite, tarreni fangosi è instabili, issi pozzi si rompissinu lasciendu corre fangaccie tossiche capace à tumbà tutta a biudiversità annantu à chilometri è chilometri.

Accidenti cume quessi ùn sò solu spiculazzione, è si n’hè dighjà pruduttu cume in Rumania in lu 2000 è in Brasile in lu 2015. Una catastrofa naturale d’issu generu faria tantu disguastu, moltu più chì u locu di a futura muntagna d’oru si trova à fiancu à duie riserve biulogiche fragile è priziose.

Daa u so cantu, l’imprese incarricate di u sfruttamentu, assicureghjanu chì e stallazzione saranu in cunfurmità incù è regule di sicurità è più ottime, è chì parechji millioni d’euri saranu didicati à u risarcimentu di u locu duranti 30 anni.

Impattu ecunomicu : uppurtunità o burlamondu ?

Da lighjitimà issu prughjettu, Emanuel Macron hà mintuvatu u livellu di disimpiegu in Guyana, chì cuncerna 1/4 di a pupulazione. U prughjettu duvaria crià 750 impieghi diretti è 3 000 impieghi indiretti.

Mà una volta di più, l’associi chjamanu à l’astutezza, cuntrastendu chì, à a fine di u prughjettu in lu 2032, issi impieghi sparisciaranu cum’e elli so ghjunti.

Listessu affaru pà u pruduttu ecunomicu d’issa sfruttazione. Sicondu à WWF, e stimazione di e sucietà chì supraneghjanu u prughjettu sò troppu uttimiste, appughjendusi annantu à un corsu di l’oru assai altu è stabile. Ciò chì ùn s’incalca, ben intesu, micca annantu à a rialità. I corsi di l’oru si so mossi assai duranti l’anni passati è eranu parechje volte, sottu à u corsu indicatu da e firme stesse.

A chjama di l’associi

Sè issu prughjettu pare cusì lucrativu, ghjè parchì s’arremba annantu à una pulitica di sfiscalisazione messa in ballu da u statu da favurisà l’invistimentu in Guyana è chjamanu tandu l’autorità publiche à investì in attività durabile è di più rispittose di l’ambiente.

Lasciate un cummentu ?

This site uses Akismet to reduce spam. Learn how your comment data is processed.