Quilapayún in Guagnu u 4 d’Aostu

Accumpagnatu da u gruppu lucale A Primavera, i mitichi Quilapayún sunaranu u quattru d’Aostu in Guagnu, invitatu in lu so paese da l’associu Ricordu di Circinellu. Cullate à iss’evenimentu unicu in li Dui Sorru.

Un gruppu miticu

Criatu in lu 1965 à u Chili, u gruppu Quilapayún diventa subitu un gruppone di a scena Chilena. Impastati da e prublematiche suciale di l’epica, sustenenu di  manera logica Salvadore Allende durante a so campagna prisidenziale è sò numinati « imbasciadori culturali di u Chili » dopu a so alizzione.

Cummencianu tandu un giru in Europa da fà cunosce issa cultura d’America Suttana. Di sfurtuna, à u mumentu di vultà in lu so paese, accade un colpu di statu instigatu da u gineral Pinochet, chì mette in ballu una dittatura. A partesi da chivi, Quilapayún in esiliu, diventa un simbulu di lotta contra l’oppresione, purtendu e valore di u populu, di a so brama culletiva è ben intesu di u sucialisimu.

Riintrati à u Chili in lu 1988, avaranu sin’à chivi viaghjatu è tramandatu a so musica in l’auropa sana, ispirendu i gruppi Corsi di u riacquistu cum’è Canta u Populu Corsu è I Chjami Aghjalesi. Sempre avà, quandi omu stà à sente qualchi canzona oghjincha li si pare di sente, par un dettu, ritmi d’ispirazione sud’americani eritati da u flamencu.

A Primavera, a scelta di a musica sud’americana in lingua Corsa

Quandu ghjungu in la Balisaccia, ci hè pocu mondu. Da u fondu di u caffè, sentu duie voce chì s’alzanu. Sò quelle di Larenza Felici è di Anthony Battesti chì travaglianu è chi si mischianu in armunia. « Di sambucucciu Paoli è Sampieru » è finisce a canzona Circinellu di I Voci di a Gravona. Siatene sicur, u stintu è l’estru guagnese hà tuccatu à a Primavera. Accantu, si parla appena di Victor Jara è capiscu subitu chì issi dui mondi, a Primavera l’amaistreghjanu strabè, ch’elli ne sò impastati da veru.

Cuntrastendu appena incù Mathieu Casanova, ampargu chì a Primavera hè un prughjettu anzianu chì s’hè rinvivitu dui anni fà incù una squadra nova ma sempre issu stintu di fà una musica chì i trasporta. In giru à a tola, u numaru di strumenti hè scemu. Ricunoscu ben intesu e duie ghitare, u viulinu, a bassa elettrica appena a Samponia è dopu… Mi faciu spiicà so chì ci hè chivi è cullà : un quattro venezolano, una ciarande, un bombo è una quena.

Difattu, s’ispiranu sopratuttu di a cultura chilena è di l’Ande, ma u Chili ghjè un paese longu longu, chì corre accantu à tutti l’altri paesi d’America Suttana, è ghjè pas quessa chì si trova un bon pachettu di strumenti di lochi è di paesi varii.

Issu travagliu di qualità hà pagatu, postu chì sabbatu, annantu a scena di Guagnu, sunaranu incù i Quilapayun. Bon addestramentu pà u giru privistu in lu 2019…

L’associu pà u Ricordu di Circinellu : fà campà u locu è a mimoria

Issu cuncertu spripusitatu ùn saria mai statu pussibile senza à vulintà di i Guagnesi. Difattu, dipoi a so criazione in aprile 2015, l’associu pà u Ricordu di Circinellu hà fattu più di 20 evenimenti annantu à a so cumuna, incù scopu primu d’alzà una statula di Circinellu in lu so paese. Menu di un’anu è mezu dopu, a statula era inaugurata in piazza à a casa cumuna , di dicembre 2016 solu incù i soldi guadanti dà Ricordu di Circinellu.

Da leghje dinò : A storia di Circinellu

 Circinellu .jpg

Ma l’associu s’impiega dinò in la vita di u paese, prupunendu attività pà i chjuchi, teatru, cuncerti in ghjesgia ecc. Iss’associu, Maria’Francesca Andreotti è Noelle Medurio ne so e criatrice. L’amministreghjanu cum’ellu si facia in paese in li tempi. Ogni parsona di u paese hè invitata à e riunioni, pò dà u so avisu è u so puntu di vista. Ghjè cusì chì pà sabbatu sera, ognunu à pristatu qualcosa, è ci sarà un squadrone di 22 benevuli.

Prughjetti, ne anu parechji à mente, cum’e un incontru incù l’associi fiumurbacci è ci facenu vede chì incù l’amore di u so paese è assai vulintà tuttu hè pussibule, ch’ellu sia d’innalzà una statula in l’onore di un eroe storicu ò di fà sunnà un gruppu miticu, simbulu di a lotta di l’upprimati.

One comment

Lasciate un cummentu ?

This site uses Akismet to reduce spam. Learn how your comment data is processed.