Ghjuveddi rilighjosi, un raportu novu à a croci?

L’aveti tutti visti sti picculi ghjilosi chì luccicani è chjoccani à u pulsu di i ghjuvanotti è di l’anziani, una crucetta chjuca è a so funicella culurita, chì l’istatina lascia impregnassi a forma nant’à i pelli innurati da u soli.
Cunsidarata da certi com’è adornu d’istati, o par l’altri com’è
ughjettu di cridenza, emu guasgi tutti sta croci, è di manera più
larga, purtemu un segnu rilighjosi, ch’iddu sia a catena di u primu
sacramentu, una Santa Maria intornu à u coddu, ma dinò par d’altri, u «
Dio vi salve Regina » minatu in lu farru purtatu incu fiertà à u
pulsu.

Ci voli à cunsidArà issi ghjuveddi com’è i segni d’un cambiamentu culturali è suciali ; d’una parti campemu in una sucetà induva i cridenzi è i riti cristiani si perdini, ma di manera paradussali,
videmu una crescita di i segni rilighjosi, ancu di più ind’è a ginirazioni nova chì malgradu u fattu di participà à qualchì festa cristiana, ùn credi più.

A rilighjoni, un marcatu com’è un altru ?

A sapeti tutti chì a rilighjoni hè stata sempri un affari di puteri puliticu, ma dinò, è ancu di più di puteri ecunomicu, i ricchezzi di i nostri ghjesgi, da i petri sin’à i so urnamenti, erani u spechju di
a putenza d’una pievi, è di a so piazza pulitica in lu Meditarraniu. A Corsica hà datu cardinali è papi à u Vaticanu mentri seculi è seculi è i nostri tempia ani tinutu issi resti d’una putenza rilighjosa.

Di manera più intima, ogni famidda corsa teni incù rispettu i so ghjuveddi cristiani, ch’iddi siani i picculi libri di messa, incù a ligatura d’oru, o allora i manichetta fini di dintella, ch’idda
purtaiani minnanna è i so sureddi, ziteddi, mentri l’uffiziu. Ciò ch’avia cumpratu a famidda tempi fà, è quissu assai caru, oghji ùn hà mancu prezzu parchì ramenta un’epica induva a rilighjoni faci parti di a
vita.

Inveci, d’altri ughjetti rilighjosi fermani d’una ginirazioni à l’altra, com’è a statula di San Roccu ch’iddu avia cumpratu l’arcimissiavu, prisenti dinò in a ghjesgia in a capoella in Sant’Andria di Tallà, è chì no surtimu ogni 16 d’Aostu par a prucissiò di a festa patrunali.

Allora, l’ughjetti rilighjosi t’ani un pregiu, ma dinò una storia sintimentali è intima, chì senza crià ligami incù Diu, avvicina a ghjenti di a so cultura.

A croci com’è ricordu

Una croci chì, malgradu tuttu ramenta quidda di a noscia ghjesgia, di u campanili o di a noscia punta nant’à l’altura di u paesu, ma dinò una croci chì sveghja l’anziani cridenzi in lu cori di quiddi ch’ani vistu a minnanna fà u pani dopu à u nominepatri, pinsendu à l’arcimissiavu ch’era statu salvatu di u focu, lampendu un paniolu di San Roccu in i fiari.

Qual’hè ch’ùn hà mai lampatu un sguardu inchietu à stu braccialettu o à stu cullaru nanzu d’entra in a sala d’esami, pinsendu pà a prima volta chì pudaria esista una forza suprana?
Eccu u raportu incù a rilighjoni chì mi pari intrattena a maiò parti di i corsi purtendu issi picculi croci. È ci voli à parta, à andà sulamenti nant’à u cuntinenti pà veda chì u nostru ligamu à a
rilighjoni, malgradu u fattu d’ùn creda, hè sempri statu pietosu è
sanu.

Lasciate un cummentu ?

This site uses Akismet to reduce spam. Learn how your comment data is processed.