Italia : quandu Firenze si mette à a robba lucale – Julian Mattei

(Articulu pubblicatu a prima volta nantu à Corse-Matin. Scrittu da Julian Mattei).

In core à un rughjone turisticu assai, a cità tuscana hè frà e prime à impone 70 % di prudutti lucali in i so risturanti è i so cummerci. Una manera di « resiste à l’uniformisazione » è di prutege e so specificità. À quandu in Corsica ?

A dicia ancu Edgar Morin : « quandu un’identità si trova minacciata da
l’affaccà di una civilisazione chì vene per umugeneizà, inghjenna una sorte di suprassaltu à l’ultima ». Per issu mondu spostu à l’unifurmisazione, certi vedenu oramai a mundialisazione cum’è un periculu da alterà u so patrimoniu. Di fatti, voltanu di più in più ver’di ciò chì face parte di l’anima di i rughjoni è di e specificità di soiu. L’Italia pare oramai d’avè chjappu u leadership di stu muvimentu ch’omu puderia chjamà.
Puntellu di l’epica di a Rinascita, per ciò chì tuccava à principiu à l’arte literarii, a filusufia è e scenze di l’Antichità, Firenze, cità classificata à u patrimoniu mundiale di l’Unesco, hè stata frà e prime à impone robba lucale à i so risturanti è cummerci.
U giovanu merre di Firenze, Dario Nardella, elettu in u 2014, n’hà fattu una scumessa per circà à difende l’identità di a cità tuscana : di 2016, u cunsigliu municipale hà impostu 70 % di prudutti lucali à i so 2512 risturanti da pudè priservà l’autenticità di l’usi fiurentini.
Cum’è una riposta à l’invasione di i magazini alimentarii, i fast food, e catene di risturazione strangere è à l’insegne internaziunale chì cercanu à arradicà ci si.
Ma s’è a misura pò esse prisentata cum’è « radicale », ùn hè ancu à impaurisce i cummercianti tocchi da stu cuncettu novu è da sta battaglia per prutege a robba lucale chì face dinù l’identità di sti lochi. Per a maiò parte, ci vedenu ancu parechji effetti pusitivi.
Ogni annu, a cità accoglie, à l’ingrossu, circa 16 milioni di turisti chì venenu à scopre u so patrimoniu storicu, è sanu propiu chì l’identità ferma un mutore maiò di u turisimu. « Cum’è d’altre cità,
simu diventati vittime di l’uniformisazione, spieca Ricardo
Bartolossoni, u patrone di u risturante Giannino, in u centru di Firenze. S’è no ci lascemu invade, avemu da perde à pocu à pocu ciò chì face l’identità di a nostra cità è chì hè ricircatu da i turisti chì ci ghjunghjenu ». Moltu più chì e cunsiquenze lucale ponu esse dinù impurtante :dinamizà l’ecunumia di u rughjone, sviluppà l’impiegu lucale, mantene
e specificità chì ponu interessà i turisti…
Risultatu : dapoi chì Firenze hà messu in ballu sta pulitica nova, parechje altre cità taliane vulerianu incalcà un modu di sviluppu nant’à stu mudellu custì. È in Corsica perchè nò ?

Di Julian Mattei

Lasciate un cummentu ?

This site uses Akismet to reduce spam. Learn how your comment data is processed.