In la notte di sabbatu à dumenica u 24 di ghjugnu, Mighele Raffaelli, pittore, musicante, scenograffu è omu di cultura mundiale si n’hè andatu à l’età di 89 anni.
Natu in lu 1929 in Marseglia, Mighele Raffaelli, seguitò una furmazione di musica è pittura. Sarà prestu invitatu à mette i so talenti è a so sensibilità à u sirviziu di u teatru cum’è dicuratore scenograffu, cumpusitore è criatore di custumi. Durante qualchì anni, travagliarà annantu à e più belle scene eurupee è svilupparà cusì a so maestria è a so visione criatrice uriginale. Grazia à e so qualità, divintarà laureatu di i premii i più primurosi di u mondu teatrale è sarà chjamatu da travaglià annantu à una mansa d’opare classiche è cuntimpuranee.
Da u Deutsche Oper Berlin sin’à u festivale di Salzbourg, ùn si pò cà maravigliassi di a so acutezza dramaturgica chì u porta di manera naturale versu a messa in scena. Issa aspirazione sarà rinfurzata da cullaborazione incù Jorge Lavelli, Antoine Vittez è ancu Jean-Marie Serreau. Incù sti maestri, Raffaelli travagliarà à quandu à a musica, à quandu à a scenograffia, custumi o à a messa in scena. Mighele Raffaelli divintarà dinò à st’epica, l’amicu d’artisti i più famosi à u pianu internaziunale cum’è Prevert, Picasso o Neruda.
I primi passi in cuntinente
In l’annu 1947 hè u tempu di scontri è scuperte assai impurtante pà l’avvene di Mighele Raffaelli. Cumencia à dissignà incù Louis Pons, ampara a ghitarra classica incù Louis Davalle è a litugraffia à u latu di Jo Berto.
Cum’è no l’avemu detta, à Saint-Paul-de-Vence, in lu 1951, scontra à Jacques Prévert chì u prisenta à Pablo Picasso. U gran maestru di l’arte muderna, assai uccupatu tandu, truvarà quantunque un picculu mumentu da fighjulà e tele di Raffaelli. Videndu ciò chì u ghjovanu Mighele era tandu capace di sprime cù u so pinnellu, Picasso cancellarà tutti i so appuntamenti in corsu è, à quelli chì u vulianu vede Picasso rispundarà tandu : « Ùn possu micca avà, ciò chì sò in tracciu di vede hè assai assai impurtante ». U maestru spagnolu chjamarà tandu à Pierre Leob di a Gallerie Pierre in Parigi è à altri galleristi par dilli : « Duveriate seguità u travagliu di issu ghjovanu pittore » è cusì, u pittore corsu firmò un cuntrattu incù una galleria di prima trinca di a capitale.
Eppuru, ùn li cunvenenu micca è dumande marcantile di i marcanti d’arte chì u prisentanu sempre cum’è u figliolu spirituale di Picasso. U cumplimentu tremende di u maestru divintò solu un argumentu cumerciale è, tandu Raffaelli, omu libaru, ùn rinnuvarà u so cuntrattu.
Un omu di Teatru :
In lu 1957 face a scenograffia di 3 « opéras bouffes » è participeghja un annu dopu à u Fistivale di Sarlat dissignendu è pitturendu à a manu i custumi di u ballet di Georges Dandin di Molière. Salutatu da a critica, hè chjamatu da rimpiazzà à Chagall pà a criazione mundiale di Moïse è Aaron di Schönberg. À partesi da quì sarà chjamatu da e più famose scene internaziunale da cuncipì parechje scenugraffie.
In lu 1971, in Prague, riceve una medaglia d’oru di u Premiu Internaziunale di Scenograffia è, Jack Lang, tandu direttore di u Teatru Naziunale di Chaillot, li dumanda di participà à a cuncezzione architetturale di a nuvella sala di u Trocadero.
Sarà dopu chjamatu dapartuttu da crià sale di teatru, dicori, custumi è hè animatu da a vulintà d’ammaistrà l’ughjettu teatrale in la so glubalità. In 1975, crea a so propia cumpagnia Le Théatre de l’Opéra Chronique è durante un’ottina d’anni, st’inseme puliridisciplinariu sarà l’ardignu (u strumentu) di a so andatura artistica.
U ritornu in Corsica
Tandu cunnisciutu in tutta l’Europa, Mighele Raffaelli, sceglie quantunque di stallassi ind’un’isula chì u cunnosce male. Ma ùn era tantu intarissatu da l’unori Raffaelli. Più cà a pace è a bellezza ind’un’isula in piena epica di « Riacquistu » di trasmissione è di cultura, vulia tramandà u so sapè, a so maestria è u so cunniscenza.
Forte di a so furmazione di musica classica, hà da fà parte di quelli chì anu fattu rinasce a cetera, essendu u prima à accurdanne tutte e corde. U so amore di a cultura è di a tradizione corsa, u porta à rializà u dischettu Canti corsi in tradizioni è a fundà Donnisulana. Pà issu prughjettu, sunaranu inseme e più belle voce feminile di Corsica sin’à l’Operà Bastille in cullaburazione incù Iannis Xenakis.
Incù Ghjermana de Zerbi, travagliarà annantu à l’Antulugia di u cantu nustrale chì ùn ghjunghjaranu disgraziosamente micca à compie.
In lu 1990, scrive cù Dumenicantone Geronimi è ghjoca a pezza di teatru Ruminzulaghju tutta in lingua corsa è face riprisentazione induve l’attori viaghjanu à mezu à una cuma di « rumenzule ». Critica dura di u statu eculogicu di l’isula, incù parsunaghji mistichi chì discorrenu di tutti i guai di a Corsica di u 90. In iss’opera, u scenograffu imagina un dicoru sunoru d’induv’elli s’innalzanu soni quandu l’attori marchjanu d’un elementu à l’altru.
A mostra “Barbaresque” in Campumoru :
À u principiu di l’anni 2000, u rughjonu di Sartè Valincu li dumanda d’accampà a Torre di Campumoru. Issa torre particulare era di più una piazza forte cà solu un locu di guardia. Da fà capisce a storia d’issu locu, di a so custruzzione è di e rilazione trà i populi di u Maretarraniu di l’epica, Mighele Raffaelli rializeghja una scenograffia tremende à prupositu di l’invasione muresca, di u Mareterraniu è di i marittimi.
Dopu una mostra à u Museu Fesch in lu 2002 è un ultimu discu Emu spartutu lu mari incù Michela Cesari in lu 2009, l’artistu sarà menu pruduttivu colpa à a malatia chì u tocca in lu 2012. Firmarà quantunque una figura maiò di a Corsica à u quale saranu resi umagi cum’è par un dettu u ducumentariu “Raffaelli ou le joli temps de l’engagement”, un episodiu di l’emissione Galleria è un’ultima mostra in Villanova in lu 2016, u so paese caru induve ellu hà finitu u so viaghju trà e sponde di tutti l’arti a dumenica scorsa.
Issu articulu hè un umagiu, i ritratti ùn appartenenu micca à Tempi Rivista o à i ridattori. I dritti appartenenu à l’eredi di Mighele Raffaelli. E figure di “Ruminzulaghju” sò prese da u libru “Ruminzulaghju” publicatu da La Marge Édition.