Daniella Casanova hè una risistenti corsa nata in Aiacciu in u 1909. Hè morta u 9 di maghju di u 1943 à Auschwitz, in un campu di dipurtazioni. Hè stata rispunsevuli di ghjuventù cumunisti, prima di crià l’unioni di i femini di Francia. Fiddola di prufissori, faci studii sicondarii in Aiacciu è dopu in Vars, in cuntinenti. Dopu à avè fattu una scola priparatoria, Daniella Casanova si ni và à a scola dintaria di Parighji, prifirendu una prufissioni libarali à a funzioni publica. Ci scopri l’unioni fidirali di i studianti, urganisazioni studientina di a manca, à a quali Daniella faci dunqua parti innanzu di dirighja l’urganizazioni. Scontra u so maritu, Laurent Casanova, in st’urganisazioni quì. In u 1928, s’ingaghja in i ghjuventù cumunisti.
Vincentella si faci chjamà Daniella è diventa prestu sicretaria di u gruppu di a facultà di midicina di Parigi. Facendu di sicura i so studii, raghjunghji u cumitatu cintrali di u muvimentu à u sestu cungressu di ghjunghju di u 1932. È dopu, raghjunghji a dirizzioni di u muvimentu di frivaghju di u 1934. Di pettu à a crescita lestra di a Ghjuventù Cumunista, l’ottesimu cungressu addunisci in Marseglia in u 1936 a carga di fundà l’unioni di i femini di Francia. St’urganisazioni, ancu s’edda era vicina à a GC, vulia crià un muvimentu pacifistu è antifascistu pà i donni solu. Aletta sicritaria ginirali di l’UJFF, duranti u so primu cungressu di dicembri di u 1936, urganizeghja una culletta di latti cuncintratu da aiutà i ziteddi di Spagna, vittimi di a guerra civili d’epica.
Mentri l’intirdizioni di u Partitu Cumunistu Francesu in u 1939, Daniella Casanova diventa clandistina è cuntribuisci à u ghjurnali « Le trait d’union ». À partasi d’utttovi di u 1940, participeghja à a missa in baddu di cumitati fiminili in u rughjoni di Parighji. Senza piantà d’aiutà a stampa clandistina, soprattuttu pà a pinsata libara è criendu a « Voci di i donni ». Urganizeghja manifestazioni contru à l’accupanti stranieri, soprattuttu l’8 è l’11 di nuvembri di u 1940, colpu à l’arrestazioni di u prufissori Paul Langevin, eppo quidda di u 14 di Luddu di u 1941.
Hè arristata da a pulizia francesa u 15 di frivaghju di u 1942, allora ch’edda daghjia da chì nutriscia Georges Politzer è a so moglia, Maï Politzer. Incarciarata in a prighjoni « di a Saluta » eppo in u forti di Romainville, à a fini d’aostu di u 1942, hè dipurtata à Auschwitz u 24 di Ghjinnaghju di u 1943. Travadda à l’infirmeria di u campu in tantu chì chirurga dintista. Ùn piantarà mai di luttà pà i so diritti, urganizendu publicazioni è manifestazioni clandistini à u dipositu, po à u forti, è, infini, a sulidarità in u campu di cuncintrazioni. Mori di u typhus a sera di u 9 di maghju di u 1943.