Pensata à l’attinzione di u lettore : stu scontru hè statu rializatu nanzu à l’avenimenti ligati à l’attaccu di Yvan Colonna à u principiu di u mese di marzu. Certi elementi puderanu dunque parè datati o incuerenti incù a situazione oghjinca.
Prisintazione : Pasquà hà 21 anni, hè studiente in scenze suciale è pulitichi. Campa trà Parigi induve studia è a Corsica a so terra d’urigina. Di sinsibilità di manca, impignatu puliticamente per a Corsica, ci parla oghje di u so primu votu à e presidenziale per u candidatu di a France Insoumise.
Tempi Rivista : Per chì raghjone ai sceltu di vutà in u 2022 ?
Pasquà : Aghju dicisu di vutà dopu avè paragunatu i sfarenti prugrammi pruposti. A me scelta per a France Insoumise si spiega da u fattu ch’elli anu un prugramma chì hè scrittu, chì hè sciffratu, chì hè accessibile, à l’inversu di l’altri candidati.
U prugramma di l’altri candidati chì puderianu esse cridibuli, cum’è Yannick Jadot, ùn sò tantu pricisi. Aghju fighjulatu i meetings di a France Insoumise è d’altri partiti. Ciò chì m’hà piaciutu incù u prugramma di Mélenchon di una manera generale, hè ‘ssa idea d’ùn aspittà un miraculu vinutu di l’ecunumia di mercatu pe vede ‘ssa transizione eculogica. U Statu deve esse prisentu per cunduce l’ecunumia in una direzzione chì hè più eculogica, hè ciò ch’è elli chjamanu a pianificazione eculogica.
“Ùn pudemu micca, vista l’urgenza eculogica, andà à u ritimu di i cicli ecunomichi chì si ristruttureghjanu prugrissivamente.“
Ci hè bisognu di un Statu forte chì orienteghja l’ecunumia, chì rilancia l’attività versu e direzzione bone.
Listessa cosa per u suciale chì hè dinù impurtante per mè. Mi pare chì un veru mudellu di sucetà hè prupostu.
In a pratica, u so prugramma mi pare esse u più demucraticu, chì ci hè ‘ssa idea di rimette in core di a decisione pulitica a decisione populare, incù a VIesima Ripublica. Piglià a ghjente à casu, creà un’assemblea cun elli, è discorre inseme per ghjunghje à una cunclusione, hè quessa chì voli mette in baddu in a Custituzione. L’intelligenza cullettiva hè pussibile quandu l’omu mette a ghjente in bone cundizione.
Pensu chì a pulitica pò cambià e cose. Ma ci anu amparatu chì ùn ci era micca d’alternativa, chì ci era una sola via, ch’un mudellu di sucetà unicu ! A pulitica pò migliurà a vita di a ghjente, pò migliurà u nostru rapportu à u mondu è u nostru rapportu à a natura. Ùn hè micca un attu simbolicu solamentu, hè un acquistu per cambià e cose. Tuttu ciò chì hè dicisu o ùn hè micca dicisu puliticamente hè sempre u produttu di una scelta. A decisione cullettiva hè nostra.
T. R. : Capisci a ghjente ch’ùn andaranu micca à vutà o chì votanu biancu ?
Pasquà : Capiscu tutalmente, anu intesu dapoi anni è anni ch’è l’altirnanza pulitica era un’illusione, chi ùn cambiava guasi nunda : un colpu di dritta, eppò manca centrista, eppò dritta centrista… Ciò chì hè a listessa cosa. A ghjente ùn vede micca e so cundizione di vita cambià cù ‘ss’offerta pulitica, ‘ssi partiti chì anu impiditu di fà cambià e cose. Ci vole à luttà contr’à què, perchè tuttu hè u produttu di una scelta pulitica. U smintinchemu troppu.
T. R. : Comu faci per infurmati di l’attualità pulitica ?
Pasquà : L’infurmazione, a pigliu da a stampa (u Mondu, Mediapart…). Fighjulu e catene Youtube di i sfarenti partiti, ma mi piace à leghje l’articuli di stampa piuttostu.
T. R. : Ti ricunnosci in lu paisaghju puliticu naziunale ?
Pasquà : Pensu chì mi ricunnosceriu di più s’è ùn era micca Mélenchon chì purtava ‘sse idee, incù ‘ssu prublema d’imaghjine. Osinnò iè, mi ricunnoscu, in ‘ssa sinistra quà. Eppuru, so ancu penserosu di u paisaghju puliticu chì s’alluntana versu a strema diritta, è in quessa ùn mi ricunnoscu micca. Hè abbastanza spiacèvule, hè cumplittamente scunnettatu di i veri bisogni, di e vere inchietudine di a ghjente. Ùn parlu micca solamentu di i prugrammi, parlu ancu di i temi di i dibattiti. Oghje, un tema cum’è l’immigrazione o a sicurezza hè di primura quandu, cinque anni nanzu avia una piazza siconda.
T. R. : In Corsica, ti ricunnosci in lu paisaghju puliticu ?
Pasquà : Ùn mi ricunnoscu micca in l’offerta pulitica, perchè a manca hè cascata è perchè u paisaghju naziunalistu manca di chjarezza pulitica è ideulogica. Ci sò e quistioni di l’autonumia energetica, di l’autonumia alimintare è di l’autonumia sanitaria chì sò. Eppuru, per mè a quistione di a Corsica hè a più impurtante, ghjustificheghja tandu a mo scelta di votu à e presidenziale.
T. R. : A pusizione di i candidati di pettu à a Corsica hè un sughjettu impurtante per tè ?
Pasquà : Di sicura, hè per quessa chì vogliu vutà pè Jean-Luc Mélenchon. Mélenchon hè un autonomistu affirmatu, hà scrittu in u so prugramma ch’ellu vole iscrive a Corsica in l’Articulu 74 di a Custituzione francese, è in a Custituente, ci serà un rigimu d’autonumia assai allargatu per a Corsica.
Ancu d’altre quistione, tale u votu di a leghje Mollac annantu a valurisazione è l’insignamentu di e lingue regiunale [i diputati di a France Insoumise anu vutatu d’una voce contru, ndar] hè ghjustificatu da u fattu chì i diputati anu sottuliniatu chì sta leghje dumandava à e merrie di dutà un bugettu per e lingue regiunale, ma ch’è u bugettu di e merrie ùn crescerà mancu ! Hè un mezzu per l’educazione naziunale di scunfighjesi a quistione di e lingue regiunale senza mette à dispusizione un bugettu. Di più, a leghje in u statu hè fatta tale chi e scole private sò priviligiate per l’insignamentu di e lingue regiunale in immersivu, ciò chì và contru l’idea di l’inclusività per tutti i sculari. Annantu à u fondu di l’insignamentu di e lingue regiunale, sò cumplittamente favurèvule, anu vutatu contru u mudellu chì era prisintatu.
Ancu, e quistione di l’autonumia energetica, alimintare è sanitariu sò mintuate, in particulare a quistione di a criazione di un Centru Uspitalariu Universitariu in Corsica, è per privene e future pandemie. Ci hè un veru prugramma per i territorii cum’è a Corsica è i Dom-Tom.
T. R. : So sughjetti chì ti parenu pocu mintuati di manera generale è chì tù voli vede di più in avanti ?
Pasquà : Annantu à u sistemu educativu generale, annantu à l’insignamentu, perchè campemu stondi difficiuli per l’insignamentu. U migliuramentu di u sistemu educativu in particulare, dendu i mezi è fà cresce u dinaru di l’insignanti. U mudellu educativu ancu, hè qualcosa ch’hè pocu rimessu in quistione, sottu-pulitizatu guassi. Ci so riforme tutt’i trè anni chì ùn permettenu micca una chjarezza in u sistemu.
T. R. : Chì evuluzione sperghi per a Corsica da quì à u prossimu mandatu ?
Pasquà : Per a Corsica, pensu chì s’è a vulintà ùn vene micca di Parigi, ùn averemu mai nulla. Incù Mélenchon, averemu ciò chì vulemu, ma micca cù Emmanuel Macron. Ùn simu micca in una pusizione di forza per influenzà e cose di manera significativa. Aghju u sintimu chì u prughjettu d’autonumia si sbiota di più.
D’altronde, è ghjè qualcosa chì cumencia à sunà ciottu. Mi dumandu : chì saria u mudellu di sucità incù l’autonumia ? Eiu, socu favurevule à l’autonumia per andà versu una sucetà più rispunsevule à l’incontru di a natura, e generazione future. Tandu pensu chì u prughjettu d’autonumia nascerà d’una visione attiva par fà cambià e cose.