Pensata à l’attinzione di u lettore : stu scontru hè statu rializatu nanzu à l’avenimenti ligati à l’attaccu di Yvan Colonna à u principiu di u mese di marzu. Certi elementi puderanu dunque parè datati o incuerenti incù a situazione oghjinca.
Prisintazione : Raphaël hà 20 anni è hè studiendu in classa preparatoria in Marseglia. Dapoi chì ellu s’interessa à a pulitica, si sente prossimu da i muvimenti eculogisti, in particulare d’Europa Ecologie i Verdi [Europe Ecologie Les Verts]. Ci parla oghje di u so prima votu à e presidenziale per u candidatu Yannick Jadot.
Tempi Rivista : Per chì raghjoni ai sceltu di vutà in u 2022 ?
Raphaël : Aghju cresciutu in una famiglia ch’hè stata sempre pulitizata. Di a pulitica nè parlemu ogni ghjornu. Cunsidereghju chì u votu hè un duvere per un citatinu francese. Hè ciò chì face chì campemu in una demucrazia. Dà u so parè da l’opinione soia, hè u modu di sprissione di u citatinu.
U votu u più impurtante per mè stà u votu per e presidenziale, perchè si sceglie u so capu di Statu, si sceglie quale ch’hà da guvernà u nostru paese mentre cinque anni. Ancu u votu biancu, invia un messaghju, hè più forte ch’è l’astinsione.
T. R. : Capisci la ghjente chì ùn votanu micca?
Raphaël : Capiscu, eppuru ùn sò d’accunsentu cun elli. Ci hè assai ghjuvanotti ch’ùn si sentenu micca impegnati, ùn si sentenu micca cuncirnati. Quandu fighjulemu a scena pulitica, e persunalità pulitiche parlanu pocu à a ghjuventù. Per contu meiu si pò generalizà à tutta a ghjente chì s’astene di vutà, elli ùn si sentenu micca raprisintati è ùn anu micca u sintimu chì a classa pulitica indirizzassi à elli. Secondu à mè, hè ghjustamente versu sta ghjente chì si porta u votu biancu, raprisintà ‘ssu disaccordu. Per mè l’astinsione hè un sbagliu, hè un fallimentu à ciò chì face di una persona un citatinu.
T. R. : Cume stai infurmatu di l’attualità pulitica ?
Raphaël : Cù i reti suciale, e catene youtube di certi ghjurnali, in particulare le Monde, the Guardian… à l’internaziunale, certe catene com’è a BBC. Ci hè ancu u fattu chì ne parlu assai incù monda ghjentedi u circondu meiu. r sfurtuna ùn leghju micca assai ghjurnali. Trovu chì u furmatu videu hè più vivu è più intuitivu ch’è a lettura. A televisione, a radiò, ne cunsumu pocu. Ùn aghju micca l’impressione ch’elle mi mancanu ste surghjente d’infurmazione.
T. R. : Ti ricunnosci in u paisaghju puliticu naziunale attuale ? Ai sceltu di vutà per Yannick Jadot, hè un votu chì ti currisponde pienamente ?
Raphaël : Micca da veru. Perchè sò un ghjuvanottu, sò studiente è per disgràzia, ancu per i candidati chì sò i più orientati ver’di a ghjuventù, ùn aghju micca l’impressione chì a ghjuventù sia cunsiderata da i puliticanti. Aghju sempre l’impressione ch’ella hè piazzata à u sicondu pianu.
Pè contu meiu, aghju in pettu l’eculugia primu di tuttu. Y. Jadot, hè unu di i soli candidati ch’hà messu ‘ssa linea direttrice in core di a so campagna è di u so pianu di quinquenniu s’ellu hè elettu. Hè per ‘ssa raghjò ch’eiu sò andatu ver’di Yannick Jadot. Eppuru, ùn possu dì ch’eiu mi ricunnoscu in ‘ssu candidatu. Vogliu ghjustu vutà per un candidatu chì hà listessa preoccupazione ch’è mè.
Ùn aghju micca l’imprissione ch’è a ghjuventù sia cunsiderata da i puliticanti. Aghju sempre l’imprissione ch’è ella hè piazzata à u sicondu pianu.
T. R. : U paisaghju puliticu in Corsica, chi ne pensi ?
Raphaël : Provu di tenemi infurmatu di ciò chì si passa in Corsica, campendu fora. Vedu chì ci sò cambiamenti chì sò fatti per u megliu, in particulare in l’eculugia è a ghjuventù. Di sterpa corsa, ùn aghju mai campatu in Corsica à l’annu, dunque ùn possu affirmà chì mi ricunnoscu ogni volta.
T. R. : E pruposte di i candidati per a Corsica hè un criteriu impurtante per tè ?
Raphaël : Mi teni in pettu ciò chì si passa in Corsica, ancu s’è ùn campu micca quì. Per mè, a pusizione di i candidati per a Corsica sò impurtante, in particulare di pettu à l’identità di u populu corsu.
Avè una pusizione particulare annantu à a Corsica, per mè, hè qualcosa di assai impurtante. Per disgràzia, ùn n’aghju micca assai intesu parlà ch’ella sia mentre i dibattiti, o ancu in l’interviste… Di manera generale si parla pocu di e regione com’è a Corsica chì anu un’identità forta, è simu più cuncintrati ver’di u fora ch’è ver’di ciò chì si passa à a scala lucale.
T. R. : Ci sò i sughjetti chì sò elusi annantu à a scena naziunale sient’è tè, di i sughjetti ch’è ti piacerè di più vede messi in davanti ?
Raphaël : A ghjuventù, da veru. Sopratuttu a ghjuventù studientina, hè sguassata da u ministru di l’Educazione naziunale, Jean-Michel Blanquer. I studienti sò messi di latu, sguassati in e misure di u guvernu. Per contu meiu ùn simu micca raprisintati, ch’è simu pigliati in contu mentre che simu ghjustamente una generazione chjave.
Di pettu à a crisa sanitaria, aghju l’impressione ch’è a nostra generazione hè quella chì ne soffre u più è ch’hà da soffre di e cunsequenze di ‘ssa crisa.
T. R. : Cuncirnendu l’evuluzione di a situazione di a Corsica, hai spiranze per u prossimu mandatu ? Di e vulintà ?
Raphaël : Ci sò assai prublemi à u livellu di a gestione di i rumenzuli in Corsica t’hà gattive cunsequenze nant’à u pianu eculogicu, à u livellu di e cumune, perchè hè qualcosa chì hà un presu è chì hè problematicu in tutte e regione di Francia. Gistisce i rumenzuli sinificheghja una gistione di l’inguinamentu è di a produzzione di gasu in l’atmosfera.
Avemu da piglià in contu ch’è a regione di Corsica hè una di e più povere di Francia, crià a dinamica ecunomica fora di a staghjone turistica. Perchè, per disgràzia, a Corsica campa soprattuttu grazia à u so turismu d’estate
T. R. : À u livellu naziunale, ci hè un’evuluzione o evuluzioni ch’è ti piacerà di vede nasce?
Raphaël : Mi piaceria assai di veda una riforma di u bascigliè. Ghjunghjenu à a facultà ghjuvanotti ch’ùn anu micca e cumpetenze o e cunniscenze necessarie per sviluppàssi è spannàssi, trovu ch’hè una cosagattiva. Hè da l’esigenza ch’è pudemu ottene risultati boni.
Infine, una meglia gistione di u corpu medicali, è in generale tuttu ciò chì tocca à u bugettu di di a salute perchè, l’avemu vistu, hè una gistionaccia attualmente. Ci ritrovemu incù una situazione di crisa ch’ùn pò esse cundutta com’è si deve è ùn hè micca nurmale per un paese chì hà i mezi, chì hà l’infrastrutturi.
Mi piaceria un discorsu annantu à a vita di à ghjuventù è di i studienti chì sò in ghjocu oghji . Vuleriu infine ch’ella sia cunsiderata l’opinione di i ghjuvanotti in u dibattitu publicu.