Ci anu datu lu pane
Per u nostru cultellu
È ligatu e mane
Per lascià li discorre
Quantu n’hà sradicatu
Quellu fiume chì corre
Di parolle assestate
À imbruglià u ciarbellu ?
Voli scrive una storia
À nant’à l’ore in pula
Chì u ventu mimoria
Da luntanu trascina
Ùn li voli cunnosce
Carnaghju è mataccina
Ma d’una sola voce
Francà ci da u nulla
Francà ci da e lite
È di a nostra propia rabbia
Sò e nostre ferite
A più inghjusta cabbia
Spiranza impeverita
Ed hè a sola ch’abbia
Per cuntà ti l’avvene
Ch’à fianc’à tè viaghja
U sole s’è l’avissi
U t’avaria accesu
‘Sse vie crucifissi
Ùn sò quelle ch’e’ bramu
Sott’un celu di piombu
Di cimentu è catramu
Ma chì l’oru strapiombi
E case di u paese
Tempi fà st’avviò
Avviava distini
Per forza o per ragiò
Battellucci di spere
Oghje à a deriva
Ci vecu prigiuneri
Chì ùn anu più ribba
Per scumbatte a ruvina
Ùn tuccarà dumane
À cuncoglie o scunvince
À impruvisà lamenti
Per u dannu à vene
S’ella ferma in a mente
S’ella bolle in le vene
‘Ssa sicurezza d’esse
Ci tuccarà à vince !
A.P.
20/03/2022
Fiura : Senza locu, 1963, 2020 ©Estate of Vivian Maier, Courtesy of Maloof Collection and Howard Greenberg Gallery, NY