Pà sta meza finala andà di a Champions League 2021, l’ex coach di u QSG hà fattu un travaddu tamantu pà dà cunfidenza a i so ghjucadori. Contra à eddi, u Real, club chì hà fattu a so furtuna incù sta cumpitizioni è chì pocu fà avia provu un colpu si statu contra à l’UEFA, incù u prughjettu di Superliga aurupea, impulsatu da u so prisidenti Florentino Perez.
A partita inizia di fattu in un clima particulari: u ghjornu nanzu, i madrileni s’aspittaiani dicisioni pocu favurevuli annant’à u campu, ma M. Makkelie, l’arbitru olandesu mandatu da l’UEFA, par furtuna, dicidi piuttostu di lacà i squadri ghjucà: u zifuleddu si senti pocu è micca pà u primu quartu d’ora. È po’…
Golazooo!… di l’inglesi, à u 14u: 1-0 pà Chelsea. Una cuncritizazioni miritata, in un tempu forti di i blues: dopu à una passa parfetta di Rudiger sotta à a difesa, Pulisic s’apri solu u caminu di stu gol, dribblendu Courtois, lacatu in tarra incù soli i trè difinsori bianchi nanzu à a so gabbia. Fendu cusì a storia di u so paesi, chì ghjè a prima volta chì un amiricanu marca à stu liveddu di a cupa d’Auropa.
Svighjati dopu à issa spassighjata di Pulisic in a so difesa, i madrileni si facini subitu più dinamichi, sapendu chì stu gol marcatu annant’à u so campu sarà dighjà dicisivu pà a qualificazioni. A vulintà, ci hè.
Dopu a dui altri, beddi uccasioni pà i blues, sarà dunqua Benzema à fassi piriculosu, tirendu forti à u 23u, pà tuccà l’esternu di u palu di u purtieri lundinesu. A capacità… ci hè.
I dui squadri facini u passi è veni pà un mumentu, è sarà Benzema à u 29u à rassicurà i madrileni annant’à un carciu d’angulu: cuntrollu parfettu da u pettu, si volta in furia pà culpiscia u ballò à u bolu : nuevo GOLAZO… di u francesu sta volta: u so 71u in a Champions. N’hà marcatu quant’è un’altra lighjenda di Madrid: Raul González.
U risultatu… s’avvicina? Micca sicura: in issa fini di primu piriudu, a difesa bianca ùn a faci micca à curreghja i so arrori, è lacani l’inglesi passà, sempri di listessa manera, una volta dopu à l’altra.
Cunfidenti, l’omi di Tuchel si facini dinò piriculosi à u 38u, ma senza riescita.
Zidane sarà statu filici di veda l’attaccanti inglesi pocu efficaci, ma i bianchi si devini par avali accuntintà di una contr’attacca, èdi Marcelo hè firmatu da u marcadori lundinesi di manera pocu ligali: carteddu ciaddu.
Bedda partita par avali, cù intensità, induva Kante faci da maestro, u centrucampista à veru u più imprissiunanti in issu primu piriudu. A capacità, l’hani dimustratu: ci hè. Hè l’efficacità chì manca à l’attacanti inglesi.
I blues s’impatruniscini di u ballò, ramintendu chì ùn sò micca ghjunti sin’à a meza finali à casu, ancu si nimu l’aspittaia quì dopu a un iniziu di stagioni mancatu incù Lampard annant’à u bancu.
Lachendu corra a spessu a i spagnoli incù una pussissioni « sterile. A partita si faci menu dinamica in issu sicondu piriudu: Zidane pari d’avè trovu a suluzioni à i prublemi difinsivi di a so squadra.
Zeru piriculu dunqua pà i primi 20mn. Un risultatu chì faci i conti di i blues, ma Tuchel ùn si ni voli accuntintà, è incù dui cmbiamenti à u 65u, rendi u ghjocu inglesu più incisivu.
Passani 3mn senza chì i lundinesi lachessini u ballò. È passa à dritta, è passa à manca… Beddu ghjocu è dui uccasioni pà i blues, ma, senza tirà sta volta.
U Real hè veramenti in difficultà, ciò chì forza u so 9 à vultassini in i so 35m pà ripiddà u ballò è rilancià un attaccu pà i bianchi. Attaccu chì finisci incù un Carciu d’angulu.
Ma a difesa inglesa teni forti: rinvia u ballò una volta, pò un tiru di Benzema. Marcelo ni faci anc’eddu altr’è tantu, ma u so tiru hè paratu dinò.
Esci pocu dopu u capitanu, à tempu cù Carvajal: ultima scianza di Zidane à un quartu d’ora di a fini.
78u, contr’attacca bedda urganizzata da i blues, chì ottenini un colpu francu à l’entru di i 16m. Hè tiratu da Ziyech, chì si cerca l’angulu di u palu, ma u ballò finisci dirittamenti annant’à Courtois.
Ferma pocu tempu è i centrucampisti Modric è Casemiro devini fallà sempri più bassu pà ricuparà i ballò, ma ùn trovini più manera à passà.
Devini aspittà l’87u pà un centru piriculosu di Hazard, suvitatu di unu di Odriozola. Pocu dopu, i bianchi uttenini un carciu d’angulu à dritta è un altru à manca, ma pocu piriculosi.
Odriozola hè dopu custrettu à taddà a contr’attacca di i blues è à piddassi u carteddu ciaddu. Esci Benzema à u 92u, marcadori è ancu ghjucadori u più piriculosu di i merengue sopratuttu in u primu piriudu.
Difficiuli à dì quali hè chì a vinciarà sta Champions. Difficiuli à sapè quali ci andarà in a finali tra i pentiti di Chelsea e i separatisti di Madrid.
I bianchi ùn parini micca in freccia in issa fini di partita, forza ancu mancu in capacità di marcallu stu gol, chì li pudaria purtanti dà a vittoria nanzu à a partita ritornu in Londra u marcuri chì veni.
Zifuleddu finali à u 94u: 1-1 pà i blues… chì voltani in casa soia incù sta bedda uparazioni, è un gol marcatu fora, nanzu di riceva i separatisti pà u ritornu, in Stamford Bridge.