Ghjorni fà, Mammone m’hà dumandatu : « Chì ghjè l’islamo-gauchisme ? ». M’hà cumossu, ‘ssa questione. M’era digià accadutu à spiecà la à parechji chì ssa nuzione era una pazzia di a strema diritta francese. Ma, sta volta quì, ghjera Mammone. Aghju capitu chì ss’idee false è periculose eranu in traccia di caminà in e mente, d’imponesi in lu debattitu puliticu cum’è un veru sughjettu, bench’ùn fussi una realità.
Tandu, bisognu à spiecà.
« L’islamogauchisme » seria, pè quelli chì l’anu pupularizatu, una attitudine cumpiacente pè parte di a manca incù quelli islamisti chì « mettenu a Republica francesa in periculu ». L’universitarii serianu, secondu st’idea, i primi culpevuli di ‘ssa cumplicità incù u nemicu.
Ss’accusazione gruttesche sò tunterie chì puderianu fà ride, s’elle ùn eranu una minaccia pè l’universitarii addisignati (certi anu ancu ricivutu minaccie di morte), pè a libertà scentifica è a demucrazia in generale.
Innò, l’università ùn sò micca avviziate pè « l’islamo-gauchisme », cumè dicia a Ministra di u Insignamentu Superiore. L’anu spiecatu centinaie di prufessori è di cercatori, ancu a cunferenza di i Presidenti di l’università l’hà detta : u cuncettu « d’islamo-gauchisme » ùn riprisenta nisuna realità cuncreta !
I muvimenti accademici chì ‘ssu terminu cerca à denuncià, cum’è i studii post-culuniali o l’interseziunalità, ùn anu nunda chì vede incù l’islamisimu. I studii post-culuniali o deculuniali, assai diversi, cercanu à capì cum’e u passatu culuniale pò pisà ind’e sucietà ughjinche è cum’è e scienze suciale sò state custruite in relazione incù una manera di pensà culunialista. L’interseziunalità, ella, cerca à fà a demustrazione chì u fattu d’appartene à parechje categurie suciale sfavurite, crea una alienazione più impurtante chì per quelli chì solu appartenenu à un grupu sfavuritu. Per esempiu, spieca chì un’operaiu d’urigine straniera sarà ancu di più vulnerevule chì un operaiu biancu.
Si ponu criticà sse mosse intelletuale. Si pò criticà una mettudulugia, una interpretazione di dati scentifichi, un mudellu di restituzione di i resultati. Quessu hè l’essenza di a ricerca stessa : funziona grazie à sistemi di rivista pè i pari, incù sensu criticu è u più pocu ideulugia. Ma ciò ch’ùn hè vera hè chì, quelli suciuloghi o storichi, chì provenu à fà avanzà a cunniscenza umana è l’emancipazione cullettiva, sò un periculu pè a Republica o ch’elli sò tulleranti cù l’islamisimu radicalu. Quessa ùn hè !
Genealugia di una nuzione bucciarda
Una cosa chì s’ampara, in quesse università di scienze suciale, hè di fà a genialugia di nuzione chì entrenu in u debattitu pubblicu, pè capisce qual’è chì l’hà fatte entre, perchè è cumu. Appuntu, un cercatore di u CNRS, spezialistu di u militantisimu puliticu in linea, hà pruvatu à studià l’urighjine di ‘ssa nuzione. I so risultati sò spaventi.
U primu custattu, ghjè chì ‘ssa parolla esiste dipo una quindecina d’anni in e sfere neonazi è di a strema diritta, ma era assai marginale sin’à pocu fà. Cum’hà fattu tandu pè diventà cusì prisentu ‘ss’ultimi mesi ?
In l’ultimi mesi, ci hè statu una campagna di desinfurmazione pè diffonde ‘ssu terminu nant’e rete suciale cum’è Twitter, campagna custruita da gruppi di strema diritta europei incù l’aiutu di l’alt-right americana (quelli razzisti, cumpluttisti, supremazisti bianchi viulenti chì anu urganizatu l’invazione di u Cungressu di i Stati Uniti di ghjennaghju). Pè dà una idea di quale sò ste persone, ci vole à sapè chì a maghjurità di i conti chì utilizavanu sta parolla sò stati scantati di Twitter per via di discorsi razzisti o azzizzu à l’odiu o perchè eranu ruboti chì amplificavanu artificialmente u sustegnu à ssi gruppi. ‘St’armate di « troll » è altri attrazzi muderni sperti in i fake news sò arme putente in mani à gruppi chì volenu attaccà a demucrazia, in Europa cum’e in i Stati Uniti, pè favurisce l’emergenza di guverni autoritarii in favore di le so idee. Quessa sí ghjè una realità, documentata incù mondu ricerca academica.
Una strategia antica di a strema diritta
Tecniche nove… per una strategia antica di a strema diritta. In li anni 1930, i nazi parlavanu di cumplottu « judeo-bolchévique ». U principiu era u stessu : assucià un nemicu puliticu à una minurità stimmatizata pè discredità l’avversariu, è stimmatizà ancu di più quella minurità postu ch’ella era assuciata à i nemichi perfetti. Cum’è lu provanu i studii di suciulugia è di psiculugia suciale, l’usu di un neologisimu cum’è quessu quì hè un intentu pè fundà nove categurie in l’imaginariu cullettivu chì rendenu pussibuli novi miti, nove ripresentazione, nove cridenze. Tandu, a sola presenza di sto tipu di cuncetti in i discorsi politici hè una vittoria pè quelli gruppi.
A recuperazione di ‘ssu lessicu da u Ministru di l’Educazione Naziunale è a Ministra di u Insignamentu Superiore pare gravissimu quandu si sà da induve vene. Ci vole à stirpà ‘ssu vucabulariu periculosu è buciardu impostu da a strema diritta s’è no vulemu alzà u nivellu di u debattitu è cuncentrassi nant’à veri sugetti di sucetà.
Mammò m’avia ascultatu bè. « Aghju capitu bè, o figliulè », mi dicia tandu. « Ma allora, cum’è sarà chì si ne parla tantu à a televisiò, da mane à sera ? »
Tale hè a vera questione…