Mì ! Quassù in un libru chì ci piacia assai
Ci aghju ascosu un ritrattu di noi nant’a rena
Eramu ghjuvanotti incù listessi guai
Centu canzone in capu tempu ghjunta a cena
U to sguardu fughjia, u meu ti circava
Semu fissi cusì à nant’à quella carta
Ogni volta ch’a vecu, mi pare ch’ella scava
I ricordi ch’o tengu ma ch’a mimoria scarta
Mi scappa una rima ma quant’ella hè scarsa !
S’è t’eri sempre quì, a pudarii sceglie…
Una parolla toia è l’universu svarsa
Di ballate accuppiate intricciate à e meie
Ognitantu, ci voltu in stu locu sicretu
Chì chjamanu memoria ma chì porta u to nome
Tandu, chjodu u libru è mi ferma u rigretu
S’ell’ùn hè per istrada, s’acconcianu e some ?
A.P.
Fiura di Rose Luciani