À u miziornu di a mo vita
Ci hè un paese assulanatu
Sott’à un’ ambata salita
Un piscadore addurmintatu
À u miziornu di a mo vita
Ci hè una ghjesgia è trè casuccie
Cum’una storia pruibita
Viaghja in l’ecu di e voce
À u miziornu di a mo vita
Ci hè un paese citatinu
Un’ istatina inghjallicita
È calchì bichjeru di vinu…
À u miziornu di a mo vita
Ci hè una ghitarra chì sona
È una zitelletta ardita
Chì stà à sente a mo canzona
À u miziornu di a mo vita
Ci hè a sulana chì mi manca
Quand’in una stanza sbiadita
A ghjanna mea ùn si spalanca
A.P.
20/02/2021
Fiura : L’embellie, René Magritte