Corsica è Statistica sò duie parolle chì ponu fà surride chì sò assai alluntanate di a nostra realtà. Infatti, circà statistiche attualizate è di qualità annant’à a Corsica, ch’elle sianu ecunomiche, suciulogiche o pulitiche hè un veru castigu. Guai à quellu chì vole statistiche annant’à a viulenza di genere, annant’à a ghjunta di i turisti per naziunalità, u PIL di l’isula o dati annant’à a prupurzione di cursofoni. Per certi dati, vi perderete un bellu mumentu annant’à e rete per truvà a vostra risposta è altri, ùn truverate mai i dati.
E cunsequenze logiche di quella mancanza di dati a cunnuscimu ch’hè chì 1) i nostri pulitichi è l’amministrazione fanu è implementanu pulitiche publiche senza vera visione chjara annant’à l’imbusche; 2) ùn hè pussibile per a nostra amministrazione di cunduce un analisi di e pulitiche publiche ; 3) certe tendenze nove è fatti suciali/ecunomichi novi ùn sò identificati in tempu (viulenze di genere, inugualità ecunomiche, puvertà, fallata di u numeru di cursofoni…)
Cumu hè pussibile chì una regione cun un statutu particulare (ancu s’ellu hè debule) ùn hè capace di pruduce è analizà statistiche ecunomiche è sucetali?
Un monopoliu di l’INSEE annant’à e statistiche prudutte in e regioni
Prima di tuttu, ci vole à sapè ch’in Francia a pruduzzione di statistiche, ch’ella sia à u nivellu regiunale o naziunale hè centralizata. Una “direzzione regiunale di l’INSEE” furnisce un serviziu “decuncentratu” in ogni regione francese (e trè regioni di Guadeloupe, Guyana è Martinica sò attaccate à una direzzione interregionale unica), realizendu a raccolta di dati à u nivellu lucale è pruducendu statistiche è rapporti è studii à nivellu regiunale (per esempiu, analisi di i bacini d’impieghi o di u mercatu di u travagliu lucale).
Capite allora chì a pruduzzione di dati ecunomichi è suciali rispondenu à e dumande di i ministeri in Parigi è allora ùn piglianu micca in contu certi fatti suciali o ecunomichi propriu à certi territorii. Per quantu à a lingua corsa, l’INSEE ùn pruduce statistiche annuale annant’à u numeru di locutore di corsu allora chì seria una statistica impurtantissima per analizà l’efficacità di certe pulitiche linguistiche in Corsica, per fà un analisi annant’à certe tendenze linguistiche in Corsica. Per quantu à l’ecunumia sta pruduzzione di dati centralizatu impedisce e regioni di calculà un PIL regiunale precisu o altre dati chì puderianu esse utilizati da l’amministrazione di a Culletività di Corsica è i pulitichi corsi per elaburà pultiche publiche o prugrammi pulitichi basati annant’à sciffri è fatti. Si pò dinù pensà à l’attori di u settore di u privatu chì serianu bè cuntenti di pudè cunsultà dati è sciffri annant’à a salute di l’ecunumia corsa.
A Nova Caledonia hà u so propiu istitutu di pruduzzione di dati statistichi1Questu istitutu di pruduzzione di dati statistichi ùn si spiega per u statutu d’autonomia di l’isula. E premisse di quellu istutu di dati statistichi rimuntanu da l’anni 50-70.: l’Institut de la statistique et des études économiques. Hè interessantu per quellu chì s’interessa à a pruduzzione di dati statistichi d’usservà chì i dati statistichi prudutti in Nova Caledonia piglianu in contu i varii prublemi suciali è ecunomichi di l’isula, chì l’INSEE naziunale ùn averia mai pigliatu in contu s’ellu era centralizatu cum’è u casu ind’è noi. Quellu chì cuntrolla a pruduzzione di a statistica hè u maestru di a so emancipazione ecunomica !
Hè in questu cuntestu di pruduzzione di dati statistichi centralizatu chì a Culletività di Corsica creò ciò chì si prisenta cum’è un “INSEE di a Corsica” à u serviziu di l’amministrazione regiunale : Corsica Statistica.
Quellu istitutu regiunale ùn hà u scopu di rimpiazzà l’INSEE regiunale. Sicondu à Corsica Statistica “U scopu hè di riempie e lacune è guadagnà in reattività senza creà duplicazione di travagliu o di pruduzzione (…) A diffusione deve mubilizà i strumenti i più avanzati. (…) I dati prudutti o diffusi anu per scopu di mette in luce i prublemi socioecunomichi per l’attenzione di tutti l’attori. Sò necessarie forti garanzie per assicurà a qualità, l’interoperabilità è l’ogettività.”
U prublema di a precisione di a statistica prudutta oghje annant’à a Corsica
L’indicatore di referenze d’un ecunumia ch’hè u più cunnisciutu da a ghjente hè u PIL. In un sistema capitalistu, a crescita di u PIL d’un paese hè un indice di salute d’une ecunumia. Per a maghjurità di i paesi è regioni sviluppati in u mondu questi dati sò dispunibile in open data è l’amministrazione di u paese/regione ùn hà prublema maiò per calculallu. Tandu cum’è l’hà mostratu Guillaume Guidoni, ecunumistu corsu di Gecodia/Corse-économie, ùn esiste un indicatore per valutà l’evoluzione di a salute di l’ecunumia corsa perchè 1) i dati di u PIL per e regioni francese sò publicati ben troppu tardu (è dunque ùn anu nisuna utilità per i pulitichi chì ne anu bisognu per piglià decisioni putiliche ; 2) i dati di u PIL in Francia per e regioni sò calculati d’una manera chì ci hè un’imprecisione abbastanza ampia. Sicondu à u studiu “indicatore sinteticu d’attività” di Corse-économie “u so metudu di calculu [di u PIL di a Corsica] hè piuttostu imprecisu, perchè hè un’apprussimazione di l’evoluzione naziunale, senza calculi specifici nantu à i prezzi, a cunsumazione o l’investimentu per a Corsica”
Fortunamente, s’è l’autore prupone un indicatore alternativu per curreghje questa imprecisione, u prublema ferma chì ùn ci hè oghje un indicatore di PIL per a Corsica è per l’altre regioni francesi chì seria precisu, è dunque utilu per l’amministrazione lucale è i pulitichi.
Un antru prublema ch’hè ancu di più gravu hè quellu di a pruduzzione è l’usu di statistiche sbagliate à u nivellu europeu. Cum’è l‘hà mintuvata parechje volte Guillaume Guidoni s’osserva chì e statistiche riguardanti a “pupulazione per sessu, età, naziunalità, situazione d’impiegu è regione NUTS 2” per u periodu 2009-2020 sò senza misure cumune imprecise. Ramenta chì ci hà vulsutu à aspettà sin’à l’aghjurnamentu di l’ottu ferraghju 2021 chì e statistiche erronee nantu à a Corsica sò state marcate cum’è “(u): pocu affidabile” in i basi di dati.
Hè ancu di più gravu chì ste statistiche inaffidabili, sò aduprate in a realizazione di studii da Eurostat chì serviranu dunque da stimulu per a Cummissione Europea per pensà à e so pulitiche publiche europee. Sti quelli dati sò stati aduprati è sò sempre aduprati in i calculi d’attribuzione di fondi europei, è trà altri, u FEDER, FEARDER, FSE è u fondu di cuesione.
In u so rapportu annant’à a regione di a Corsica di u 2018, l’inspezzione generale di e finanze (IGF)2Fonte: Pour une économie Corse du XXIème siècle – propositions et orientations si lamenta chì “(…) in assenza di un tassu di disoccupazione di i ghjovani chì seguita i criterii di precisione è di diffusione d’Eurostat, a Corsica ùn hà prufitatu di u fondu d’aiutu IEJ in u 2014″. U risicu allora hè chì i stessi errori d’attribuzione saranu ripetuti in u 2021 quandu serà messu in ballu u novu bilanciu europeu.
A necessità d’una pruduzzione di statistiche di qualità, annant’à l’imbusche maiò di a Corsica muderna
Cusì, i prublemi ch’emu parlatu necessitanu risposte forte s’è vulemu capì i fatti ecunomichi è suciali chì si passanu in l’isula. A culletta di dati statistichi annant’à a Corsica, ch’elli sianu annant’à u numeru di corsofoni, un calculu di u PIL precisu di l’isula, dati precisi annant’à e viulenze di genere o a viulenza maffiusella sò impurtantissimi s’è l’amministrazione è i pulitichi volenu davveru risponde à i prublemi di i corsi. Piglià decisioni essendu accecatu ùn ci aiuterà à solve questi prublemi.
Di più, l’eventualità di custruì un INSEE regiunale davveru decentralizatu per a Corsica permetteria à i corsi cun diploma è chì sò assai qualificati in statistica, in matematica, in ecunumia, in suciulugia di travaglià in Corsica è limiteria u brain drain ch’hè unu di i prublemi maiò di a Corsica.