U 31 di ghjinnaghju di u 2021, Tempoli. Dui ori di mani.
A notti bughja d’invernu copri u silenziu di u coprifocu in La Jalva. Si sentini qualchi rimori di legnu piegatu da u ventu, annantu à a strada in surtita di u paisolu, in direzioni di Monsalviaga, altru quartieri di a cumuna di Tempoli, à 3,5 chilometri.
U presidenti François Degereja ùn dormi micca à st’ora quì. Fighjula l’urdinatori è Migrants TV.
Senti un 4×4 falà à fondu vicinu à a casa. À st’ora quì, hè stupendu.
U 4×4 si pianta ghjust’ accantu à a so casa è dui omi mascarati provani di entra ind’a casa pà fà un’arrubecciu. L’allarma si metti à sunà forti.
Eppò più nudda. Tutta iss’affari in menu di 45 sicondi, omancu u tempu di leghja a placca.
U lindumani, chjama a gendarmeria pà i custatazioni di passi. Porta lagnanza è dumanda u sustegnu à a pupulazioni via petizioni in linea.
À u bar, sò cunsternati. Faccia chjusa a mani dopu à l’avvenimentu. Tutti vedini François cum’è u guardianu di u tempiu. Essendu curiosu è scrucconu, pò essa criticatu qualchi volti.
Insulti à gogo, ne metti tutti i ghjorni annantu à i reti suciali è ne dici altrettanti in carrughju. Contr’à i migranti, contr’à i so anziani amichi sucialisti.
Contr’à tutti ch’eddu odia.
U 4 di frivaghju di u 2021, Tempoli.
Romain pidda a decisioni di prisintà una muzioni di sustegnu à François, à u cunsigliu municipali è à a righjoni induvà hè cunsiglieru di i ghjovani, elettu in lista « Front Social – Unité Populaire ».
« François, élu socialiste, toujours au service des gens, de l’Autre. Un être social au grand coeur, attaqué par cette tentative de cambriolage. C’est la démocratie qui est attaquée, le socialisme! » dici a sustanza di a muzioni.
In iss’assemblea di ghjovani di manca o « pentastiddati », ùn si ni rendini omancu contu.
In fatti, a muzioni ùn dici micca chì François pidda sempri i canuchjali pà spiunà i so vicini è lampa l’insulti di « Retourne au pays » à piaceri.
U Jalvesu hè sempri annantu à a so terrazza pà veda ciò chì i so vicini stani trafichendu. I vicini, pà fallu sorta un pocu da u quartieri, l’ani fattu eleghja annantu à a lista di Mònoga.
U 15 di frivaghju di u 2021, Tempoli. La Jalva.
U merri Mònoga si prumena ind’u quartieri incù qualchi eletti tra i quali François, Martine, Romain è tanti altri. Pari un armata Messicana in traci di priparà l’alizzioni tarrituriali pà u mesi di ghjunghju.
Martine ne apprufitta pà salutà l’avanzata di i travaddi ind’u so quartieri è di suttulineà l’arristati anti SDF presi da u merri. Romain, eddu, si vanta incù a ghjenti d’avè prupostu una muzioni « Ma commune sans migrants » à una sessioni di u cunsigliu municipali.
Venini tutti pà inaugura a nova funtana è u novu lavatoghju di u quartieri.
U merri cumincia u so discorsu davanti à 30 parsoni, da i quali Monica è « Madame Josiane ». Monica pari insultà à Josiane : « Eh toi! Tu m’as volé Simon! »
Josiane : « Je t’en prie! »
Ne una ne dui, Monica lampa Josiane in l’acqua cutrata di u lavatoghju è casca anc’edda, sott’à a risa di i spittatori.
Monica prova d’annigà à Josiane, piddendu a so ciuffa è tirendula vers’à l’acqua.
I media sò quì è piddani video chì diventani culti.
Monica diventa a donna più famosa di a righjoni. Qualchi video li sò cunsacrati ind’i bêtisiers di a televisioni
L’anzianu merri, Bainzu Gossotta, hè mutu. Ùn parla più. Ma parchì? Sarà malatu?
A vita hè sempri spiciali, quà in sù. Ancu Claudine a dici.