Manchester United – Milan

Facia 11 anni chì sti dui squadri ùn s’erani scontri. Tandu u Milan supranighjaia u so campiunatu, ma fu scunfittu da Manchester United 4-0 pà u ritornu di l’ottavi di finali di a Champions League, cù dui gol di Wayne Rooney contr’à a squadra di Pirlo è Ronaldinho. Era di marzu, in u 2010.

Un muscu di beddi ricordi è di Champions League dunqua, pà una partita aspittata da tanti, ma sta volta in l’ottavi di finali di a Auropa League.

A partita inizia bè pà i milanesi, cunfidenti, chì marcani à u 6u minutu. Ma stu gol hè annulatu par via d’una pusizioni di forighjocu di Leao, appena distrattu.

À l’11u, marca Kessié pà i rossoneri, ma sta volta hè annulatu u gol da u VAR, par via di una mani. Difficiuli da veda annant’à u screnu, è di sicuru nigata da l’attacanti.

Sarani po’ l’inglesi à fassi piriculosi ancu eddi, com’è annant’à un carciu d’angulu induva u capitanu inglesu Maguire si lampa nanzu à a gabbia biota di Donnarumma, ma tocca u ballò da u schincu è u manda annant’à u palu di u purtieri talianu.

Dui gol ricusati pà u Milan è un palu pà Manchester. Un 0-0 à a fini di u primu periudu, ma chì ci laca spirà un beddu spittaculu pà a seguita.

Dopu à a pausa, sò l’inglesi à duminà. Ma duminazioni ùn servi micca senza cuncritizzazioni.

Detta è fatta à u 51u, cù un gol di Diallo, intrutu 5 minuti nanzu, è chì prufiteghja di un ballò verticali d’un altru mondu da Bruno Fernandes, fendu passà u ballò da sottu à u purtieri talianu da una bedda capata. 1-0 pà l’inglesi.

U Milan strazia dunqua pà un beddu quartu d’ora nanzu di dimustrà più vulintà è energia in issu periudu, supranendu i Red Devils in a maiò parti di i duelli, à parta da l’ora di ghjocu. Hè cusì ch’eddi diventani sempri più piriculosi l’omini di Pioli, avvicinendusi à u gol di Henderson di più in più.

Ma à stu liveddu, conta solu u risultatu, è i milanesi ùn sò micca aiutati da i numarosi impiastri tecnichi di Leao.

Straziendu appena di fatti pà finiscia i so azzioni vicinu à a gabbia, l’attacca taliana ùn pianta di ramintacci l’assenza di Ibrahimovic, u so finiscidori mediaticu.

Vultatu in Auropa pocu fà da a MLS, Zlatan, tandu uccupatu à fà l’animazioni in u fistivali di San Remo, hà marcatu par avali 14 gol in altrettanti apparizioni cù i taliani, parendu cusì cunfurtevuli indè i rossoneri quant’è in California (31 gol in altrettanti partiti incù i LA Galaxy).

Ùn era micca solu l’attacanti à mancà: Pioli duvia cumpona cù 5 titulari in menu. Eppuru, sta squadra ricumposta daghjia spiranzi.

Ma attachendu attacchendu, à pocu à pocu si stancheghja, è Manchester pari di cumincià à ripiddà a maistria di a partita versu l’ultimu quartu d’ora, cù unipochi di novi uccasioni.

È cusì l’inglesi mancani di pocu di tumbà i spiranzi milanesi à u 72u cù un’uccasioni tamanta, mancata da James.

Ma à parta da l’87u minutu, munupulizzendu u ballò, i milanesi, purtati da Kessié, mai domu, ci ramentani u so ardori.

L’omini di Pioli ùn hani ditta a so ultima parolla, è voltani à martirizzà parechji volti a difesa inglesa, chì ùn trova mancu u tempu d’accenda la sigaretta.

Ma cù sta macanza di rialisimu da a parti di i taliani, l’ospiti s’avvicinani sempri di più à una vittoria, incù po’ un clean sheet ditirminanti pà st’ottavu di finali andà in casa soia.

Furtissimi ancu fora, si sà chì i Red Devils sò capaci a marcà in ogni stadiu. Piddani dunqua un’uzzioni seria pà a qualificazioni in i quarti di finali.

Ma in u Ballò, a partita ùn hè compia sin’à u zifuleddu finali, è in u 92u minutu, i taliani sò finalamenti ricumpinsati pà i so sforzi: capata di Kjaer pà l’ultimu carciu d’angulu, chì metti i dui squadri à paru.

U risultatu un scambiarà più: 1-1

Bedda oparazioni à a fini pà i rossoneri, incù stu gol marcatu fora. Li tuccarà à imponasi da veru in casa soia u 18 di Marzu pà u ritornu, soca rinfurzati sta volta da a vultata di i so ghjucadori chjavi com’è Rebic, Hernandez è « Ibrà », a so stedda di 38 anni, animadori in u ghjocu quant’è in i media.

Lasciate un cummentu ?

Questo sito usa Akismet per ridurre lo spam. Scopri come i tuoi dati vengono elaborati.