Tempoli tempi fà – Capitulu 15 “Gossotta in paradisu”

U 24 di frivaghju di u 2021, Tempoli. Clinica di Boriogana.

L’anzianu merri di manca hè dapoi à una sittimana in clinica, uspitalizzatu pà una cancaru di a carnidolci (pancréas). Da duttori generalistu, avia suvitatu tanti pazienti ind’a so vita chì sta volta, era eddu à essa suvitatu ed accumpagnatu finu à a morti.

Issu munimentu di a storia Tempolisi hè in traccia di mora, senza nimu in ghjiru à eddu, vistu u cuntestu sanitariu. Soffri mori. Si piega di dulori.

A manca hè sparita incù eddu. Issa spiranza pupulari hè sparita ed hè stata rimpiazzata da l’idei frontisti di a squadra sustinuta da eddu stessu.

Ne una ne dui, dumanda ad essa surtitu da a clinica pà mora ind’è eddu, pà avè una morti degna.

U 24 di frivaghju di u 2021, Tempoli. In casa di Bainzu Gossotta.

U fiddolu di Gossotta cuntatta una donna tutta vistuta in neru, ditta « Agabbadora », incù un veli annantu à a so testa.

Veni in casa dopu à nov’ori di sera incù una piccula coppia (joug) è a piazza daretu à a testa di u malatu chjinatu ind’u so lettu di morti.

A coppia hè missa pà trè ghjorni è trè notti daretu à a testa di Bainzu.

S’eddu mori senza dulori. Và bè.

S’eddu mori incù viulenza duranti à issi trè ghjorni è trè notti, voli dì ch’avia fattu qualcosa incù a coppia ch’ùn si duvia micca fà.

S’eddu ùn mori, l’Agabbadora riveni una notti è tomba u malatu.

U 27 di frivaghju di u 2021, Monsalviaga. 10 ori di sera.

In issa notti bughja di frivaghju, l’agabbadora riveni in casa di Gossotta incù u marteddu.

A donna entra ind’a stanza, vedi Bainzu sempri vivu. Edda faci sorta u fiddolu da a stanza è metti tutti l’ughjetti in terra, ghjirati vers’à u bassu.

Bainzu, eternu laicu, accetta a ceremonia religiosa chì suvita, vistu chì a femina agabbadora dici « Chì diu sia quì! ».

Issa donna pidda u marteddu è pichja un colpu annantu à l’ossu parietali di u munimentu Tempolisi. Si ne mori subitu.

A donna si ne và.

Una manera gadduresa di mora, quissa.

U 1mu di marzu di u 2021, Monsalviaga

Più di 2000 parsoni senza mascara sò adduniti ind’i carrughji stretti di Monsalviaga. Tutti s’abbracciani, à dispettu di i reguli sanitarii in vigori.

D’altrondi, u merri hè u primu à dà l’ordini à a ghjenti d’ùn pûrtà a mascara è d’ùn fassi vaccinà.

Issu primu di marzu, u tempu hè caldu è l’aceddi cantani. Cantani a paci chì purtaia Gossotta in cità.

Gossotta essendu urighjinariu d’Alimeddas, paisolu in periferia di Tempoli, hè intarratu in sù, ind’a nevi chì copri u tarrenu di famidda.

Annantu à a tomba, ci hè un mazzolu di carofanu (uchjettu), una falci è un marteddu, in referenza à i so idei sucialisti.

À l’intarramentu, un ripastu hè prupostu à tutti. Ancu una volta à dispettu di reguli sanitarii.

U merri Mònoga hè u prima à pienghja quiddu chì li ha fattu tantu bè mà magnà cum’è un famitu. Listessa pà Michel Migalli, par asempiu.

Ben sicura, dopu à l’intarramentu, si scoprani 405 casi di coronavirus. Dodici parsoni morini una sittimana dopu à iss’intarramentu. A raghjoni ci hè : imprudenza di i Tempolisi.

Sta volta, si pò dì, Gossotta hè à u paradisu. Hè mortu è hà purtatu via qualchi amichi incù eddu.

Ùn sarà micca solu à veda da sopra ciò chì si passa in Tempoli.

Lasciate un cummentu ?

Questo sito usa Akismet per ridurre lo spam. Scopri come i tuoi dati vengono elaborati.