À chì scorda li so sogni affaccatu à a cunfina
Di e stonde zitilline, scorda l’acque di e funtane
Quandu l’estru chjapparà per ‘ste cullette suprane
Chì traccianu li distini quant’è u tempu camina
Teni un scornu di u to celu quandu vene u timpurale
À u core u ti sciacchi è l’appicchi à u to muru
Culurisci ogni catagnu di u to prisente scuru
È senti cantà l’acelli cù un accentu nustrale
E to radiche sò quindi ma u to capu hè in altrò
Scopri lochi scunnisciuti al di là di a to vita
È viaghji, è viaghji sin’à tuccà l’infinita
Stracciatura di li toi ch’ùn t’anu vistu maiò
È quandi à a to porta pichjarà una vuciuccia
Chì ti cuntarà u sole, chì dipinghjarà d’un trattu
U dicoru d’un passatu è u primu passu fattu
Di quella chì t’assumiglia è chì sarà la to ciuccia
Tandu, ama li so ochji cristallini quant’i toi
Quantu eiu l’aghju amati ‘ssi monti è ‘ssi fiumicelli
‘Ssa casuccia eppo ‘ss’alivi è ‘ssi chjuchjuli d’acelli
Eppo spartarè cun ella ogni to sogni ritrovi
A.P.
07/03/2021
Fiura : Alba a San Cipriano, 23/03/2020, Rose Luciani