2 ore di dopu meziornu, tribunale di Bastia. L’accolta si densificheghja à misura ch’è i minuti passanu è ch’è u mumentu per u curtegiu di mette si in muvimentu ghjunghje. Frà i manifestanti, donne, per u più, ma dinù omi, zitelli, zitelloni. I manifestanti inarbureghjanu i pannelli di differente rivendicazione : « Pigliate e nostre lagnanze », « ùn fighjulate micca, raghjunghjiteci », « innò hè innò » è d’altri, à i messagii più bughji : « à e donne assassinate », « incestu, sciappemu u silenziu ».
U curtegiu parte è ferà a so stretta sinu à a piazza San’Niculau, forte di 300 persone, sculpendu i differenti motti feministi, è richjamendu, quessa è quà, di i simbuli di e so lotte. ‘Ssu 8 di Marzu, spiciale in Corsica, marca e nove lotte di l’isula.
« #Iwas », donne e surelle, collage féminicide corse : i novi visi di u feminismu in Corsica
I muvimenti di prutezzione di e donne sò sempre stati prisenti in Corsica, in particulare incù a prisenza di u Centru d’Infurmazione di i Dritti di e Donne è di e Famiglie di u Cismonte. Difatti, ogni annu, u CIDFF accoglie in senu à a so struttura 500 à 600 persone in cerca d’aiutu, vittime di viulenze, donne senza-aggrotti, mamme sole.
Eppuru, e mubilisazione feministe in Corsica oghje sò inusitate, è ciò dapoi u muvimentu « #Iwas ». ‘Ssa iniziativa, nata annantu à e reti suciale, hà liberatu a parola di e donne in Corsica cuncirnendu a rialità di l’aggressione sissuale è sissiste in Corsica. Mentre l’estate 2020, centinare di donne corse anu spartutu e so tistimunianze annantu à Twitter, Facebook, Instagram. Sò state suvitate da manifestazione à traversu a Corsica, mubilizendu centinare di persone. I cullaghji di l’assuciazione Collages Féminicides Corse anu fiuritu dignalocu in l’isula, cù motti forti : « à e nostre morte », « cunfronta u to amicu furzatore », « educate i vostri figli », è messagii in omagiu à e donne morte sottu à i colpi di i so cunghjunti.
Ma ‘ssu muvimentu ùn hà micca fattu ch’è svilà l’aggressione è i furzaturi passati sottu silenziu dapoi anni è anni. À traversu a liberazione di a parola, differente tematiche anu spuntatu, in ecu à e differente mubilisazione pigliendu piazza annantu à lu cuntinente dapoi anni. Abburdà e tematiche di a prutezzione di e donne, di e viulenze fatte à e donne ma dinù e quistione d’ugualità, di a piazza di e donne in a sucità, a quistione di u razzismu o ancu quella di e lotte LGBT.
Eccu : quistannu, per l’ 8 di marzu, di solitu assai calmu in l’isula, hè fiurita a vulintà di manifestà.
I militanti impignati per a ghjurnata di l’8 di marzu : trà speranza è critica di un sistema
Per i militanti prisenti oghje, ‘ssu 8 di marzu hè propiu particulare. « Ùn averia mai imaginatu in Corsica un 8 di marzu cum’è questu, micca nanzu à u muvimentu « #Iwas ». Ci hè un’apertura di l’ascoltu, grazia à a quale omu cuntinuerà. « Guardate ci, ascultate ci, sintite e nostre parolle. Dapoi chì avemu fattu u muvimentu « #Iwas » è dapoi chì si hè liberata a parola, dapoi chì simu ascultate, ci hè di più di prugetti chì sò fatti » dichjara Triss, di Collages Féminicides Corse. « Avemu dighjà avutu parechji appuntamenti incù u prifettu è l’attori principali di e forze di l’ordine per infine accoglie à u megliu e vittime chì portanu lagnanza à u cummissariatu ». Un custattu in mezu tinta eppuru. « Pensu ch’è l’ascoltu hè liberatu, ma a piazza di a donna in Corsica ùn hè micca tutalmente liberata. Ci hè una sorta di patriarcatu benevulente chì regna, ma quessa restu patriarcatu. Più si passerà u messagiu, più si cuntinuerà à manifistà, più e donne piglieranu a so libertà ».
Juliette è Charlotte Grisolia sò e duie militante à a sorge di a manifestazione d’issa dumenica 7 di marzu. Per Juliette, l’8 di marzu era una necessità. « Quand’è noi avemu vistu chì nulla ùn era privistu per l’8 di marzu, avemu dicisu d’urganizà ‘ssa manifestazione, incù l’assuciazione incù e quale aviamu tissutu ligami. L’assuciazione anu subitu subitu rispostu prisente ».
Per Juliette, l’urganisazione d’issu 8 di marzu hè a marca una nuvella epica di u feminismu in Corsica. « Ciò chi femu oghje, ùn hè micca novu : esistenu in Corsica militanti di data. Ciò chì attempa oghje, hè ch’è a nostra generazione si mobilizeghja à tempu in carrughju è annantu à e reti suciale. Ci hè statu una presa di cuscenza in una rigione duve ùn era micca vintu d’avanzu. Simu in una rigione induve mobilizà si hè difficile, ùn ci sò micca grande cità cum’è in cuntinente o in u restu di l’Auropa, è pensu ch’è à ‘ssu ghjornu simu una di e sole rigione di ‘ssu tipu à avè cunnisciutu tale mubilisazione ».
A ghjovana donna face dinù un custattu criticu di u trattamentu di e quistione ligate à e donne oghje. « Hè necessariu d’ascultà e differente assuciazione, in particulare da u latu di l’esecutivu. Certe assuciazione anu riagitu male à u pianu di l’esecutivu di Corsica per l’ugualità omu-donna, ùn sò micca state cunsultate. I muvimenti feministi sò quì per fà diminuisce e suffrenze, l’esecutivu hà i mezi di mette à l’agenda ‘sse prublematiche. Ci vuleria una riazzione più viva di l’esecutivu cuncirnendu ciò ch’è l’assuciazione è militanti sottulinianu ».
A criazione di un ossirvatoriu di e viulenze fatte à e donne in u 2021
In core à a manifestazione, rivendicazione, stizza, ma dinù speranza. « Dopu à 14 anni di lotta, aghju a felicità d’annuncià vi ch’è l’esecutivu di Corsica ci hà intesu. Oghje, avemu avutu a cunferma ch’è u cunsigliu esecutivu di Corsica hà da crià, da quì à pocu, un ossirvatoriu di e viulenze fatte à e donne ». Hè incù ‘ssa nutizia ch’è Rosy Fieschi Sarrola, di l’assuciazione Femmes Solidaires (Donne Sulidarie) di Corsica, introduce u so prupositu. « E donne corse sò allughjate à listessa insegna ch’è l’altre donne in Francia, è à spessu megliu ch’è assai donne di u mondu, ma quessa ùn vole micca dì ch’è tuttu và bè ».
In core di l’assuciazione Femmes Solidaires dapoi anni, Rosy Fieschi Sarrola face un bilanciu propiu astutu : « E battaglie purtate da assuciazioni feministi dapoi anni anu permessu numerosi acquisti, ma ‘ssi acquisti ùn sò micca eterni. Ciò ch’è eiu cunsigliu à e ghjovane generazione, hè di firmà fidele à u travagliu ch’elle anu fattu affinch’è ‘ssi acquisti ùn spariscanu micca. Hè evidenti ch’è in Corsica e ghjovane si mobilizeghjanu oramai, ùn ci vole mai à calà i bracci ».