U 9 di nuvembre in u circondu di 10 ore di a sera ora francese, u prima ministru armenu Nikol Pachinian annuncia annantu à a so pagina Facebook avè pigliatu una “Grava è dugliosa decisione per ellu è per u so populu ”
Venia da firmà minuti capunanzu sottu à l’egida di a Federazione di Russia è in prisenza di u presidente azeri un armistiziu visendu à mette un termine à u cunflittu chì oppunia u so paese incù l’Azerbaigianu dapoi 1 mesi è mezu ghjornu per ghjornu. Quellu intrì in vigore une poche di ore dopu a so firma è mette un termine à 30 anni di prisenza militaresca armena in l’Altu Karabagh, rigione sturicamente pupulata d’armeni ma chì a cumunità internaziunale ùn ricunnosce micca l’esistenza. Difatti, l’Altu Karabagh hè ufficialmente ricunnusciutu cum’è territoriu azeri è ùn benefizieghja micca da u drittu à i populi à dispone di elli stessi.
A dichjarazione di cessate u focu scelle tandu a sorte di a Ripublica di l’Artsakh chì mentre una trentina d’anni hà esistuta cum’è ripublica indipendenta difatti.
À contu di u 10 di nuvembre, l’Armenia deve dunque piigà si à l’accordu seguente chì vi riassumimu i principali punti quì sottu :
- Tutte e rigioni internaziunalmente ricunnusciute cum’è azeri duveranu prugrissivamente esse evacuatu da e forze armene per u 15 di nuvembre in certi distrittu, 20 di nuvembre per d’altri è insin’à u 1 di dicembre per i distritti i più isulati.
- I dui parte duveranu ristituisce si i prigiuneri di guerra è ancu i corpi di i cumbattenti morte à u cumbattimentu.
- Un cuntingente di circa 2000 suldati di a Federazione di Russia assicurerà a sicurezza in e rigione di l’Altu Karabagh chì ùn sò micca statu catturatu da l’azeri. ‘Ssu cuntingente assicurerà dinù a sicurezza trà u curridore di Lachin chì permette a circulazione di bè è di persone trà l’Armenia è certi distritti di l’Altu Karabagh. I suldati russii seranu prisenti per 5 anni, ricudunciabile automaticamente.
- Tutte e leghe ecunomiche è di trasportu di a rigione seranu ristaurate. A Ripublica d’Armenia garantisce a sicurezza di e leghe di trasportu trà e rigione occidentale di a Ripublica d’Azerbaigianu è a Ripublica autonoma di u Nakhitchevan (Azerbaigianu) cù u fine di organizà a libera circulazione di i citatini, i veiculi è e robe in dui sensu. U cuntrollu di i trasporti serà esercitatu da i guardia di u Sirviziu federale di sicurezza di Russia.
- I cullucati interni è i rifughjati vulteranu annantu à u territoriu di l’Altu Karabagh è in e rigione aghjacente sottu à a supervisione di l’Offiziu di l’Altu Cummissariu di e Nazione unite per i rifughjati.
- Per accordu di e parte, a custruzzione di e nuvelle cumunicazione di trasportu cullighendu a Ripublica autonoma di u Nakhtchivan è e rigione occidentale di l’Azerbaigianu serà assicurata
Territurialmente, l’accordu si traduce cusì :
Si tratta di un’umiliazione tutale per l’Armenia chì ùn vede nissuna cuncissione accurdata per e pupulazione armena di l’Altu Karabagh. Micca ufficialità di lingua armena annantu à l’Altu Karabagh, micca d’autonumia nè di ricunniscenza particulare, u presidente azeri hè statu intransigeant “U statutu d’autonumia hè partutu in infernu”. L’armeni di quelle regioni anu principiatu à brusgià e so case prima di fughje u so paese per ùn lascià nunda à l’azeri chì piglieranu u cuntrollu di guasgi tuttu l’Altu Karabagh da qui à pocu.
Tandu, scupremu avale inseme e raghjone di a disfatta armena di pettu à un’armata azeri chì ùn hè mai statu in difficultà in u corsu di ‘ssa corta guerra
1. Isulamentu internaziunale di l’Armenia
Da u principiu di a Siconda guerra di l’Altu Karabagh, ùn sò statu nissunu paese à ufficialmente sustene l’Armenia tandu sò stati numerosi i paesi musulmani, è sopratuttu a Turchia à sustene l’Azerbaigianu, dendu arme, cunsigliu militarescu è munizioni per e so uperazioni militari. A Russia, alleata militare di l’Armenia cun l’Organisazione di u Trattatu di Sicurezza Culletiva (OTSC) ùn s’hè pressata à aiutà l’Armenia ch’era in difficultà da u principiu di a guerra. E ragioni per sta mancanza d’aiuta sò parechje.
Prima, l’Altu Karabagh hè internaziunalmente ricunniscitu cum’è territoriu azeri, ciò chì piazza à l’Armenia cum’è putenza agressora in sta guerra. U pattu hè defensivu è cuncerna solu u territoriu riccunisciutu internaziunalemente di l’Armenia. U presidente russu hà sempre affirmatu per u cunflittu ch’u so paese aiuterà à l’Armenia s’hè ci hè un aggressione diretta contru à u territoriu armenu internaziunalmente ricunnisciutu. Sicondu, u Primu Ministru Nikol Pashinyan ùn piace troppu à a u guvernu russu perchè pare à Putin troppu liberale è appena troppu à prò di l’Occidente. Infatti, à Pashinyan hè duvintatu Primu Ministru dopu à a Rivoluzione di u 2018 quandu i pulitchi corrotti sò stati capivultati da u populu armenu. Ùn sustene à Nikol Pashinyan hè una manera di fà cascà u so guvernu è rimpiazza lu per un guvernu à prò di l’interessi russi. Hè dinù un modu di fà passà un missaghju à a classa pulitica armena: ùn pudeti assicurà a vostra sicurezza s’è ùn site alleati pienamente cun noi.
2. Un’Armenia micca pronta per una guerra di u XXIismu seculu
S’è a Prima guerra di l’Altu Karabagh in l’anni 90 era caratterizata da una difesa di i piani maiò da l’armeni è di fà rinculà l’assalti di cari armati è di suldati azeri, a Siconda guerra dimostra un gran cambiamentu di strategia militaresca da a parte di l’azeri. Fendu usu di droni turchi è isareliani di prima trinca, l’azeri anu appruffiatti chì l’armeni ùn avianu ne mudernizatu a so armata ne messu à ghjornu a so strategia di difesa di u territoriu per bumbardà un’à una e pusizioni difesive armene. Pochi droni sò stati distrutti da l’armeni per ‘ssa guerra è e misure anti-droni cumprati da l’Armenia à i Russii ùn anu dimustratu a so efficacità. I suldati azeri, elli aspittavanu darettu chì i droni fessinu u so travagliu di distruzione di e difese per attaccà dopu à l’armeni. Quandu i suldati azeri principiavanu u so assaltu, valia à dì chì e pusizioni armene eranu già distrutte da i droni. A cunquista di i territorii era allora senza difficultà particulare.
Di più, l’usu di i droni chì significava u risicu d’esse bumbardatu à ogni mumentu spaventava e truppe armene ch’eranu sempre ubbligate à usservà u celu per i droni azeri. In quelle cundizioni, ùn era pussibilie di priparà un assaltu è fallu per ripiglià u terrenu persu. L’armeni ch’ùn avianu cumprati à robot per fà a guerra si sò ritruvati à mandà a so ghjuventù à fà si tumbà da droni fabricati in Israele è in Turchia. Hè soprattutu quella a lezione a più impurtante di quellu cunflittu: i paesi chì tarderanu troppu à mudernizà a so armata, à include à robot in a cumposizione di a so armata seranu ubbligati in l’avvene à mandà i so figlioli à fà si tumbà da robot manipulati da suldati nemichi in Bunker or da cari armati è droni armati cuntrullati da l’AI (Artificial Intelligence).
Pare evidente chì l’azeri anu preparatu a so rivincita di l’anni 90 quandu a Prima guerra di l’Altu Karabagh s’era compia da una scunfitta di l’azeri allora ch’elli eranu in supperiurità numerica è a u listessu nivellu tecnulogicu chì l’armeni. In Azerbaigianu, ci hè petroliu è u guvernu azeri hà fattu usu di i soldi di u petroliu per mudernizà a so armata, cumprendu per esempiu droni à Israele è a Turchia chì sò dui paesi chì fabricanu droni di cumbattimentu di qualità. L’Armenia hè un’ecunumia isulata perchè i so vicini ùn cumercianu cun ellu. Dapoi aprile di u 1993, a Turchia mantene chjusi i so 380 chilomitri di cunfini incù l’Armenia. Una decisione presa à l’epica in sustegnu à u regimu amicu è alliatu di l’Azerbaigianu, in guerra da 1988 à 1994 contru à milizie alliate à Erevan in a Prima guerra di l’Altu Karabagh.
È avà? Un populu micca prontu per a disfatta…
Sò numarosi l’armeni ch’ùn anu accitatu a disfattu è chì anu manifestatu quandu l’armistiziu hè statu firmatu. U parlamentu armenu hè statu assaltatu a notte di l’armistiziu da manifestanti à prò di una cuntinuazione di a guerra è u presidente di u parlamente armenu hè statu agressatu.
Ancu u Primu Ministru Armenu ch’hà firmatu l’armistiziu ùn hè suddisfattu di u risultatu di sta guerra. U 15 di nuvembre, s’hè spiazzatu in l’Emirati Arabi Uniti (EAU) ch’hè un paese nemicu di a Turchia annant’à tutti l’imbusche giupulitiche di a regione. Una ristruttarazione di l’armata è l’ecunumia armena sustenita da l’EAU per priparà una rivincita in qualchì anni? Wait and see.
