Tempoli, tempi fà – Quintu capitulu « U tempu di i nucioli »

Tempoli, u 26 d’aostu di u 2011.

Claudine si ne va un’ora à circà i nucioli ind’è l’ortu in terrazza vicinu à u Brasileiro.

Ci n’hè pocu.

Manc’assai pà metta ind’a pasta à a nuciola.

Torna in casa è a so mamma di 88 anni ùn rispondi micca. Stranu pà una donna chì chjachjara sempri, ancu da sola.

Claudine ghjunghji ind’a sala da pranzu è a trova morta annantu à u sofà.

S’essendu assicurata chì fussi morta , faci u necessariu pà pudè metta in baddu u so intarramentu di manera a più degna pussibuli.

U più cuntentu hè Michel. Cuntentu parchì ?

Parchì avia messu in baddu un pianu ind’u quali avaria espulsatu à Claudine dopu à a morti di a so mamma è avaria fattu vena à Muriel ind’u bar.

Tuttu quissa dopu à u matrimoniu di a so fiddola Carla, u 3 di sittembri in Salzena, cumuna ricca di a periferia di Ferona situata à 1800 metri d’altitudina.

Salzena, u 3 di sittembri di u 2011.

Carla Migalli si marita.

Si marita incù l’animatori televisivu è segretariu naziunali di u PST à a laicità, Stéphane Delmitta, 32 anni.

Omu puliticu riputatu scrucconu à tal puntu chì si dici chì u so casteddu di Salzena saria statu pagatu arrubendi ind’i casci di a merria induva u so babbu hè merri.

À issu matrimoniu, ci sò 550 parsoni. Tantu mondu.

Ci hè u merri di Tempoli, u presidenti di a Televisioni Tolsana è ancu u cuginu prufissori emeritu di l’università di Ferona, Bernard Santollena è a so donna Francette anch’edda prufissori.

Issu matrimoniu si passa bè, l’invitati cantani, baddani. Cum’è à un matrimoniu tipicu.

À un eccezzioni nutevuli, u pusiziunamentu di trè cunvivi di u matrimoniu : Claudine (in dolu), Muriel è Violette Zibba (ex di Michel, mamma di Carla) sò pusiziunati accantu à a tola di u ripastu di u fastuosu matrimoniu, Michel si essendu missu tra Claudine è Muriel.

Situazioni particulari, i donni ùn si parlani mancu appena è Michel criticheghja senza filtru Violette davanti à tutti l’invitati, ciò chi culpisci mori à Francette, chì trova strani issi maneri di fà.

Francette dici à u so maritu, tremendu : « Mais où suis-je tombée cher Bernard ? Quel culot ! »

Figuraccia di i tre donni in issu celu mezu turchinu.

Tempoli, u 12 di sittembri di u 2011.

Una volta l’intarramentu di a mamma di Claudine è u matrimoniu di a so fiddola passati, Michel pidda una decisioni radicali : fà parta à Claudine di u bar-risturanti, malgradu u fattu chì u cummerciu sia à edda.

Sei ori di mani.

Claudine dormi sempri. Michel, aitutatu da Muriel, ne apprufitta pà biutà i mobuli di l’affari di Claudine. Trent’anni di vita cumuna sò missi in ottu valisgii.

Dopu à trent’anni di viulenza publica contr’à edda, dopu à trent’anni di sufferenza murali, l’hà cacciata di casa, di u bar, di u risturanti. Cusì, in trenta minuti.

Tira Claudine di u lettu, a faci cascà in terra. Claudine si sveglia in terra inchjerchjata di valisgii. Grida, dumandendu à Michel ciò chi si passa.

Michel rispondi : « Eh bah, ta mère a crevé, tu dégages ! Allez, oust ! Tu me fais chier !»

Muriel aghjusta : «Allez, ce n’est rien ! Personne ne t’aime ici ! Tu es une loque ! Même ta fille ne veut plus te voir ! »

Claudine : « Vous vous croyez intéressants ? Ciao les nazes, allez ! Plus envie de vous voir moi ! »

U ghjornu stessu, a clientela hè stunata d’ùn veda à Claudine. Michel spiega chì Claudine hè stata cacciata parchì insuppurtevuli è chì Muriel l’hà rimpazzata.

Cusì, in un’ora, Claudine hè partuta in casa soia, in Ferona, cità à 150 km di Tempoli. In issa cità, hà sempri una casa. Hà sempri i so cuntatti pà essa aitutata dopu à essa stata missa fora d’ind’è edda.

Claudine camina à fondu fin’à a so tamanta casa di Ferona. Una casa di maestru di 300 m² ananntu à 3 piani chì pudarà metta in affittu s’è u bisognu si faci senta.

Malgradu à u fattu chì sia stata missa fora di a so casa Tempolesi, chjama sempri à Michel.

Pudareti pinsà chì u bar-risturanti di u Brasileiro saria statu senza cucinaru duranti à mesi è mesi dopu à a partenza di Claudine ?

Vi sbaddeti in issu casu, chì Muriel hà lasciatu a gestioni di u so bazar à impiegati è direzzioni provisoria (chì dura). Muriel hè a nova cucinara di i lochi.

Claudine rivinarà più tardi, ma micca pà i raghjoni chì si pò pinsà.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.