Tempoli, tempi fà – Quartu Capitulu : “A strolaga.”

Bar u Brasero, Tempoli, u 26 di dicembri di u 2008.

Claudine faci i carti pà veda s’edda starà incù Michel pà l’ani chì venini.

Faci dui scuparti tremendi : A so mamma avarà bisognu d’edda. Ma comu ?

Un omu stranieru à a famidda farà cosi gravi ind’a casa. Ind’u so bar ?

A prima, Claudine sa chì a so mamma hè anziana è ùn pò più spiazzassi da sola.

A siconda, ci hè un clienti à spessu viulenti è imbriagatu di u nomu di Marcelin.

Podassi hà tuttu induvinatu.

Dui ghjorni dopu, a mamma di Claudine chjama. Si dici malata è hà bisognu di sustegnu da a parti da a so famidda.

Senza dubità una siconda, Claudine si ne va in casa soia à circalla pà purtalla à l’alloghju sopr’à u bar.

Cusì, s’in occuparà meddu.

Ben sicura, Michel accetta è Mme Zamparra si mantenarà dui anni ind’è u so appartamentu prima di mora.

Di manera evidenti, Michel cuntinuveghja à frequentà à Muriel à l’appiattu.

U peghju hè chì, mentri a mamma di Claudine hè ind’è eddi, a clientela cambia pocu à pocu è i clienti sò di più in più i briaconi d’issi lochi. À tal puntu chì a sera di u 31 di dicembri di u 2008.

Bar u Brasero, Tempoli, u 31 di dicembri di u 2008.

Novi ori di sera.

I clienti sò in traci di magnà una raclette è sò tutti allegri. Cantani, parlani forti, sò felici di passà a vigilia di capudannu. Tutti sò felici ?

Saria essa baciardu di dilla chì Emile, abituatu di i lochi hè à u so dodicesimu bichjeri di tola d’« abbardente » (prununcia : baldente), acqua vita. Acqua vita incù 96° d’alcool. Tandu, 2,5 cl bastani à fà passà un omu sopr’à i 0,5 g/l d’alcool ind’u sangui.

Emile, briacu zuffu cumincia à cantà, briunà di manera incunsiderata ind’u bar-risturanti.

Claudine, da donna magra, ùn pò fà nudda di pettu à i 115 chili è 2 metri 05 di Emile.

Vers’à ondici ori è trenta, rifusa di serva un bichjeri à Emile.

Emile, tandu, briona, ma senza andà più luntanu ind’è l’insulti.

Si ne va in casa.

Fin’à quì va bè.

Ondici ori è cinquanta sei.

A notti hè bughja ma animata, a ghjenti sta fistighjendu una fini d’annu, quiddu di u 2008.

Emile entra ind’u bar è minaccia à Claudine.

Michel ùn prova mancu di pruteghja à Claudine, lasciendu Jacky, u ghjucadori di belote, è edda soli di pettu à Emile.

Emile a minaccia eppò casca in terra à ondici ori è cinquanta novi, prima di i dodici colpi di u primu di ghjinnaghju.

A pulizza ùn ne saparà nudda.

A vita hè sempri assai particulari in issa cità.

Lasciate un cummentu ?

Questo sito usa Akismet per ridurre lo spam. Scopri come i tuoi dati vengono elaborati.