L’Altu Karabakh, tarritoriu muntagnolu è inchjudatu di 150 000 abitanti, cugnumatu « Nagorny » in lingua russa quand’iddu facia parti di l’Unioni Suvietica hè diventatu u locu d’una guerra aparta à a porta di l’Auropa.
L’aghjenti chì campani nant’à sta tarra sò l’ortodossi d’urigina armeniana par a maiora parti, eppuru sò amministrati da l’Azerbaïdjan, paesu musulmanu. Una situazioni pulitica, riligiosa è etnica ch’hà participatu à crià un sintimu di distaccu tarrituriali ind’è l’armeniani dapoi a fini di a Guerra Fresca. Stu fronti di litichi s’era firmatu à l’iniziu di l’anni 90 dapoi a prima dichiarazioni siguitata subbitu da una guerra sanguinosa trà u 1991 è u 1994, fendu 30 000 morti. Oghji a fruntiera hè disturbata di novu incù l’Azerbaidjan, aiutatu da a Turkia chì prova da cunquistà u Nagorny-Karabakh independentistu, sustinutu da l’Armenia.
A dumenica passata, l’Altu Karabakh hè statu culpitu da i forzi azerinchi par avè lanciatu una prima attaca sicondu li ditti di l’Azerbaidjan, ma u tarritoriu ortodossi ùn pussedi nissuna armata, ch’hè diffesu da l’Armenia ch’hà rispostu subbitu da a forza militaria, intrendu in una crescenza di viulenza dapoi dui sittimani. U contu ufficiali di u cunflittu, pocu pricisu hà dichjaratu 242 morti par i dui campi, ma ognunu riccusa sti sciffra, tandu i suldati nemichi sariani ammazzati par centinaia ogni ghjornu. L’armeniani dicini chì 3000 suldati azerinchi sò morti dapoi a ripresa di i colpi u 27 di sittembri, à l’inversu hà dichjaratu Bakou a sparizioni di 2300 armeniani.
Un’altra infurmazioni impurtantissima hè stata cunfirmata dinò da i reti suciali. I miliziani siriani cundutti da a Turkia d’Erdogan sò ghjunti à aiutà l’armata azerinca.
Dapoi u mesi di sittembri, sti cumbattanti stragneri sò stati arrulati da a Turkia alleata è mandati in l’Altu Karabakh. A cumunità intarnaziunali vedi una prova militaria è pulitica di Recep Tayyip Erdogan chì cerca da ingrandà a so influenza in u rughjoni, avanzendu nant’à stu tarritoriu, è piazzendu à stessu tempu i so forzi armati.
Da l’altra parti, hè stata a Russia u sicondu paesu-terzu à parlà dopu à a ripresa di i lotti, chjamendu à l’appaciamentu. Sta zona hè diventata un spaziu strategicu par i dui paesi, allora chì Moscù teni una piazza d’arbitru, ci voli à cumpona cù a Turkia d’Erdogan oramai, quidda chì cerca i so intaressi naziunali è parsunali in l’affari.