Esse corsu. Ùn esse corsu… è allora esse u furesteru? S’ella fussi una quistione chì nimu in a Storia di u naziunalismu corsu mudernu hà rispostu francamente hè : Quale hè chì hè corsu ? Chì ghjè un corsu ? Ùn ci hè mai statu, da ciò ch’eiu so, un testu, o un libru ch’hà rispotu à una tal’ quistione. Mettite 5 corsi in una stanza per dà una definizione di l’esse corsu (ch’ella fussi una naziunalità, un cittadenza, un “corpus” di l’esse corsu) nimu serà d’accunsentu cun l’altru è v’averete 15 definizioni. Riproducete u ghjocu annant’à a rete suciali cum’è l’avemu vistu incù l’affare di u “tarrif résident” d’AirCorsica è hè ancu peghju.1 U 18 di ferraghju di u 2020, AirCorsica annunzia ch’ellu hà da rinfurzà i cuntrolli per i viaghjatori. Per pruffità di u “tarrif résident”, ci vulerà à mustrà chì a persona campa bè in Corsica. Ùn serà più pussibile per a diasporà di viaghjà è pagà menu caru. Ciò ch’hà pruvucatu una pulemica à prupositu di a diasporà corsa. L’affare avia fattu a prima pagina di u ghjrunale di u Corse-Matin di u 21 di ferraghju.
Fortunamente, ùn hè u scopu di st’articulu di rientrà in quella pulemica. Tandu, spiegheremu perchè hè un sciappa capu di definisce oghje un criteriu per esse corsu.
Fallata demugrafica, declinu di l’usu di u corsu è quistione di l’identità
Prima di tuttu, ci pare interessante di capì perchè si pone una tal’ dumanda. Tempi fà, ùn c’era dubbiti per sapè qual’era corsu. Ùn c’eranu immigrazioni maiò ver’ di a Corsica, a nostr’isula era maghjuritamente una terra d’emigrazione ver’ di a Peninsula. Ciò chì fermavanu in Corsica parlavanu i nostri numerosi regiuletti è c’era una perpetuazione di e tradizioni. Omu pudia ricunnosce un corsu di a diasporà perch’era corsofonu o perchè avia ligami forti cun a Corsica. Quellu periodu di “cursità schietta” hà principiatu u so declinu cun a Grande Déflation(1873-1896) ch’hà messu à ghjinochju u mudellu agricole di l’ecunumia di a Corsica. Cum’è a puvertà era grande, i corsi anu fattu a scelta di fughje in u Cuntinente è in e culunie francesi. Stu declinu s’hè rinfurzatu da a Prima Guerra mondiale ch’hà pruvucatu a morte di più di 15,000 corsi in u fampu d’onore s’hè compiu u lindumane di a Seconda Guerra mondiale. À u listessu mumentu l’usu di u corsu declinava caghjone di l’esiliu di i corsi ver’ di i culonie d’Africa o d’Asia o ver’ di Parigi è Marsiglia per truvassi un impiegu, per megliurà u so benestà. A Francia è e so culunie eranu terre d’opportunità è l’usu di u francese a chjave per esce a puvertà ; à u listessu mumentu u corsu era mostrata cum’è un patois da abandunnà.
Hè in quellu cuntestu di perdita d’identità, di migrazioni maiò da à Corsica ver’ di u Cuntinente è viceversa chì a quistione di l’identità corsa si pone. Hè perchè ùn ci sò più fattori “videvuli” per ricunnosce un corsu chì a quistione di l’identità si pone
Oghje, l’usu di u corsu in a sucetà hè debule, u so usu hè cantunatu in certi lochi cum’è u stadiu di ballò, i bar o un pocu in famiglia. L’usu di u corsu in carrughju da i ghjovani hè di più in più raru. Ci vole à ricunnosce ch’oghje si pò campà a so vita sana in Corsica ùn parlendu mancu una parola di corsu. Hè in quellu cuntestu di perdita d’identità, di migrazioni maiò di a mane d’opera qualificata da à Corsica ver’ di u Cuntinente è di venuta di persone diverse da u Cuntinente ver’ di a Corsica chì a quistione di l’identità corsa si pone. Hè perchè ùn ci sò più fattori videvuli per ricunnosce un corsu chì ci hè una quistione d’identità. In altrò, a carta naziunale d’identità hè u fattore discriminante, ma ùn esiste naziunalità corsa per a ragione evidente chì a Francia ùn hè un Statu plurinaziunale.
U prublema di sceglie un criteriu
Mettite 500 persone, tirati à a sorte in carrughju, è ditemi quale hè chì hè corsu o micca. Hà da esse un po’ difficiule. Forse dumanderate quale hè chì parla corsu, forse a so casata, induve sò nati… ma u numeru di corsu dipenderà di u vostru criteriu di selezione. S’è un’omu dice chì sò corsi quelli chì parlanu corsu è ùn sò micca corsi quelle ch`ùn sò capace di parlallu, ci serà una sfarenza maiò paragunatu à quellu ch’hà sceltu un criteriu “etnicu” cum’è per esempiu a casata o l’altru ch’hà sceltu cum’è criteriu a prisenza o micca di sepultura di l’antenati in paesi corsi. Ci hè un risicu di sghembu di selezzione, d’inclusione o di sclusione. Chì cosa vulemu : include à u massimu, è dunque avè una cumunità eterogenea o spizzicà à u massimu per avè a cumunità a più “schietta” pussibile. U criteriu di “selezzione” implica parechje cose.
Capite, ci sò perechje risposte per dì quale hè chì hè corsu. Criteru liguisticu, etnicu, suciale, matrimoniale ecc. « Hè corsu quellu ch’hà una mamma corsa » « Hè corsu quellu ch’hè natu in Corsica » « Hè corsu quellu ch’hà a so casa in paese » « Hè corsu quellu ch’hà l‘autocollant » Si puderia cuntinuà cusì per ore. Ogni criteriu hà i so vantaghji ma ancu di più incunveniente. È tandu, ùn avemu parlatu di a “cumunità di destinu” ancu di più difficiule da define. A quistione di “l’integrazione”, pare un po’ stranu quandu sapemu chì si stime u numeru di corsofoni frà 86,000 è 130,000 à u massimu2Stimazione fatta da Opinion Way in u 2012. Per sapenne di più : http://www.sioccat.com/mbFiles/documents/enseignement/ressources/enquete-socio-linguistique-sur-la-langue-corse.pdf. Cume si pò dumandà a tutt’a ghjente chì si sbarca in Corsica di “duvintà” corsa s’è ùn femu mancu u sforzu d’amparallu è praticallu?
A corsofonia, criteriu storicu?
“Morta a lingua, mortu u populu” ? Cum’è omu pò vede, u criteriu linguisticu, era u più ghjustu per define quale hè chì hè corsu o micca tempi fà. Pare difficiule da fanne usu oghje. Ùn si pò cunsiderà cum’è non-corsu quellu ch’ùn parla corsu allora chì i so genitori, elli, parlanu corsu (almenu ch’accitate di sclude ghjente d’urigine corsa ma ch’ùn sò capace di parlà corsu, ch’elli sianu nati quì o micca). Cum’è si vede annant’à quelli grafichi, u nivellu di corsu dipende di l’età di e persone interrugate. I più vechji sò, in mediana, più corsofoni chè i ghjuvani.
Pare allora difficule di determinà quale hè ch’hè corsu è qual’hè ch’ùn hè micca corsu cun u criteriu linguisticu. Numerosi corsi di sangue, chì spartenu certe tradizzioni corse senza parlà corsu ùn serianu qualificati di corsi cun quellu criteriu. L’errore di sclusione seria forte.
Seria corsu, quellu chì si sente corsu di core (u “plebiscitu d’ogni ghjornu” cum’è dice Renan), vale à dì, quellu chì face soiu u passatu cumunu di u populu corsu è chì vole dinù megliurà u benestà di u populu corsu, è dunque di a so terra cumuna, a Corsica.
Cun una sucetà corsa ch’ùn parla più maghjuritamente a so lingua storica, u criteriu etnicu pare per certi l’ultimu criteriu “storicu” per ghjustificà a “cursità”. Tandu, esiste corsi di sangue ch’ùn si sentenu micca corsi u risicu di quellu criteriu hè dunque u risicu d’errore d’inclusione. Allora l’idea di pensà ch’hè corsu l’omu chì si sente corsu pare interessante. Seria corsu, quellu chì si sente corsu di core (u “plebiscitu d’ogni ghjornu” cum’è dice Renan), vale à dì, quellu chì face soiu u passatu cumunu di u populu corsu è chì vole dinù megliurà u benestà di u populu corsu, è dunque di a so terra cumuna, a Corsica. Ma quellu criteriu hè difficiule da sceglie in un’isula induve i mezi per celebrà a Nazione sò pochi. Qualchì feste o celebrazioni ùn bastanu, a lingua deve esse u principale vettore d’appartenanza di u populu.
Tandu, ci vulerà bè à fà una scelta un ghjornu. A mancanza di pruduzzione intelletuale in u campu naziunalistu hà creatu un tufone ideulogicu per tuttu ciò chì tocca à e grande quistioni ideulogiche. A pulitica di u “à peu près” o di u “en même temps” di u “Comme c’est vague, tout le monde y voit un peu du sien” ùn pò esse quella di u populu chì rinvindicheghja a so emancipazione. Ùn si pò chiedà a rinascita di a Nazione corsa s’è i strumenti intelletuali per fallu ùn esistenu. U dibattitu hà bisognu di più di pruduzzione d’idee per trattà sta quistione maiò di sucetà.