Paesi, apriti li vosci cappeddi !

I cappeddi corsi sò viculi di tisori sminticati, ultima lascita d’una vita paisana stagliata da li festi rilighjosi, piattani sempri i fatti ‘lla storia medievali ch’hà pruvucatu tanti è tanti scuzzulamenti in li nosci rughjona. Edifizii par a maiora parti custruitti sottu ad a duminazioni pisana, cunsarvata da Genuva, sò i petri chì marcavani i cunfini trà li pievi, ed un’urganisazioni pulitica ‘llu tarritoriu sguassata da lu filu ‘lli puteri isulani. Com’è l’idiomu corsu ed a lingua taliana, facini parti di u cuntinuum architetturali è rilighjosi  cù l’edifizii ‘lla Tarra ferma è di a Sardigna. L’annu scorsu, i cappeddi corsi dedicati à Santa Ghjulia erani assuciati par a prima volta à lu caminu storicu cunsacratu à la santa in Italia. Calchì jorni fà, l’Associu “U Fretu Anticu” facia la scuparta stunenta d’una cappedda dedicata à Sant’Efisiu, patronu ‘lla cità di Cagliari in Sardigna suttana. Più ch’ùn munumentu patrimuniali, i nosci cappeddi contani a storia lucali ed i nosci ligami prufondi cù lu Meditarraniu cristianu.

A cumunicazioni in giru à lu patrimoniu rilighjosi devi essa ingrandata à la prumuzioni di a storia lucali, isulani è stessa italica, par lu sviluppu d’un turisimu di a cunniscenza, ma soprattuttu par a valurisazioni d’una parti ‘lla cultura corsa chì smarrisci. Nantu à la cumuna di Santa Lucia di Tallà, eccu a storia ‘lla cappedda San Roccu, da scopra s’è varcheti lu rughjoni di l’Alta Rocca.

A cappedda San Roccu, in Sant’Andria di Tallà.

46628942335_b69d153123_b

Oghji pasciali amministrativu ‘lla cumuna di Santa-Lucia-di-Tallà dapoi u 1964, u paesi di Sant’Andria piatta a storia medievali di l’Alta Rocca. U tupunimu di “Cosciolo” ghjuvaia à chjamà u paesu nanzu, si ritrova in li Cronachi ‘llu storianu Giovanni Della Grossa à lu XVI esimu seculu, era un locu di piaceri è di spassighjata par la famidda signuriali Della Rocca. U nomu di Cosciolo, o Cusciolu in corsu, veni di a parolla “Coscia”, fendu rifarenza à la tarra feconda ‘llu paesu ch’accogli sempri l’orti paisani. A l’iniziu di u XV esimu seculu, a pesta nera ghjunghji in Corsica, è codda sin’à Sant’Andria, forsa cù a vinuta di dui marinari ch’erani sbarcati in Bunifaziu. U paesu hè viutatu da l’epidemia, tandu si metti in piazza una razza di circulu sanitariu. I malati coddani sin’à a cappedda di Sant’Andria, ed aspittani a morti accantu à la fossa cumuna chì si trova dentru. U malatu chì segui lampa u corpu in la fossa ed aspitta ch’idda ghjunghji a morti par iddu. I ricordi ‘lla pesta nera in Sant’Andria sò sempri prisenti in la storia pupulari ‘llu pasciali. San’ Roccu hè divintatu u santu patronu ‘llu paesu, accampatu di novu da li famiddi vinuta di u rughjoni sanu par rimpiazzà li smarriti, Sant’Andria cù la sprissioni « Paesi di i centi razzi » hè statu numatu.

A festa patrunali di San Roccu, u 16 d’Aostu di u 2019 cù la cunfraterna San Francescu di Tallà.   

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.