À prima intoppu vi pare
Un’omu carc’à vulè
Cumpiacente è manirosu
Sempre prontu à fà piacè
À prupone i salarii
È sbaccà cum’un gherbè
À certuni face imprissione
Cù i soldi è i dannari
S’ell’ ùn ne hà per ellu
A maffia arrangia l’affari
È po offre i frigò
È sbanca in ogni bar
Cunnosce tutti i banditi
Incù quale era in scola
In Corsica hè cusì simplice
Si manghja à a stessa tola
Cù i laddri è i macelai
Chì si pensanu grand’omi
S’ellu sente parlà corsu
Appinza tandu u musu
Po ess’un novu elletore
Chì sarà forse cunfusu
D’ùn sapè pà qual’vutà
In stu buleghju dillusu
S’omu canta una paghjella
Ne diventa infribbacciatu
S’avvicina per cantà
Ochji chjosi, bocc’apparta
Ma ùn canta mancu note
Nè versi, nè rivucate
Ùn c’hè nimu in li carrughji
Ch’ùn sia di u so paese
Semu tutti i so amichi
Ma solu pà qualchì mese
Parchì dopu l’elezione
Ùn ci sarà più nimu
Pà risponde à u telefonu
Riturnarà à manghjà
Incù quelli maffiusioni
Solu accittemu da ellu
Ch’ellu perde l’elezione
Si purrà chjamà sudesfu
U corsu ristatu fieru
Quellu ch’ùn ne hà betu
Acqua torbia à u bichjeru
Chì li porghje à manu in pettu
U calafrone culistieru