L’associu di i pruduttori Taravu – Valincu – Sartinesu hà apartu a so butteca di robba lucali

U 15 di frivaghju. Sabbatu matina in Pitretu-Bicchisgià, hè stata inaugurata a prima butteca ‘lli pruduttori di u Taravu, Valincu è Sartinesu, u prughjettu hè natu da l’associu paisanu  ch’hà invitatu l’aghjenti à tastà è cumprà robba lucali. L’andatura era sustinuta da u sindicatu agricolu Via Campagnola.

IMG_2068

Par l’uccasioni, avemi intarvistatu Pierre Alessandri, pruduttori d’olii essenziali à Sarrola-Carcopino. Era capilista di u sindicatu Via Campagnola mentri l’ultimi alizzioni ´lli raprisintenti di a camara d’agricultura di Corsica. Metta in valori u lavoru di l’aghjenti era u primu scopu di sti scontri paisani :

Oghji quistu marcatu hè un veru simbulu, un asempiu chì s’opponi ad u mudelu di i centri cummarciali, induva ùn si trova chì rubbaccia da partuttu, tandu ci voli à sviluppà st’asempiu, ch’iddu rispondi di più in più ad una vera dumanda di u cunsummatori par manghjà prudutti sani.” A prumuzzioni d’un marcatu ecunumicu nustrali, offrendu d’una parti un puteru di cumprà lucali par l’aghjenti, ed un soffiu novu ad u travaddu di i pruduttori: “Basta à andà in li spazii cummarciali par veda a sfarenza, sò prezi di scemi, è noi pruvemi ghjustapuntu à scartà di u sistemu nosciu l’aghjenti chì facini speculazioni nantu à a robba agricola. Quì i prudutti sò menu cari ch’in centri cummarciali, è t’hà da stà un sistemu sustinevuli par tuttu u mondu »

IMG_2074

Stu dopu miziornu fù piacivuli par ugnunu vinutu à scopra l’andatura sustinuta da Via Campagnola, una bedda stonda fatta di scambi è di scontri intornu à a pruduzzioni ‘lli trè rughjona: “Primu, hè un mezu di sviluppu ecunumicu, ma ancu un mezu par u populu di fundà una leia suciali nova. Oramai ugnunu pò veda ch’hè raghjunata sta via  di pruduzzioni lucali, ma ci voli chì l’agricultori si mittini d’accunsentu, era u primu passu da francà è l’avemi fattu. »

A butteca, chjamata « La halle des producteurs » addunisci par avali vinti  agricultori è pastori almenu, parmittendu à l’aghjenti di cunsummà lucali mentri l’annata sana. Sta ghjurnata auguraia ‘ghjà un avvena sicuru par i marcanti. “U fattu simplici di producia calcosa raprisinta assai, è s’è ùn mittimu, insembiu, tutt’i mezi par producia, semi lecchi.” Un discorsu raghjunatu nantu à a situazioni agricola oghjinca in Corsica, una strada ch’iddu seguiteghja u sindicatu Via Campagnola dapoi a so criazioni in u 1992, cù sta parolla: “Sempri da par noi.” Sicondu à Pierre Alessandri, hè sopratuttu una quistioni di vulintà: “Saria naturali di metta si in quatru, fà tuttu par i ghjovani chì volini installassi è producia nant’à la so tarra. Ch’iddu sia ad u liveddu puliticu, o di a furmazioni ci voli à pinsà insembiu par l’intaressu cumunu, ùn si pò più rifletta par a so casa propia solamenti, è pensu ghjustapuntu chì si trova quì, lu nosciu prublemu primu: oghji u cumunu ùn esisti più. Certi pruduttori volini sempri lavurà solu, tandu ci vularia à ritruvà di novu un bisgognu ginirali par travaddà insemi.”

IMG_2073

Accantu à i prublema maiò ch’iddi scontrani l’agricultori corsi, quiddu di a furmazioni in li licei spicializati di Corsica hè statu pocu mintuatu mentri li dibattiti di l’ultimi mesa. “Oghji, ci hè una mancanza di furmazioni è sopratuttu, ligamu ùn ci n’hè trà u liceu ed u tarreniu par amparà i mistieri, hè chjara a sfarenza trà u ziteddu ch’hà sempri amparatu in classa è quiddu ch’hà lavuratu nantu à u tarreniu. Ghjè par quissu chì ci vularia da sviluppà in li licei agricoli l’alternanzi prufissiunnali, par custruì un ligamu più fortu trà i studienti è l’impresi, una lea cù u travaddu.

Un puntu di vista nantu à a furmazioni ch’iddu sparti Antone-Petru Giocanti, studientu ad u liceu agricolu di Borgu è ch’avemi intarvistatu calchì mesi nanzu:

« L’insignamentu à u liceu agricolu di Borgu hè bè, simu in una struttura assai bè, simu intesi da i prufissori o anche da a direttrice quandu ci hè bisognu. Dopu, annantu à e dumande tecniche, pudemu sempri truvà cose dà megliurà, ma hè un bonu insignamentu. Pensu chì pà affruntà i prublemi novi ch’elli scontranu l’agricultori corsi ci voli à andà aldilà di e noscie ore in sala di corsi, induva i prufissori ci danu e base, e scuperte tecniche nove, è circà à innuvà è riflette anche à ciò chì pudemu fà da per noi girendu-si anche versu u travagliu di i nosci anziani, oghji cù i mezzi ch’avemu, pensu chì avemu tuttu pà riesce. Ùn vuleraghju micca cambià cose in st’insignamentu ma pensu piuttostu chì saria bè di prupone d’altri furmazioni/bascigliè in stu cumplessu d’insignamentu, cusì i ghjovani pudaranu furmassi direttamente in Corsica senza avè bisognu di spaisà dopu un bascigliè, eppuru pò essa bè di spaisà par veda nove tecniche, ma ghjè à u ghjovanu di sceglie. »

Un commentaire

  1. In Italia ùn hè micca faciule truvà prudutti corsi. Almenu di tutti, ci sò i negozi specializati solu in a produzzione corsa. Ùn pudete micca pensà à una tale iniziativa?

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.