L’essaru suciali è a mudernità

« L’Omu hè un’animali suciali » Aristote.

In un mondu induva u cunsumu hè rè di tuttu. In un mondu induva i novi tecnulugii ani francatu u passu annantu à tuttu i tradizioni di i nosci antinati. In un mondu induva a litteratura ùn hè più u centru di l’attinzioni.

Ci voli à parlà di l’Omu è di u so cumpurtamentu in sucietà.

In fatti, l’Omu hè un animali chì si piaci in mezu à la ghjenti, in mezu à i so amichi, à parsoni chì sò listessi d’eddu. L’Omu hè dunqua una speci d’animali ch’ùn pò viva senza un aiutu esternu, ùn hè micca autonomu ind’a vita d’ogni ghjornu.

Piddemi à l’alleguria di a sapara versioni 2019 : un Omu sempri statu ind’a so grotta, ch’ùn hà mai vistu a luci di u soli, avaria invidia di escia à veda parsoni listessi à eddu? Avaria bisognu di discuta/telefunà pà adattassi à a sucietà attuali, avaria bisognu di avè soldi pà cumprà affari, senza pudè scambià ossi incù…pesci. Saria cuntentu di riturnà à u statu primariu, sottu à a terra?

L’essaru suciali hè quiddu chì hà persu a so autonomia individuali pà lascià à u gruppu u puteri di producia è di decida ciò ch’edd’hè bonu par eddu. L’Omu mudernu hà delegatu à l’altri a pruduzioni di ughjetti specifichi, t’hà dunqua bisognu di scambià incù u restu di l’essari umani pà avè suddisfazioni.

Di fattu, è senza discussioni pussibuli à issu sughjettu, l’Omu hè un animali suciali, hà bisognu di l’Altru incù un A. A mudernità faci chì viva solu, da cantu, hè missioni guasgi impussibuli.

« L’esistenza suciali di l’omi determina u so pinsà » Mao Zedong

L’Omu, senza « l’Altru », ùn pò guasgi micca viva di manera curretta, micca viva simpliciamenti. Ma l’Omu, in cunsequenza, hà un modu di vita chì l’imponi d’avè cuntatti incù l’altri.

Iss’altri sò parenti, famidda, amichi, parsoni di u carrughju è vi determinani a voscia manera di vita, a voscia cuscenza, i vosci sapè essa è sapè fà.

U ziteddu, pà mimetismu, credi bonu di imità l’adulti ind’a so vita quotidiana. Issu ziteddu hè dunqua educatu di manera tali ch’eddu avessi una manera di pinsà particulari, dittata da a sucietà, dittata di l’altri.

Un hè micca solu a mudernità chì faci chì a vita in sucietà sia determinata da l’influenza di l’altri annantu à un ziteddu mà a sucietà attuali ci faci mori.

Piddemi dui asempii :

  • Fighjuleti à certi parsoni annantu à una reti suciali famosa : publicani « fake news » di manera scatenata, ogni ghjornu. U so cumpurtamentu hè statu dittatu da certi membri di a so sucietà, di u so gruppu suciali ch’aviani interpretatu di manera azzardosa diversi fatti. I « fake news » sò una pesta muderna ind’u sensu chì i parsoni publichendu issi nutizii sò « furmattati » di una certa manera chì trasformani i fatti ind’una strana bacia trasmessa annantu centinaii di millaii d’urdinatori/telefuninu.
  • Certi paesi incù dittaturi o certi setti : a ghjenti hà un modu di pinsà dittatu da u guvernu, senza mezi d’infurmazioni alternativi. Quì, un picculu gruppu o una piccula setta pripara un modulu d’indottrinamentu abbastanza forti pà scuraghjà a ghjenti di pinsà altrimenti.

Di manera evidenti, l’essaru suciali è a mudernità ùn si poni dissucià di nisciuna manera, eccettu à u fattu ipoteticu di viva in una sapara duranti anni è anni, senza u cunfortu mudernu.

U cunfortu mudernu necessita, anch’eddu, un’evuluzioni di i maneri di pruducia tali chì si pudaria pinsà chì hè naturali d’avè elettricità à i tempi attuali allora chì, in fatti, hè un prucessu storicu riccu di cullaburazioni umani chì hà datu vita à issa fantastica energia senza a quali ùn sariati mancu capaci di leghja issu testu ed eiu di scrivalu.

Feti una prova dopu ad avè lettu issu testu : spinghjiti u vosciu telefunu pà una ghjurnata. Sarà difficiuli, ùn hè? Saria a dimustrazioni chì seti incapaci di viva senza « l’Altri », aveti bisognu di piddà nutizii, aveti bisognu di essa ascultatu è d’ascultà i decisioni di « l’Altri » pà guidà a voscia vita.

Pà cuncluda, « vivemi filici, vivemi insemi »!

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.