Mulizi : a risistenza s’urganiseghja

Dipoi anni, a Corsica hè tocca d’una crisa maiò di i mulizi. I mezi di tratamentu so troppu debuli è pare chì nimu ùn abbii a suluzione. Mà i cumpurtamenti di l’individui dinò sò anch’elli più ca prublematichi è rendenu u travagliu cumplicatu… Certe iniziative, nate d’issu custatu, provanu à tramandà e bone pratiche è à sparte un messaghju pusitivu, spuliticu è pulitu. Focus

Rumenzuli Imperiali : un’Instagram pà mustrà i cumpurtamenti irrespunsevule è parlà di privenzione 

Basta à apre l’ochji par rendesi contu chì Aiacciu hè una cità brutta brutta. Dapoi à qualchì anni, si dumanda à a ghjente di lacà i so mulizi in carrughu, in tarra stessa, à ore pricise ( cunsigna chì i sirvizii di a Capa strazianu à fà rispettà). 

Issu sistema, ci laca incù ammansere di sacchi brutti chì stanu a maiò parte di a ghjurnata, scaldati da u sole, dendu un ambiente puzzicosu è un aria stumachente di disualzione. Mà u peghju ùn hè tantu u muscu. Postu chì cacciarumenti ùn ci ne hè da raccoglie è cuntene i sacchi chì appenna lampati so cripati, sbrimbati, sfarfagliati, da l’acule marine è da i topi. Una volta cacciati da l’impiegati di u lozzu, u travagliu di pulizia hè compiu da i scaravazzuli chì pruliferanu in tuttu u Borgu. I risturanti, i cummercianti è a ghjente ùn ne ponu viramente più. 

Rumenzuli Imperiali
Logo di l’accontu « Rumenzuli_Imperiali » annantu à Instagram

In risposta à ssu lascia corre, un accontu hè statu criatu annantu à Instagram, u so scopu hè di palisà i cumpurtamenti dispitosi di pettu à i rumenzuli è di tramandà l’usi è l’abitudine boni à ognunu. L’amministratori di l’accontu @Rumenzuli_Imperiali facenu filmetti in storie induv’elli ghjettanu (quand’elli a ponu) qualchì mulizii chì a ghjente à lampatu in tarra o chì u ventu à cacciatu da i rumenzuloni chì fiuriscenu a cità impirale

D’altronde, ognunu po mintuvali annantu à e so storie è mandali ritratti di cumpurtamenti abburrevule. 

Opération Corse Propre : spullutà è smulizzà a Corsica fendu cleanwalks

Per via di tistimunianzi videi annantu à facebook, emu scupartu qualchì mesi fà pocu stupiti chì framezu à machja, in la Corsica prufunda, si truvava rumenzuloni salvatichi. 

Eppuru, face dighjà qualchì tempu chì Opération Corse Propre rialiseghja uperazione di ripulitura in la Corsica sana. Dendu appuntamenti annantu à a so pagina Facebook, l’associu invita tutta a ghjente à agghjunghjeli da nittà lochi selezziunati. Pneumatichi, ferraglia, vitture prese da a veghjetazzione, tamburini di lavatoghji… Ciò ch’elli raccoglienu umbrosu è face pone quistione annantu à a cumpreensione di i Corsi di pettu à e prublematiche ambientale…

Corse propre lieux.jpg

Chjamà à l’iniziativa individuale è culletiva

In Corsica, u prublema di i mulizi hè spripusitatu è tocca à noi à capì ch’ùn si pò risolve senza una cunscenza individuale è una mossa culletiva. E stituzione pulitiche strazianu à truvà lochi induve intarrà, brusgià ò spatrià i nostri mulizi. Ma ùn face cà spiazzà u prublema : emu da ghjunghje à un puntu di saturazione di a nostra tarra prestu prestu. 

E suluzione ghjunghjenu da l’indiature cum’è quelle mintuvate sopra o par un dettu, par via d’imprese cum’è Corsican Blue Project, chì t’hà un prughjettu da pulisce u maretarraniu di u so plasticu è di a so puluzzione liquida. 

Ma ognunu pussede un pezzu di a suluzione. Limità u so cunsumu di plasticu, bia u so Spritz senza paglia, fà u trì, cumprà in vracu o à u mercatu… Avemu tutti u putere di cambià u nostru pesu eculogicu fendu pochi sforzi !

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.