Bona serASMR

Da i tempi i più anziani, l’omini ani avutu una facultà : quidda di dorma.

7 ori/notti, ancù di più par certi.

6 ori/notti, ancu di menu par certi.

Tanti parsoni piddani «i « cachets » pà dorma. Ansiolitichi, droghi.

Eccettu casi spiciali, basta una video, un sonu di qualchi minuti pà dorma.

Vi pari strasurdinariu ?

Basta à praticà l’ASMR.

6 ori è 42 minuti, hè u tempu ch’un francesu mediu passa à dorma ind’u so lettu. Menu di i setti ori minimi raccumandati.

Pà aiutà à ciascunu à dorma di manera pratica è gratisi, ci sò tanti seanzi ditti ASMR, sia in Corsu « risposta autonoma sensuriali culminanti ».

Avemi fatti test par vo.

Di manera generali, i seanzi sò pustati annantu à Youtube. Durani da 4 à 25 minuti è si devini ascultà incù un sistemu di tipu « oreillettes ou casque ».

A donna o u masciu sussurani o parlani à voci bassissima ind’un microfonu.

À a fini di a video, u scopu hè di dorma cumpletamenti.

È l’artistu ASMR vi aiuta mori pà quissa. Incù rimori di carta, di tastiera d’urdinatori, vi intrateni una cunversazioni fittiva è v’aiuta à pinsà ad altri cosi. Altri cosi rispettu à quiddi chì v’impedisciani di dorma.

Dui asempii di seanza ASMR in francesu : Quidda sussurata è quidda à voci bassissima.

A prima artista hè Laura Ellecea ASMR. Parla sulamenti in francesu ind’i so video sussurati è i so temi sò assai varii. Una volta vi faci un test cunsumatori, u lindumani vi leghji un estrattu di Bel Ami, ùn dimentichendu micca a prisintazioni di i so ghjatti. U tuttu s’essendu fattu di manera à rilassavvi.

Ind’u casu di u « roleplay » test cunsumatori, a donna vi metti in cunfidenza, fendu nici di dumandavvi u vosciu sessu a voscia prufessioni è a voscia età prima di pona 15-20 quistioni sempri sussurendu, incù sonu di tastiera in fondu.

Un veru rigalu pà l’arechji.

Parolla d’una parsona chì dormi pocu, v’aiuta mori à addurmintavvi di manera serena.

Attinziò di bè piantà u vosciu urdinatori dopu !

U sicondu vi parla à voci bassa : hè Voie intérieure ASMR. Issu ghjuvanottu vi parla di manera principali di a so vita.

I so video sò rari ma v’aiutani à dorma attraversu à un prucessu sfarenti, a voci essendu certi volti prisenti.

Vi faci un pocu di magia, vi parla di i so passioni è vi faci enigmi da truvà. Una catena youtube parsunali assai intarissanti pà quiddi ch’ùn supportani micca a situazioni di video à voci sussurata.

Issi dui asempii vi parlani di cateni assai cunfidenziali ma ch’ani in cori di parlà direttamenti à i so abbunati attraversu à temi parsunali è quotidiani.

Pricisemi chì i video ASMR ùn sò micca quì pà sustituissi à i terapeuti o altri duttori spicialisti in scenzi cumpurtamentali.

Sperendu chì ci sarani prestu video ASMR in lingua nustrali.

Sperendu ch’issa corta cronaca v’aiutarà à dorma.

Bona serASMR.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.