Ghjurnalettu di a nova Guerra Freta #1

In u 2019, ùn ci hè più nisunu dubbitu nantu à u fattu chè u nostru mondu hè in piena guerra freta è chì e tensione internaziunale sò più forti chè mai. Allora, ci pare necessariu di prupone vi, quand’ella pare oppurtuna, un riassuntu di l’eventi maiò di u mese à prupositu di stu novu cunflittu. Eccu u ghjurnalettu di a nova guerra freta!

In u Mez’Oriente e tensione frà i Stati Uniti è i so alleati sò cresciuti dopu à u sabbutaghju di parechje stallazione petruliere in Arabia Saudita

Perchè ci sò tensioni?

E tensione sò cresciute frà i dui paesi l’annu scorsu dopu à u rinunziamentu di Donald Trump à prupositu di l’accordu nantu à u prugramu nucleare di l’Iran. Issu prugramu priparava a fine di e sanzione internaziunale s’è l’Iran arristava u so prugramu nuclare militare.

Sudisfatu di l’accordu neguziatu da l’amministrazione Obama, Trump hà impostu torna sanzione ecunomiche per furzà l’Iran à rineguzià l’accordu, senza successu.

Per risponde à isse sanzioni, l’Iran hà anch’ellu annunciatu ch’ùn rispetterà più l’accordu è minaccia di cuntinuà a pruduzzione d’uranium per fanne un usu militare. Ciò chè pruvuchò l’inchietudine di l’Auropa, a Russia, ma ancu l’Arabia Saudita è Israele chè sò e duie nemichacci di l’Iran in a regioni.

I Stati Uniti minaccianu di mette a pressione ecunòmica nantu à u guvernu di Teheran per furzà un cambiu di regimu. A situazione di l’ecunumia persana hè una vera catastrofa in u 2019 cun inflazione è disimpiegu alti. Per ùn perde a faccia, l’Iran hà rispostu cun e so milizie in Irak è in Yemen è anu attaccatu parechje pusizione petruliere è militare di l’Arabia Saudita, ciò ch’hà pruvucatu u furore di u Presidente americanu è di a so amministrazione. Minaccianu di mandà 10 000 suldati per accentuà a pressione è priparà si in casu di guerra. Da e duie parte, si dichjara chè nimu vole a guerra è tandu, e cundizione sò reunite. Da seguità.

A guerra cummerciale frà a China è i Stati Uniti slitta nantu à u terrenu tecnulogicu

A guerra di i dazi duganali frà i Stati Uniti è a China cuntinueghja è slitta avà nantu à terrenu tecnulogicu. Suspettu di spiunaghju per u contu di l’armata Chinese, Donald Trump hà firmatu un dicretu (executive order in inglese) per impedì ogni imprese americana di fà cundivisioni di tecnulugia incù Huawei. Cusì, grande imprese cum’è Google, ma dinù fabricanti di cumponente elettronicu anu messu fine à i cuntratti di cullaburazione. L’impresa Chinese hè ben ferita da stu colpu di u « Donald » chì puderia perde a so piaza di numeru 2 di e vendite di telefunini in Auropa, un mercatu cunquistatu cun sudore à un gigante americanu Apple. Infatti, i telefunini Huawei ùn puderanu più fà usu di l’appiegazioni di Google cum’è Gmail, YouTube o altri, è ùn serà più pussibile di caricà appiegazioni nantu à u Google store. Nundimenu, Huawei hà annunciatu à i so utilizatori chè l’impresa hè pronta à implementà u so propiu OS per sustituì da quì à pocu quellu di Google.

I rischi di spiunaghju sò reali tandu ch’hè l’armata populare di liberazione (armata Chinese) u veru pruprietariu di l’Holding di Huawei.

A Russia in imbuscata per impedì l’Auropa di sviluppà a 5G

Cumpieremu stu primu ghjurnalettu parlendu di a lotta per l’implementazione di a 5G in Auropa. Hè una tecnulugia nova chè permitteria di fà cresce a velocità di caricamentu nantu à Internet, è dunque megliurà a pruduttività di l’imprese. A China seguitata da i Stati Uniti sò i duie paesi ch’ammaistreghjanu quella tecnulugia sin’à oghje è si battenu per sapè quale hè ch’hà da installà la in Auropa. Ben daretu, a Russia tene assai prublemi cun e so rete di cumunicazione di Internet. Infatti, dopu à a caduta di l’URSS, internet s’hè messu in piazza in u paese in un modu tutalmente anarchista mentre chè in u restu di u mondu fù urganizatu. Allora, e rete russe sò tuccate da un’efficacità mediocra è u paese ùn ammaistreghja micca a 5G. Per impedì l’altri paesi di superà di troppu a Russia, u Kremlin hà sviluppatu un strategia di paura per ritardà l’implementazione di a 5G in Auropa, u so cuncurrente maiò. Hè cusì chè i canali à prò di u Kremlin anu annunciatu chì à 5G hè respunsevule di prublemi di sanità maiò è puderia ferì i zitelli à caghjone di l’alte frequenze.

Strategia efficace perchè tocca bè i cumplotisti è fà sparghje st’idea in a sucetà.

Astutu u « Vlad » eh? S’è t’ùn pò seguità l’altri ghjucatori, impedì li di ghjucà, è firmareti à u listessu nivellu.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.