A settimana scorsa, trè ghjorna di viaghju in Italia, ricchi d’amicizia, di cultura è di spiritualità si sò compii incù un’accopiu impurtanti, criatu trà a Cunfraterna Sant’Antonu Abbate di Speloncato è l’associu « Il Camino di Santa Giulia » in Tuscana, un’allianza rilighjosa è culturali chì s’inscrivi in u desideriu prufondu d’intriccià a leia persa trà l’isula è a Tarra Ferma.
Issa avvicinita hè stata abbracciata da parechji sustegni corsi, cunfrateddi dinò, primu l’associu Stelle di Mare incù u so prisidenti Rafaelu Quilici (cunfraterna Sant’Antonu Abbate di Speloncato), u so sicritariu Damianu Delgrossi (cunfraterna San Francescu in Alta Rocca), è Cristianu Andreani (cunfraterna San Martinu, prisidenti di u centru culturali di Patrimonio). Di più stu viaghju hè statu fattu incù a prisenza amicali di l’Abbati Cristianu Boccheciampo. L’urganisazioni hè stata appruntata da l’associu tuscana Calamo, è diretta da Carlo Picchietti di l’associu Il camino di Santa Giulia.
A missa di Santa Giulia, nant’à a cumuna di Caprona in a ghjesgia rumana di 1096.
L’idea di stu ghjemellaghju hè nata da una sumidda, i ghjesgi di Nonza è di Livorno ani in cumunu a stessa patrona, Santa Giulia, una santa di Corsica, ma prisenta è prigata in altri lucalità d’Italia, un’associu hè stata criata in a cumuna di Buti dui anni fà pà custituì un pelegrinaghju cunsacratu à a santa. « Il Camino di Santa Giulia » avia tandu u laziu di perseguità stu chjassu di l’antra parti di u mari Tireniu, primu incù u paesu di Speloncato oramai, è u scopu prussimu di ligà l’insemi ‘lli loca in rifarenza à Santa Giulia. Issu ghjemellaghju si hè fattu a settimana scorsa, a delegazzioni corsa hè stata accolta vicinu à Livorno, sabbatu in a cumuna di Calci par u cunvegnu, chjamatu « Santa Giulia trà la Corsica è la Toscana. Un ponte trà storia cultura è spiritualità ». L’incontru offra una manera nova di cunsidarà a noscia lascita cumuna, è ghjè sicuru ch’avarà cunsequenzi benefichi nant’à a valurisazioni ‘llu patrimoniu corsu è tuscanu, da u livellu di i rughjoni sin’à a diminsioni auropeana. Issu prughjettu hà da essa accrisciutu incù Cristianu Andreani ch’hà da aghjunghja l’anziana cullighjali di San Martinu à Il Camino di Santa Giulia.
Nanzu à vultassi in casa, i cunfrateddi sò stati ricivuti da l’Arcivescuvi di Pisa (piazza cintrali), Giovanni Paolo Benotto par una audienza privata incù l’Abbati Cristianu Boccheciampo (à a so manca) in a sala di u cunsigliu incù a prisenza di Ricardo Busciemi priori di a Cunfraterna San Renieri di Pisa. Issu incontru era una stonda impurtantissima, empia di Speranza par ligà i diocesi in stu pellegrinu spirituali è culturali, com’è l’hà mintuatu Damianu Delgrossi.
A ferma di u ghjemellaghju, in prisenza di u prisidenti di u cunsigliu righjunali di a Tuscana Eugenio Giani, i merri di Calci, Buti è Pisa. I cunfrateddi sò stati accolti da Anna Lupetti, cunsigliera municipali di Calci pà a cultura. U prughjettu hè statu abbracciatu mentri trè ghjorna da Lorenzo Giusti, cunsiglieru à a cultura di Buti, incù l’associu Calamo.
A a manca, Rafaelu Quilici, cunfrateddi di Sant’Antone Abbate è prisidenti di l’associu Stelle di Mare.
Com’è ogni volti, sti viaghja sò l’uccasioni d’avvinimenti culturali assai ricchi trà Corsi è Taliani chì scambiani canti è tradizioni pupulari. A dumenica, nant’à a cumuna di Buti in a ghjesgia di Santa Maria di a neve, i paisani ani pussutu ascultà à canti pulifunichi da a Cunfraterna Sant’Antonu Abbate, è dopu l’anteprima di Maghju butesi recitatu da a Cumpania di Maghju.
Rafaelu Quilici testimunia ‘llu piaceru tamantu ‘lli taliani, à l’ascolta ‘lli canti corsi chì t’ani u puteri di ramintà tanti ricordi à i più anziani « Quandu cantemi in i ghjesgi, certi si mittini à pienghja, parchì sò i canti ‘lla so zitiddina, di ciò ch’era cantatu in Italia tempi fà. I nosci canti di a Settimana Santa sò vechji canti tuscani par esempiu. » Spieghendu chì in u passatu i Corsi fughjendu in Tuscana spartavani i so canti isulani, di più l’usi di a Ghjesgia taliana ani cambiatu assai incù l’ultimu cunciliu di u Vaticanu in 1965, ma i pratichi rilighjosi corsi ùn ani micca cunnisciutu riformi tali, ciò chì spiega a soppravivvenza di stu lasciatu tradiziunali.
In a ghjesgia di Calci, un cuncertu di canti pulifunichi, incù a Cunfraterna di Speloncato, seguitattu d’un cuncertu par i prighjuneri di Pisa, datu da Damianu Delgrossi à a Cetara, Christian Andreani à u viulinu è Jean-François Sicurani à a mandulina.
Una cunfarenza hè stata fatta da u scrittori corsu Jean-Pierre Poli dinò chjamata « I corsi fughjiti in Calci è in Tuscana dopu à a scunfitta contru à a Francia ».
A cunfraterna Sant’Antone Abbate incù l’abbati Cristianu Boccheciampo.
Stu scambiu un sarà micca l’ultimu è apri di ghjà pussibilità novi trà a Corsica è l’Italia. I Prussimi prughjetti sò in riflissioni incù l’Arcivescuvi di Pisa è a Cunfraterna di Monte Maggiore chì viaghjani in l’isula ogni annu. L’associ è i Cunfraterni spirgani sviluppà a so andatura purtata da u desideriu di ligà azzioni rilighjosi è suciali, urganizzà viaghja in Italia, è crià scambii culturali trà i dui parti ‘llu Meditarraniu.
Ringraziemu Rafaelu Quilici è Damianu Delgrossi di lu so aiutu par st’articulu.